Dagiti Rag-o iti Panagbuya Kadagiti Tumatayab

ANIAN a naiduma ti lubong no awan dagiti tumatayab! Dagiti uni, kanta, nadumaduma a kolor ken panagtayabda​—makaipaayda amin iti napintas a kinanadumaduma ti biag. Ngem kasano kasansan ti panagsardengtayo tapno denggen ken paliiwen ida? No agnanaedka iti siudad a nalikmut iti kumaribuso a kasasaad ti inaldaw a panagbiag ken ti kinaungor dagiti lugan, mabalin a saanmo man la a madlaw dagiti tumatayab iti sangakaarrubaam. Uray no agnanaedka iti away, nalaka laeng ti di panangikankano kadakuada. Ngem kayatmo kadi a makita iti asideg dagiti tumatayab iti lugarmo?

Maaramidam dayta babaen laeng ti panangikabilmo iti paginuman wenno panganan ti tumatayab iti arubayam. Ikabilmo dayta iti disso a kalkalainganna ti kaadayona manipud iti tawa. Kalpasanna, kasapulam laeng ti largabista ken kamera nga addaan iti lens a mapadakkelna a naimbag dagiti adayo a banag iti panagkitam​—ken bassit nga anus! Gumatangka iti adu a high-speed film ken ti nasayaat a libro a mangyilustrar iti nadumaduma a tumatayab tapno mailasinmo ida. Kalpasanna, agbuya, dumngeg, ken agrag-oka!