Ania ti Maisuro ti Tumatayab iti Balud?

BABAEN TI KORESPONSAL TI AGRIINGKAYO! IDIAY SOUTH AFRICA

SIGUN iti Sunday Tribune ti Durban, South Africa, tumultulong dagiti tumatayab a mangpalukneng iti puso dagiti balud idiay Pollsmoor Prison. Iti agdama, 14 a balud ti makipaspaset iti programa a pakataraknan dagiti tumatayab a cockatiel ken lovebird kadagiti seldada.

Kasano ti panagkurri ti programa? Adda temporario nga incubator iti selda ti tunggal makipaspaset a balud. Maipataraken iti balud ti maysa a kappessa. Subbuanna ti awan gawayna a bassit a parsua iti kada maysa wenno dua nga oras, iti aldaw ken rabii, iti agarup lima a lawas. Kalpasanna, maitangkal ti tumatayab, iti uneg met laeng ti selda. Inton dakkelen ti tumatayab, mailako dayta iti publiko. Nagbalinen a nadekket unay ti dadduma a balud kadagiti tarakenda ta uray la a makasangitda no dumtengen ti di maliklikan a panagsinada.

Simmingpet ken timmanang uray ti dadduma kadagiti napeklan a kriminal kalpasan ti inaldaw a pannakisarita ken panagtarakenda kadagiti tumatayab. Kinuna ti maysa a balud: “Agpapaamoak kadagiti tumatayab, ngem pinaamodak met.” Kinuna met ti maysa a dagiti tumatayab ti nangisuro kenkuana nga aganus ken agteppel. Kuna ti maysa a balud gapu iti panagtakaw a ti panagtaraken iti tumatayab ti nangipabigbig kenkuana a ti panagbalin a nagannak “ket dakkel a responsabilidad”​—maysa a banag a naliwayanna nga inaramid kadagiti mismo nga annakna idi saan pay a naibalud.

Adda pay nagimbagan ti panangaywan dagiti balud kadagitoy a tumatayab. “Babaen kadagiti paglaingan a masursuroda ditoy,” kuna ti nangilungalong iti programa a ni Wikus Gresse, “makastrekdanto iti trabaho a kadua dagiti agtartaraken ti billit wenno beterinario inton mawayawayaanda.”