Ti Panangmatmat ti Biblia

Agbalbaliw Aya ti Dios?

DINESKRIBIR ti antropologo a ni George Dorsey ti Dios iti “Daan a Tulag” kas “nadangkok a Dios.” Kinunana pay: “Ni Yahweh ket . . . naan-anay nga awanan iti ayat. Isu ti Dios dagiti managsamsam, manangtutuok, mannakigubat, manangparmek.” Umasping iti dayta ti konklusion ti dadduma maipapan iti Dios iti “Daan a Tulag”​—ni Yahweh, wenno Jehova. Gapuna, pampanunoten ti dadduma iti kaaldawantayo no agpayso a naulpit a Dios ni Jehova a binalbaliwanna idi agangay ti galadna tapno agbalin a naayat ken naasi a Dios iti “Baro a Tulag.”

Saanen a baro ti kasta a kapanunotan maipapan iti Dios iti Biblia. Ni Marcion ti damo a nangpataud iti dayta a kapanunotan idi maikadua a siglo K.P. Isut’ kaasping ti maysa a Gnostico wenno daydiay mamati a dakes amin a banag ket ti laeng adda pakainaiganna iti espiritu ti naimbag. Inlaksid ni Marcion ti Dios iti “Daan a Tulag.” Imbilangna dayta a Dios a naranggas ken managibales, naulpit ngem mangitukon kadagiti material a gunggona kadagiti agdaydayaw kenkuana. Iti kasumbangirna, dineskribir ni Marcion ti Dios iti “Baro a Tulag”​—kas impalgak ni Jesu-Kristo​—a perpekto a Dios, Dios a napnuan ayat ken asi, managparabur ken manangpakawan.

Agtignay ni Jehova iti Nadumaduma a Kasasaad

“Pagbalinenna” ti kayulogan ti mismo a nagan ti Dios a Jehova. Kaipapanan daytoy a pagbalinen ni Jehova ti bagina a Manangtungpal iti amin a karina. Idi inimtuod ni Moises iti Dios ti naganna, pinalawa ni Jehova ti kaipapananna iti kastoy a wagas: “Agbalinakto no anianto ti pagbalinak.” (Exodo 3:14, NW) Kastoy ti kuna ti patarus ni Rotherham: “Agbalinakto sigun iti pagbalinakto.”

No kasta, ikeddeng wenno paneknekan ni Jehova ti pagbalinanna, aniaman ti kasapulan tapno maitungpal dagiti nalinteg a panggep ken karina. Maysa a pammaneknek iti daytoy ti kinapudno nga isut’ addaan iti adu a titulo ken mangiladawan a termino: Ni Jehova dagiti buybuyot, Ukom, Soberano, Managimon, Soberano nga Apo, Namarsua, Ama, Naindaklan nga Instruktor, Pastor, Managdengngeg iti kararag, Mannubbot, naragsak a Dios, ken adu pay. Amin dagitoy​—ken adu pay nga amang​—ti panggepna a pagbalinan tapno maibanagna dagiti naayat a panggepna.​—Exodo 34:14; Oc-ocom 11:27; Salmo 23:1; 65:2; 73:28; 89:26; Isaias 8:13; 30:20; 40:28; 41:14; 1 Timoteo 1:11.

Kayat kadi a sawen daytoy nga agbalbaliw ti personalidad ti Dios wenno dagiti pagalagadanna? Saan. Maipapan iti Dios, kuna ti Santiago 1:17: “Kenkuana awan ti panagbaliw ti pagturongan ti anniniwan.” Kasano nga agtignay ti Dios iti nadumaduma a kasasaad idinto ta isu a mismo ket saan nga agbalbaliw?

Ti ehemplo ti nadungngo a nagannak a mangibaklay iti nadumaduma a rebbengen para iti annakda ti mangyilustrar no kasano a posible daytoy. Iti maysa la nga aldaw, makapagbalin ti ama wenno ina kas para luto, agtagibalay, elektrisian, nars, gayyem, mamagbaga, mannursuro, manangdisiplina, ken nagadu pay. Saan nga agbalbaliw ti personalidad ti ama wenno ina no aramidenna dagitoy a rebbengen; makibagay laeng kadagiti rumsua a kasasaad. Kasta met laeng ni Jehova ngem iti nasaksaknap nga amang a wagas. Awan ti pagpatinggaan ti kayatna a pagbalinan tapno maitungpal ti panggepna ken magunggonaan dagiti parsuana.​—Roma 11:33.

Kas pagarigan, naipalgak a ni Jehova ket Dios ti ayat ken asi agpadpada iti Hebreo ken Kristiano a Griego a Kasuratan. Kastoy ti inyimtuod ni mammadto Mikias idi maikawalo a siglo K.K.P. maipapan ken Jehova: “Siasino ti Dios a kas kenka, maysa a mamakawan iti biddut ken mangpalabas iti salungasing ti natda iti tawidna? Sigurado a saannanto a taginayonen ti ungetna iti agnanayon, ta isu maragsakan iti naayat a kinamanangngaasi.” (Mikias 7:18, NW) Umasping iti dayta, insurat ni apostol Juan dagiti nalatak a sasao: “Ti Dios ket ayat.”​—1 Juan 4:8.

Iti kasumbangirna, iti Hebreo ken Griego a Kasuratan, nayam-ammo ni Jehova kas ti nalinteg nga Ukom kadagidiay maulit-ulit, naan-anay, ken di agbabbabawi a manglabsing kadagiti lintegna ken mangdangran iti sabsabali. ‘Amin dagidiay nadangkes talipuposento ni Jehova,’ kinuna ti salmista. (Salmo 145:20, NW) Umasping iti dayta, kuna ti Juan 3:36: “Ti mangwatwat iti pammati iti Anak adda agnanayon a biagna; ti sumukir iti Anak saannanto a makita ti biag, ngem agtalinaed kenkuana ti pungtot ti Dios.”

Di Agbalbaliw Dagiti Galadna

Saan a nagbalbaliw ti personalidad ken dagiti kangrunaan a galad ni Jehova nga isu ti ayat, kinasirib, kinahustisia, ken pannakabalin. Imbagana iti ili nga Israel: “Siak ni Jehova; saanak a nagbaliw.” (Malakias 3:6, NW) Naibaga daytoy ag-3,500 a tawenen kalpasan ti panangparsua ti Dios iti sangatauan. Kas pammaneknek iti kinapudno dayta a kinuna ti Dios, maam-ammotayo no adalentayo a naimbag ti Biblia ti maysa a Dios a saan nga agbalbaliw dagiti pagalagadan ken galadna. Saan a nagbalbaliw ti personalidad ni Jehova a Dios iti panaglabas ti adu a siglo, tangay di kasapulan a balbaliwanna dayta.

Ti natibker a panangitandudo ti Dios iti kinalinteg, kas naipalgak iti intero a Biblia ti saan a namagbalin iti ayatna a basbassit wenno dakdakkel ngem idi nangrugi ti pannakilangenna kadagiti tattao idi unana idiay Eden. Kinaagpaysuanna, ti panagduduma iti personalidadna a kasla naiparangarang iti nadumaduma a paset ti Biblia ket nadumaduma nga aspeto ti isu met la a di agbalbaliw a personalidadna. Daytoy ket gapu iti nadumaduma a kasasaad ken tattao a nakilangenanna, nga agkasapulan iti nadumaduma a kababalin wenno relasion.

No kasta, nalawag nga ipakita dagiti Kasuratan a saan a nagbalbaliw ti personalidad ti Dios iti panaglabas dagiti siglo ken saanto nga agbalbaliw iti masakbayan. Ni Jehova ti kangrunaan a personipikasion ti di panagbalbaliw ken panagtutunos. Kanayon a mapangnamnamaan ken mapagtalkan. Mabalintayo ti kanayon nga agpannuray kenkuana.

[Dagiti ladawan iti panid 16, 17]

Ti isu met la a Dios a nangdadael iti Sodoma ken Gomorra . . .

. . . ti mangparsua iti nalinteg a baro a lubong