Agimtuod Dagiti Agtutubo . . .

Denggento Ngata ti Dios Dagiti Kararagko?

“Mabalinko nga ikararag ti amin a banag agsipud ta gayyemko ni Jehova, ket ammok a tulongannak no adda problemak.”​—Andrea.

SIGURADO ti agtutubo a ni Andrea a denggen ti Dios dagiti kararagna. Ngem saan a kasta ti panagrikna ti amin nga agtutubo. Adayo unay ti rikna ti dadduma nga agtutubo iti Dios isu a bumdengda nga agkararag kenkuana. Mabalin a pagduaduaanda pay ketdi no interesado met laeng ti Dios kadakuada tapno makagunggona ti panagkararagda.

Ania ti sekreto iti panagkararag? Iti simple a pannao, isu ti kaadda ti pudno a pannakigayyem iti Dios. Inkararag ti salmista: “Agtalekto kenka dagidiay makaam-ammo iti naganmo.” (Salmo 9:10) Sika ngay? Am-ammom kadi a naimbag ti Dios ken agtalekka a denggenna dagiti kararagmo? Sakbay nga ituloymo ti agbasa, pangngaasim ta sungbatam dagiti saludsod iti kahon a napauluan “Kasano Kauneg ti Pannakaammom iti Dios?” Mano ngata ti masungbatam?

KASANO KAUNEG TI PANNAKAAMMOM ITI DIOS?

1. Ania ti nagan ti Dios, ket ania ti kaipapananna dayta?

2. Ania ti isuro ti Biblia maipapan iti uppat a kangrunaan a galad ti Dios?

3. Ania ti kangrunaan nga ebkas ti panagayat ti Dios iti sangatauan?

4. Kasanotay a matagiragsak ti pannakigayyem iti Dios?

5. Ania koma ti nasken a kababalintayo no agkararagtayo?

Uray kadi kaskasano ket adda sumagmamano a nasungbatam, sakbay nga ituloymo a basaen ti nabatbati a paset daytoy nga artikulo? No kasta, ad-adun ti ammom maipapan iti Dios ngem iti kaaduan a tattao. Ngem mabalin a dagiti sungbatmo ti pakaammuam a masapul nga ad-adu pay ti kasapulan a maammuam maipapan kenkuana tapno nasingsingedka kenkuana. (Juan 17:3) No kastat’ pampanunotem, usigem ti sumagmamano nga isursuro ti Biblia maipapan iti “Managdengngeg iti kararag.”​—Salmo 65:2.

Ti Dios ket Maysa a Pudno a Persona

Umuna, tulongannatayo ti Biblia a mangtarus a ti Dios ket saan a basta puersa. Isut’ maysa a persona nga addaan nagan a Jehova. (Salmo 83:18) Iti Hebreo, “Pagbalinenna” ti kaipapanan dayta a nagan. Isut’ makapagbalin nga aniaman a nasken a pagbalinanna tapno maibanag ti panggepna. Saan a maaramidan dayta ti basta nagpupunipon a puersa! Isu a no agkararagka, masiertom a saanka a makisarsarita iti di masinunuo a puersa wenno angin. Makisarsaritaka iti maysa a persona nga agpadpada a makangngeg ken mangipangag kadagiti kararagmo.​—Efeso 3:20.

Isu a maikuna ti agtutubo a ni Diana: “Ammok a sadinoman ti ayanko, dumngegto kaniak ni Jehova.” Tapno tumanor ti kasta a panagtalek, masapul a napaypayso ti Dios kenka! “Ti umadani iti Dios masapul a patienna nga isu adda,” kuna ti Biblia.​—Hebreo 11:6.

Gubuayan ti Sirib ken Pannakabalin

Talaga a matulongannatayo ti Dios agsipud ta makapaamanga ti pannakabalinna. Awan limitasion dayta a pannakabalin, kas paneknekan ti kadakkel ken kinarikut ti pisikal nga uniberso. Sigun iti Biblia, ammo ni Jehova ti nagan ti tunggal bituen​—uray no binilbilion dagitoy! Saan la a dayta, isu ti gubuayan ti amin nga enerhia nga adda kadagidiay a bituen. (Isaias 40:25, 26) Saan kadi a nakaskasdaaw dayta? Ngem nupay nakaskasdaaw dagitoy a kinapudno, kunaen ti Biblia a “dagitoy ket pamalatpatan laeng ti pannakabalinna”!​—Job 26:14, Today’s English Version.

Laglagipem met nga awan ti limitasion ti kinasirib ni Jehova. Sigun iti Biblia, “nauneg unay” dagiti panunotna. (Salmo 92:5) Inaramidna ti sangatauan, isu nga ad-adda a maawatannatayo ngem ti bagitayo a mismo. (Salmo 100:3) Agsipud ta agbibiagen “manipud a mismo iti tiempo a di nakedngan agingga iti tiempo a di nakedngan,” saan a limitado ti kapadasanna. (Salmo 90:1, 2) Awan ti aniaman a dina maawatan.​—Isaias 40:13, 14.

Kasano nga us-usaren ni Jehova amin dayta a pannakabalin ken kinasirib? Kuna ti 2 Cronicas 16:9: “No maipapan ken Jehova, mapan nga agsublisubli dagiti matana iti intero a daga tapno ipakitana ti pigsana maigapu kadagidiay a ti pusoda naan-anay kenkuana.” Talaga a saanka nga agproblema a di marisut ti Dios ti parikutmo wenno dinaka a matulongan a mangdaer. Malagip ti balasitang a ni Kayla: “Itay nabiit, idi naglak-am ti pamiliak iti rigat, nagkararagak ken Jehova, ket nariknak a tinulongannak nga agibtur ken mangdaer kadagiti kasasaad, parikut, ken rikna a di maibturan ti dadduma.” No makisaritaka iti Dios, umad-adanika iti gubuayan ti sirib. Awanen ti nasaysayaat pay ngem iti dayta!

Dios ti Kinahustisia ken Ayat

Ngem kasano a maammuam no kayat ti Dios ti tumulong kenka? Agsipud ta inkeddeng ni Jehova nga iyam-ammo ti bagina, saan laeng a babaen ti kasta unay a pannakabalinna wenno ti nauneg a kinasiribna wenno ti di mabalusingsing a kinahustisiana. Imbes ketdi, maam-ammotayo ni Jehova a nangnangruna babaen ti galadna nga ayat. “Ti Dios ket ayat,” kuna ti 1 Juan 4:8. Ket gapu iti dayta dakkel nga ayatna, makapagtalektayo a sungbatanna dagiti kararagtayo. Ti kangrunaan nga ebkas ti panangayatna isut’ panangtedna iti anakna kas daton a pangsubbot tapno matagiragsaktayo ti agbiag nga agnanayon.​—Juan 3:16; 1 Juan 4:9, 10.

Agsipud ta ti Dios ket ayat, di rumbeng nga agamakka a dinaka ikankano wenno dakes ti panangtratona kenka. “Amin a daldalanna kinahustisia,” kuna ti Deuteronomio 32:4. Ti ayat ti Dios ti mangipatalged nga ipangagnaka. Daytoy ti mangiparikna a natalged ti riknatayo a mangipeksa iti kaunggan ti panunot ken riknatayo kenkuana.​—Filipos 4:6, 7.

Pannakigayyem iti Dios

Kinapudnona, aw-awisennatayo ni Jehova a makisarita kenkuana. Dina kayat ti agbalin nga estranghero kadatayo. Imbes ketdi, iti intero a pakasaritaan ti tao, aw-awisen ni Jehova dagiti tattao nga agbalin a gagayyemna. Karaman kadagidiay nangtagiragsak iti pannakigayyemda iti Dios ket dagiti lallaki ken babbai, ubbing ken natataengan, a nangparagsak iti pusona. Dagitoy ti pakairamanan dagiti tattao a kas kada Abraham, Ari David, ken ni Maria nga ina ni Jesus.​—Isaias 41:8; Lucas 1:26-38; Aramid 13:22.

Makapagbalinka met a maysa kadagiti gagayyem ni Jehova. Siempre, ti kasta a pannakigayyem dina kaipapanan a masapul a matmatam ti Dios kas maysa a genie a makasaritam laeng no adda kayatmo wenno problemam. Saan a mabalin a naisentro dagiti kararagtayo kadagiti kasapulantayo laeng. No kayattayo ti makigayyem iti Dios, masapul nga interesadotayo iti pagayatanna​—saan laeng a kadagiti pagayatantayo​—ken masapul nga agpayso nga aramidentayo ti pagayatan ti Dios. (Mateo 7:21) Isu nga insuro ni Jesus kadagiti adalanna nga ipamaysada dagiti kararagda kadagiti banag a napateg iti Dios. Kinunana: “Agkararagkayo, ngarud, a kastoy: ‘Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti daga.’” (Mateo 6:9, 10) Napnuan met koma iti panagdayaw ken panagyaman dagiti kararagtayo iti Dios!​—Salmo 56:12; 150:6.

Nupay kasta, ditay koma pulos a panunoten a nagbassit wenno awan ti kaimudingan dagiti kasapulan wenno pakaseknantayo tapno ikararagtayo. “Uray no kayatko ti agpudno kenkuana,” kuna ni Steve, “no dadduma mariknak a rumbeng a diak istorbuen ti Dios kadagiti saan unay a napateg a banag.” No kasta ti riknam, laglagipem koma ti insuro ni Jesus kadagiti pasurotna: “Saan kadi a ti lima a billit-tuleng mailako iti dua a sinsilio a bassit ti pategna? Kaskasdi awan uray maysa kadakuada ti malipatan iti sanguanan ti Dios. . . . Dikay agbuteng; napatpategkayo ngem iti adu a billit-tuleng.” (Lucas 12:6, 7) Saan kadi a makaliwliwa dayta?

Nalaka a maawatan a no ad-adu ti ammom maipapan ken Jehova, ad-adda a magutugotka nga agkararag kenkuana ken lallalo a bumileg ti panagtalekmo a matulongannaka ni Jehova ken talaga a kasta ti aramidenna. No kasta, ania ti rumbeng a kababalinmo no agkararagka iti Dios? Masapul nga agbalinka a nadayaw, napakumbaba, ken di agimbubukodan. Denggennaka ngata ti maysa a nangato nga opisial ditoy daga no napangas ken di nadayaw ti panagkiddawmo kenkuana? No kasta, dika met koma masdaaw a namnamaen ni Jehova nga agraemka kenkuana ken kadagiti pagalagadanna sakbay a sungbatanna dagiti kararagmo.​—Proverbio 15:29.

Nasursuro ti rinibu a managbuteng iti Dios nga agtutubo nga ibuksilan ti kaunggan ti pusoda iti Dios. (Salmo 62:8) “No sungbatan ni Jehova dagiti kararagko,” kuna ni Brett, “dayta ti mangparegta kaniak nga isut’ gayyemko pay laeng.” Sika ngay met? Kasano a matagiragsakmo ti kasta met la a pannakigayyem iti Dios? Kastoy ti kinuna ti dua a Kristiano nga agtutubo:

Rachel: “Tapno nasingsingedak ken Jehova, patiek a rumbeng nga adalek a sisasaet ti Saona, ket ikagkagumaak a patanoren ti panagtarigagay iti kasta a panagadal.”​—1 Pedro 2:2.

Jenny: “Patiek a no naregregtaka nga agserbi ken Jehova, nasingsingedka kenkuana.”​—Santiago 4:8.

Nautobmo kadin no kasano a talaga a makagunggona unay ti panagkararag? Kuna ti maysa a Kristiano a balasitang: “Nasingsingedak iti Dios no kasaritanak koma wenno patulodannak iti mensahe.” Tangay saannatay a sungbatan ni Jehova iti pamay-an a mangngegtayo no agkararagtayo, kasano a talaga a makatulong kadatayo ti panagkararag? Mailawlawag daytoy iti sumarsaruno a ruar.

[Kahon iti panid 27]

Dagiti sungbat iti salsaludsod iti panid 25

1. Jehova. Kaipapananna ti “Pagbalinenna.”

2. Ayat, pannakabalin, kinahustisia, ken sirib.

3. Imbaonna ti bugbugtong nga Anakna a ni Jesus tapno matay gapu kadatayo.

4. Babaen ti saan laeng a pannakaseknan iti mismo a kasapulantayo no di ket ammuentayo ti pagayatan ti Dios ken aramidentayo dayta.

5. Napakumbabatayo, nadayaw, ken ditay koma agimbubukodan.

[Dagiti ladawan iti panid 26]

Makatulong kenka ti panagadal iti Biblia ken panagsursuro manipud iti panamarsua tapno ad-adda a maam-ammom ti Dios