Nainkalintegan Aya ti Ebolusion?
ITI kaaldawantayo, ibagbaga dagiti mangitantandudo ti teoria ti ebolusion a pudno dayta. Ngem kasanot’ kinanainkalintegan dagiti masansan a rasonda? Amirisem ti sumaganad.
Ti seda a patauden dagiti lawwalawwa ti maysa kadagiti naammuan a kalagdaan a material. Sigun iti New Scientist, “mabennat ti tunggal linabag iti 40 a porsiento iti kaatiddogna ken maminggasut ti maawitna a dagsen ngem di maputed a kas iti landok.” Kasano a maaramid daytoy nakaskasdaaw a seda? Lumasat ti protina a napigket a likido iti babassit nga urat iti bagi ti lawwalawwa, ket agbalin dayta a solido a sinulid babaen ti pannakabalbaliw dagiti molekula ti protina nga adda iti dayta, kuna ti Encyclopædia Britannica.
Kastoy ti komento ti New Scientist: “Adda patauden ti lawwalawwa a pamay-an a nasaysayaat nga amang ngem dagidiay pamay-an ti uray kalainganen a kemiko.” Nakappapati kadi nga adda nakarikrikut a pamay-an ti panagpataud ti lawwalawwa a masapul a masursuronto pay laeng ti tao?
Kuna ti artikulo iti The Wall Street Journal, nga insurat ni Phillip E. Johnson, maysa a propesor iti abogasia iti University of California, a kurang dagiti ebidensia iti ebolusion ngem masansan a rabrabaken pay la dagidiay mangsupsuportar iti dayta dagidiay agkuestion. Agkomento ti artikulo: “Awan ti umdas nga ebidensia ti teoria ti ebolusion—ngem di awaten dagiti mangitantandudo iti dayta ti napudno a panangsupiat a mabalin a mangpakapuy iti opinionda.”
Maysa pay a pagarigan a mangipakita a di nainkalintegan ti opinion ti ebolusion ket adda pakainaiganna kadagiti mula. Nakakali dagiti sientista nga agsuksukimat idiay Morocco iti 150 a timmangkenen nga archaeopteris, “ti kaasitgan pay laeng a natakuatan a kakikita dagiti agpataud iti bukel nga immuna a mula, a nagtaudan ti kaaduan a kayo iti kaaldawantayo,” kuna ti The Daily Telegraph iti London. Kuna ti editor ti periodiko ti siensia a daytoy a mula “adda pasetna a nangsukog iti moderno a lubong babaen ti panangpatanorna kadagiti bulong ken sangsanga.” Ti “panangpatanor” kayatna a sawen “panangpartuat babaen iti panunot.” Nainkalintegan ngata a kunaentayo a kabaelan ti maysa a mula ti agpanunot ken agpartuat?
Maysa kadagiti kasiriban a tao a ni Solomon, balakadannatayo a ‘saluadantayo dagiti pannakabael nga agpanunot,’ agpanunottayo a mismo. Nangnangruna pay nga aramidentayo dayta iti kaaldawantayo.—Proverbio 5:2, NW.