Ti Kaunaan​—Sangagasut a Tawen ti Napalabasen

Opisial a nairekord ti legal a karta ti Watch Tower Bible and Tract Society idiay Pennsylvania, E.U.A., idi Disiembre 15, 1884.a Sadiay a naipasdek ti hedkuarter daytoy a sosiedad. Idi agangay, nagatang ti sanikua para iti kaunaan a sanga nga opisina idiay London, England idi Abril 23, 1900. Masarakan idi dayta idiay 131 Gipsy Lane, Forest Gate, iti Makindaya a London, kas makita ditoy.

IDI naipasdek dayta a kaunaan a sanga sangagasut a tawen ti napalabasen, ti England ket addaan iti dagup a 138 nga Estudiante ti Biblia, kas pangawag idi kadagiti Saksi ni Jehova. Dua a tawen kalpasanna, idi 1902, nalukatan ti maikadua a sanga idiay Alemania; ket idi 1904, naipasdek ti dadduma pay a sanga idiay Australia ken Switzerland.

Idi 1918, ti tawen a nagpatingga ti Gubat Sangalubongan I, addan 3,868 nga Estudiante ti Biblia a mangirepreport iti trabahoda a panangasaba iti intero a lubong. Iti simmaganad a tawen, naipasdek idiay Canada ti maikalima a sanga ti Watch Tower Society. Kalpasanna, bayat a rimmang-ay ti pannakaikasaba ti mensahe ti Biblia, nalukatan dagiti baro a sanga iti adu pay a pagilian, innem idi laeng 1921.

Idi inawat dagiti Estudiante ti Biblia ti naibasar Biblia a nagan a dagiti Saksi ni Jehova idi 1931, addan 40 a sanga nga opisina iti intero a lubong. (Isaias 43:10-12) Bayat ti simmaganad a tallo a tawen, immadu ti bilang agingga iti 49! Idi 1938, addan kangatuan a bilang a 59,047 a Saksi a mangaskasaba iti 52 a pagilian, ngem idi metten a nangrugi ti nabara nga ibubusor a namagpeggad iti Nakristianuan a trabahoda iti adu a lugar.

Bayat a nagsaknap ti totalitariano ken diktadura a turay iti nadumaduma a pagilian sa nangrugi ti Gubat Sangalubongan II idi Setiembre 1939, naiserra ti sangsanga nga opisina dagiti Saksi ni Jehova iti adu a pagilian. Idi 1942, 25 laengen ti agan-andar. Ngem nakaskasdaaw ta bayat dayta a kadawelan a gubat iti historia ti tao, nagtalinaed nga aktibo dagiti Saksi ni Jehova iti intero a lubong ken sinagrapda ti maysa kadagiti kadakkelan nga irarang-ayda iti moderno a historia.

Uray no malmalpasen ti Gubat Sangalubongan II idi 1945​—ken adu a paset ti lubong ti nadadael​—nalukatan manen ti sangsanga dagiti Saksi ken naipasdek dagiti baro. Idi 1946, addan 57 iti intero a lubong. Ket mano idi ti aktibo a Saksi? Adda kangatuan a bilang a 176,456! Daytat’ dandani mamitlo a daras nga ad-adu ngem idi 1938!

No Kasano a Napalawa Dagiti Immuna a Sanga

Idi 1911, ti kaunaan a sanga ti Watch Tower Society idiay London, England, ket nayakar idiay 34 Craven Terrace, nga ayan ti nalawlawa nga opisina ken pagtaengan. Kalpasanna idi Abril 26, 1959, naidedikar dagiti baro a pasilidad ti sanga idiay Mill Hill, London. Idi agangay, napadakkel dagiti pagtaengan ket kamaudiananna (idi 1993), naidedikar ti 18,500 metro kuadrado a pagimprentaan ken administratibo a pasdek iti asideg. Ditoy a tinawen a maar-aramid ti nasurok a 90 a milion a kopia Ti Pagwanawanan ken Agriingkayo! iti 23 a pagsasao.

Lallalo a naisangsangayan ti pannakapalawa ti maikadua a sanga ti Sosiedad. Idi 1923, nayakar idiay Magdeburg ti sanga ti Alemania. Ti Pagwanawanan a Hulio 15, 1923 ti damo a nayimprenta kadagiti mismo a pagimprentaan sadiay a kukua ti Sosiedad. Iti simmaganad a sumagmamano a tawen, nagatang dagiti asideg a sanikua, naibangon dagiti kanayonan a pasdek, ket nagatang dagiti alikamen a pagdait ken pagaramid iti libro agraman ti dadduma pay a pagimprentaan. Idi 1933, ti sanga ket kinompiskar dagiti Nazi, naparitan dagiti Saksi sa idi agangay, dua a ribu kadakuada ti naipan kadagiti kampo a pagbaludan.

Idi nagpatingga ti Gubat Sangalubongan II idi 1945, naisubli ti sanikua idiay Magdeburg, a paset idi ti Makindaya nga Alemania, isu a naipasdek manen ti sanga. Ngem idi Agosto 30, 1950, dagiti pasilidad ket sinerrek ti polisia dagiti Komunista sada inaresto dagiti trabahador, ket naparitan dagiti Saksi idiay Makindaya nga Alemania. Kabayatanna, adda sanikua a nagatang idiay Wiesbaden, Makinlaud nga Alemania idi 1947. Iti simmaruno nga adu a dekada, namin-adu a napadakkel dagiti pasdek ti sanga sadiay tapno maidanggay iti iyaadu dagiti kasapulan a literatura.

Agsipud ta awanen ti espasio tapno mapalawa dagiti pasilidad idiay Wiesbaden, adda 30 nga ektaria a nagatang idiay asideg ti Selters idi 1979. Kalpasan ti agarup lima a tawen a panagibangon, naidedikar ti dakkel a sanga idi Abril 21, 1984. Datin a napalawa tapno mabalin a pagdagusan ti nasurok a sangaribu a trabahador iti sanga. Kada bulan, nasurok a 16 a milion a magasin iti nasurok a 30 a pagsasao ti mayimprenta kadagiti nagdadakkel a pagimprentaan idiay Selters; ket iti maysa a napalabas a tawen, nasurok a 18 a milion a libro, agraman Biblia ti naaramid ti bindery.

Dadduma Pay a Dadakkel a Sanga a Pagimprentaan

Maysa a sanga ti naipasdek idi damo idiay Kobe, Japan, idi 1927, ngem ti nakaro a pannakaidadanes dagiti Saksi idi Gubat Sangalubongan II ti nanglapped iti trabahoda. Ngem di nagbayag kalpasan ti gubat, naipasdek manen ti sanga idiay Tokyo. Idi awanen ti espasio a mausar iti panangpalawa sadiay, adda baro a sanga a naibangon idiay Numazu. Naidedikar dayta idi 1973. Idi nagbiit nga immilet dagitoy a pasilidad, naibangon ti daddadakkel a pasdek idiay Ebina, ket naidedikar dagitoy idi 1982. Nabiit pay a nairingpas dagiti napalawa a pasilidad iti daytoy a disso a mabalin a pagdagusan ti 900 a trabahador. Iti laengen pagsasao a Hapones, nasurok a 94 a milion a kopia Ti Pagwanawanan ken Agriingkayo! ti nayimprenta idi 1999, malaksid iti minilion a libro.

Padapada a napalawa dagiti pasilidad ti sanga iti nadumaduma a pagilian. Adda sanga a naipasdek idiay Mexico City, Mexico, idi 1929. Ket idi nakadanonen iti 60,000 ti bilang dagiti Saksi, nabangon ti maysa a naglawa a pasilidad iti ruar ti siudad. Naidedikar idi 1974, ket nairingpas dagiti kanayonanna idi 1985 ken 1989. Ita, asidegen a malpas ti baro a dakkel a pagimprentaan ken kanayonan a pagtaengan. Gapu iti dayta, mapadaguston ti sanga ti Mexico ti 1,200 a trabahador. Madaman a mangipapaay ti sanga kadagiti magasin ken libro para iti nasurok a 500,000 a Saksi ken minilion a dadduma pay a tattao idiay Mexico agraman kadagiti agnanaed iti kabangibang a pagpagilian.

Idi 1923, naorganisar ti sanga nga opisina idiay Rio de Janeiro, Brazil, ket idi agangay, nabangon sadiay ti nagpipintas a baro a pasdek. Ngem tangay ti São Paulo ti sentro iti negosio ken transportasion idiay Brazil, adda baro a sanga a naibangon iti dayta a siudad idi 1968. Idi ngalay ti dekada 1970, addan agarup 100,000 a Saksi idiay Brazil. Nupay kasta, saanen a mabalin ti mangpalawa idiay São Paulo, isu a nagatang ti 115 nga ektaria idiay Cesário Lange, agarup 150 a kilometro iti ruar ti São Paulo. Naidedikar dagiti pasilidad ti sanga iti dayta a baro a lugar idi Marso 21, 1981. Gapu iti pannakapalawa daytoy a disso, mapadagusen ti sanga ti agarup 1,200 a tattao. Mapatpataud dagiti magasin ken libro idiay Brazil para iti kaaduan a paset ti Abagatan nga America agraman iti dadduma pay a paset ti lubong.

Nairingpasen ti maysa pay a dakkel a pagimprentaan idi rugrugi ti dekada 1990 idiay asideg ti Bogotá, Colombia. Sadiay a maar-aramid dagiti magasin a Pagwanawanan ken Agriingkayo! tapno maiwaras iti intero a makin-amianan a laud ti Abagatan nga America.

Ti dadduma pay a sanga nga agim-imprenta iti minilion a magasin iti kada tawen ket adda idiay Argentina, Australia, Canada, España, Finland, Italia, Korea, Nigeria, Pilipinas, ken South Africa. Iti kada tawen, agpatpataud met ti sanga idiay Italia iti minilion a libro, agraman Biblia iti adu a pagsasao. Siempre, kaaduan kadagiti tinawen a mayimprenta nga agdagup iti nasurok nga 40 a milion a libro ken nasurok a maysa a bilion a magasin, ket maar-aramid pay laeng idiay hedkuarter ti Watch Tower Bible and Tract Society idiay Brooklyn, New York, agraman iti pagimprentaanna iti makin-amianan a paset ti New York.

Talaga a naisangsangayan ti iyaadu ti bilang dagiti sanga nga opisina. Sangagasut a tawenen ti napalabas, maysa laeng idi ti sanga nga opisina, ngem ita addan 109 a mangipapaay iti kasapulan dagiti Saksi ni Jehova iti 234 a pagilian. Ket rabakenyo, adda 13,000 a dedikado a Kristiano a boluntario nga agserserbi kadagitoy! Sigurado a napateg ti trabahoda agraman ti ar-aramiden ti ag-5,500 a boluntario iti hedkuarter ti Sosiedad iti kaitungpalan ti padto ni Jesu-Kristo a ‘daytoy naimbag a damag ti pagarian ti Dios maikaskasabanto iti intero a mapagnaedan a daga sakbay nga umay ti panungpalan.’​—Mateo 24:14.

[Footnote]

[Ladawan iti panid 17]

Ni Tom Hart, ti maipagarup a kaunaan nga Estudiante ti Biblia idiay England

[Dagiti ladawan iti panid 18]

Ti sanga sadi London idiay 34 Craven Terrace (iti makinkannawan a retrato)

[Dagiti ladawan iti panid 18]

Dagiti pasilidad a madama a maus-usar idiay London