Ti Balitok a Nangyakar Kadagiti Bantay
Babaen ti mannurat ti Agriingkayo! idiay España
“Adda naporma iti bantay a kasla katedral a pila nga aduan iti tapaw. Ti balitok ken ti Roma ti makimbasol iti daytoy. Napakawandan gapu iti panaglabas ti panawen ken gapu iti kinapintas dagiti bantay.”—Pedro García Trapiello.
ITI amianan a laud ti España, adda karkarna ti pannakaurnosna a batbato a nasukog iti bimmalitok a sandstone. Gapu iti nagadu ken narangpaya a puon ti chestnut, kasla dagiti natural a puersa ti makinggapuanan kadagiti derraas ken nagngangato a torre. Ti sagpaminsan laeng a pannakalukat ti pagserkan nga agturong iti usok ti mangipalgak iti kadaanan a palimed. Ditoy, iti lugar a maawagan Las Médulas, ti ayan idi ti kadakkelan a pagminasan iti balitok ti Imperio ti Roma.
Kanayon a makaay-ayo ti balitok, isu a nagreggetan dagiti tattao a gun-oden dayta. Deskribiren ti Job a libro iti Biblia no kasano a nagkali ti tattao kadagiti usok dagiti pagminasan, kinalida ti sakaanan dagiti bantay, sada inabutan dagiti bato gapu iti panagbirokda iti balitok, pirak, ken agkakapateg a batbato rinibu a tawenen ti napalabas.—Job 28:1-10.
Maipatpateg pay laeng ti balitok ginasut a tawen kalpasanna, idi inturayanen ti Roma ti lubong. Kayat idi ni Emperador Augustus a natalged ti ekonomia, ket ti pirak a denario ken ti balitok nga aureo dagiti mapagpannurayan a sensilio a kasapulanna tapno mapadur-as ti komersio iti Roma. Siempre, tapno maaramid ti umdas a kaadu dagiti sensilio, kasapulanna ti balitok ken pirak. Gapuna, kalpasan a dimteng dagiti manangparmek a buyot ti Roma, simmaruno a dagus dagiti para sapul iti balitok.
Idi naparmek met laengen dagiti buyot ti amianan a laud ti España, di nagbayag sakbay a nangrugi ti Kadawyan a Panawen, natakuatanda dagiti baro a reserba a balitok. Nakalkaldaang ta ti napateg a metal ket adda iti uneg ti panaraten a daga ti bantay, ket narigat a kalien ti balitok kadagitoy. Kasapulan idi ti dua ket kagudua a siglo a panagbannog ken panagling-et tapno makali ti nalmeng a gameng.
Ngem nagporsegi dagiti Romano. Nalaka ti tangdan dagiti obrero, ket mabalin nga agballigi dagiti pamay-an ti panagminas idi a panawen—nupay narigat. Planoda nga alaen ti balitok babaen ti in-inut a panangtebbagda iti bantay. Tapno maibanag ti kalatda, nagaramidda iti nasurok a 50 a kanal, sumagmamano a dadakkel a pagurnongan ti danum iti ngatuen ti kabambantayan, sada nagkali iti ginasut a kilometro nga usok.
Kalpasan a naaramid ti nagsasanga nga usok iti uneg ti maysa a paset ti bantay, linayus dagiti inheniero dagitoy. Adu a tonelada a daga ti nayanud gapu iti naapres a danum. Nayanud iti arisadsad ti bantay ti nalaokan iti balitok a darat ken bato. Sadiay a naarisit ti balitok manipud iti graba babaen ti panangyakayak. Kalpasanna, naulit ti intero a proseso, babaen ti panangaramid iti sabali manen a grupo dagiti usok.
Makagunggona met la kadi ti panagbannogda? Inan-anusan dagiti Romano nga innala ti agarup 800 a tonelada a balitok manipud Las Médulas. Tapno maalada amin dayta a balitok, rinibu a trabahador ti literal a nangyakar kadagiti bantay—nasurok a walo a bilion a kubiko pie a daga. Ket iti tunggal sangapulo a tonelada ti daga a nakalida, nakaalada iti 30 a gramo a balitok.
Kadagitoy nga aldaw, bassit laengen malaksid kadagiti usok ken dagiti nagkalian ti nabati iti natebbag a bantay, a nagreggaayen ken napno itan ti kabakiran iti pinuon ti chestnut. Iti kasupadina, napapaut nga amang dagitoy nasam-it a chestnut nga insangpet dagiti Romano ditoy España ngem iti balitok.
[Ladawan iti panid 22]
Balitok a sensilio (aureo) a nakaikitikitan ti ulo ni Emperador Augustus
[Ladawan iti panid 23]
Las Médulas, ti lugar ti kadakkelan idi a pagminasan iti balitok iti Imperio ti Roma
[Ladawan iti panid 23]
Paset ti kadaanan a nagsasanga nga usok
[Picture Credit Line iti panid 23]
Amin a sensilio: Musée de Normandie, Caen, Francia