Agkaykaysanto Ngata ti Lubong?

KADAGITI nabiit pay a tawen nagsagaban ti minilion a tattao idiay Makindaya a Europa ken iti dadduma a lugar kadagiti nagbanagan ti mamagsisina a panaggugubat. Kaskasdi, uray mapaspasamak dagita a naranggas a panaglalaban, rinibu a tattao kadagitoy a riniribuk ti gubat a pagilian ti nangpatanor ken nangtaginayon iti pudno a panagkaykaysa. Amirisenyo ti sumagmamano a pagarigan.

Idi 1991, nagtataripnong ti internasional a bunggoy a dandani 15,000 idiay Zagreb, Croatia. Natignay ti maysa a polis nga adda sadiay a nagkuna: “Nagsayaat no maipakita iti media ti mapaspasamak iti daytoy nga istadium, ditoy a mismo a makitatayo dagiti taga Serbia, Croatia, Slovenia, Montenegro, ken dadduma pay nga agkakatugaw a sitatalna.” Ania ti makagapu iti kasta a naisangsangayan a panagkaykaysa?

Idi 1993 naaramid idiay Kiev a kabesera ti Ukraine, ti dakdakkel pay nga internasional a kombension, nga addaan iti tema a “Nadiosan a Panangisuro.” Adda kangatuan a bilang ti timmabuno a dandani 65,000. Impadamag ti parupa a panid ti Evening Kiev: “Agkaykaysa dagiti Saksi ni Jehova . . . saan laeng a babaen kadagiti asul a badge a nasuratan iti ‘Divine Teaching’ no di ket babaen iti pudno a pammati.”

Nadiosan a Panangisuro​—Puersa a Mamagkaykaysa

Pampanunotem kadi no apay a sagsagrapen dagiti Saksi ni Jehova ti panagkaykaysa nupay nasaknap ti panagsisina iti aglawlawda? Naammuan ti Polaco a ni Propesor Wojciech Modzelewski ti makagapu babaen ti panangpaliiwna kadagiti Saksi: “Ti kangrunaan a makagapu iti kinatalnada isu ti determinasion a mangsurot itan kadagiti prinsipio a naipalgak iti Biblia.” Kinapudnona, agkaykaysa dagiti Saksi iti intero a lubong babaen ti nadiosan a panangisuro ti Namarsua a ni Jehova a Dios. Ania dayta a panangisuro?

Impatuldo ni Jesu-Kristo ti napateg a prinsipio a mamagkaykaysa idi imbagana daytoy maipapan kadagiti pasurotna: “Saanda a paset ti lubong, a kas kaniak a saan a paset ti lubong.” Wen, ti kinaneutral dagiti Saksi ni Jehova iti amin a lugar ti mamagkaykaysa kadakuada. Maitunos daytoy iti sasao ni Jesus idi nagkararag: “Agkiddawak . . . tapno maymaysada koma amin, a kas kenka, Ama, naikaykaysaka kaniak ket naikaykaysaak kenka, tapno isuda met maikaykaysada koma kadata.”​—Juan 17:16-21.

Mamagkaykaysa daytoy a kinaneutral agsipud ta tignayenna dagiti Saksi iti amin a paset ti lubong nga agbiag a maitunos iti kinuna ni mammadto nga Isaias maipapan iti amin a ‘sursuruan [ti Dios] . . . kadagiti dalanna.’ Kinuna ni Isaias a dagita ‘pandayendanto dagiti kampilanda a pagbalinen a dingding ti arado, ket dagiti pikada pandayendanto a kompay.’ Intuloy pay ti mammadto: “Ti maysa a nasion saannanto nga itag-ay ti kampilan a maibusor iti nasion, ket didanto met adalenen iti pannakigubat uray kaano.”​—Isaias 2:2-4.

Ti napaliiw kadagiti kombension a panagkaykaysa ken talna dagiti Saksi ni Jehova idiay Makindaya a Europa bayat ti naudi a dekada ipakitana a mapaspasamaken ti padto ni Isaias iti bassit a kaitungpalanna. Idiay Europa ken iti sabsabali a lugar, dagiti Saksi piguratibo a pinandaydan dagiti kampilanda a pinagbalin a dingding ti arado ken dagiti pikada a kas kompay. Kas resultana, sagsagrapendan ti talna ken panagkaykaysa itatta iti daytoy nasinasina a lubong. Di ngarud nakaskasdaaw a kinuna naminsan ti editorial ti maysa a periodiko: “No ti intero a lubong annurotenda ti [naibatay-Biblia a] kredo dagiti Saksi [ni Jehova] awanen ti panagpipinnatay ken guranggura, ket agari ti ayat”! Maaramidto kadi ti kasta?

No Kasano a Mapasamak ti Panagkaykaysa ti Intero a Lubong

Tapno adda panagkaykaysa iti intero a lubong, ad-adu pay ti kasapulan ngem ti bassit laeng a grupo dagiti naimbag ti panggepna a tattao. Masapul met ti maysa a gobierno a makalapped iti impluensia dagidiay mangbusor iti panagkaykaysa ken talna. Kinapudnona, insuro ni Jesus dagiti adalanna a mangikararag iti kasta a gobierno: “Umay koma ti pagariam. Maaramid koma ti pagayatam, kas sadi langit, kasta met iti rabaw ti daga.” (Mateo 6:10) Wen, impatuldo ni Jesus a ti laeng gobierno ti Dios, “ti pagarian ti langlangit,” ti makaipaay ti solusion kadagiti parikut ti lubong​—agraman ti parikut a panagsisina.​—Mateo 4:17.

Ni Jesu-Kristo ti Ari daytoy a nailangitan a Pagarian. Iti sidong ti panangiturayna sagrapento dagiti tattao ditoy daga ti awan kapadana a panawen ti talna ken panagkaykaysa. Daytoy a panagkaykaysa iti intero a lubong saan a mapasamak gapu iti panangbalbaliw ti tao iti ekonomia. Ti laeng sangalubongan a gobierno nga iturayan ti “Prinsipe ti Kappia” ti makaaramid iti kasta.​—Isaias 9:6, 7.

Dagiti agdama a kinaawan ti hustisia, a masansan a maigapu iti kinapanglaw ken panangabuso iti pannakabalin, saanto nga ipalubos ti Prinsipe ti Kappia. Ikari ti Biblia: “Amin nga ar-ari agrukbabdanto iti saklangna; amin a nasnasion agserbidanto kenkuana. Ta ispalennanto ti makasapul intono umkis, ken ti napanglaw nga awan mangarayat kenkuana. Subbotennanto dagiti kararuada iti panangirurumen ken iti panangrabsut . . . Addanto kinaruay ti bukel iti daga iti tapaw dagiti bambantay; ti bungada margaayandanto.”​—Salmo 72:11, 12, 14, 16.

Mapukawto metten ti kinaawan panggedan iti sidong ti panangituray ni Kristo. Kuna ni mammadto nga Isaias: “Isuda didanto mangbangon, ket sabali ti agnaed; didanto agmula ket sabali ti mangan; ta kas kadagiti al-aldaw ti maysa a kayo kastadanto dagiti al-aldaw ti ilik, ket dagiti pinilik agragsakdanto iti mabayag iti aramid dagiti im-imada.” (Isaias 65:22) Rabakem, amin nga adda ditoy daga makaaramiddanto iti makagunggona ken makapnek a trabaho!

Pudno a Panagkaykaysa​—Kaano?

Ngem kaanonto ti panangrugi ti panagturay ni Kristo iti daga? Idi sinungbatan ni Jesu-Kristo dayta a saludsod, impatuldona a mailasin ti tiempo babaen kadagiti gubat, damdamag ti gubat, sakit, ginggined, ken dadduma pay a pasamak. Ngem, impatuldona met ti positibo nga aspeto​—ti pannakaikasaba ti naimbag a damag ti Pagarian ti Dios iti intero a lubong. (Mateo 24:3-14; Lucas 21:11) Kinuna ni Jesus a ti tampok dagitoy a pasamak isu ti “dakkel a rigat” a mangyeg iti naan-anay a panagbalbaliw ti panangituray iti daga. (Mateo 24:21) Basaem ti diskursona a nailanad iti Mateo kapitulo 24 ken Lucas kapitulo 21. Idiligmo dagiti kasasaad nga impadtona iti mapaliiwmo iti lubong. Nalawag a makitam nga agbibiagtayon iti bisperas ti ibaballaet ti Dios iti panangituray ti tao. Ti Pagarianna, nga iturayan ni Jesu-Kristo, sublatennanto ti panangituray. Asidegen nga agkaykaysa ti lubong!

Adda pay saludsod, Ania ngarud ti aramidem tapno makitam a matungpal daytoy a kari? Tangay napateg ti paset ti Biblia iti panangnamnama ti sangatauan iti masanguanan, nainsiriban nga ikagumaam nga adalen a naimbag ti Biblia. Maragsakan ngarud dagiti Saksi ni Jehova a sumarungkar iti pagtaengam tapno libre nga iyadalandaka iti Biblia.a No patgam daytoy nga awis, mabiiten a makitam ti dandanin a panagkaykaysa ti lubong ket mabalinmo met ti makiraman iti dayta!

[Footnote]

[Dagiti ladawan iti panid 8, 9]

Iti intero a lubong, sagsagrapen dagiti Saksi ni Jehova ti nakaskasdaaw a panagkaykaysa

Kiev, Ukraine

Zagreb, Croatia

[Ladawan iti panid 10]

Panggep ti Dios a ti sangatauan ket agbalin a nagkaykaysa a sangalubongan a pamilia