Manipud Kadagiti Agbasbasa

Dagiti Taaw Binasak ita nga aldaw ti serye nga “Ipalgak Dagiti Taaw ti Kangrunaan a Sekretoda.” (Nobiembre 22, 2000) Kaay-ayok ti nakaparsuaan, ngem awan unay ti ammok maipapan iti uneg ti taaw. Talaga a no ad-adu ti maammuan ti maysa a tao maipapan iti daga ken dagiti nakaskasdaaw a pasetna, ad-adda koma a pagraemanna daytoy dinamiko a planeta ken ti nakasirsirib a Namarsua iti dayta.

C. F., Italia

Pagyamanan iti daytoy makapainteres unay a serye. Kanayon idi a masmasdaawak no apay a pinarsua ni Jehova dagiti organismo a kas iti tube worm, idinto ta di ammo ti kaaduan iti sangatauan nga adda kakasta a parsua. Nagustuak ti punto a ti kaadda dagitoy a parsua ti pakakitaan a maseknan ni Jehova iti kinadalus ti daga​—pakaseknan a tuladentay met koma.

H. S., Britania

Ti panagbasa iti daytoy a serye ket kaasping ti aktual a panagpasiar iti tukok ti baybay ken panagbuya kadagiti nakaskasdaaw a banag iti unegna bayat a detalyado a mailawlawag a naimbag dayta. Ti salaysayyo ti nakatulong kaniak nga ad-adda a mangamiris kadagiti galad ti Dios a mapaneknekan kadagiti banag a pinarsuana.

J.M.M., Zambia

Daytoy ti maysa kadagiti makapainteres unay a serye a nabasak iti Agriingkayo! Mangted iti kanayonan a pammaneknek a ti masirib laeng a Persona ti nakabael a nangparsua iti planetatayo agraman ti amin a pasetna. Dagiti artikulo a kas kadagitoy ti mangpabileg iti tarigagaytayo nga agserbi iti Naindaklan a Namarsua kadatayo.

S. G., Brazil

Pimmanaw nga Amma Innem ti tawenko idi pinanawannakami ni tatangko. Agtawenak itan iti 20, ket diak pay nakita nanipud idi pimmanaw. Kanayon idi a sidsidirek ti bagik gapu iti ipapanawna ken panagriknak ket dinak ay-ayaten. Ti artikulo nga “Agimtuod Dagiti Agtutubo . . . Apay a Pinanawannakami ni Tatang?” (Nobiembre 22, 2000) ti sibabatad a nangsungbat iti amin. Pagyamanan iti pannakaawatyo iti rikrikna dagiti annak a pinanawan dagiti ammada.

K. M., Japan

Nasurok a dua a tawenen ti napalabas nanipud idi nagdiborsiokami ken ni lakayko. Inaramidko ti amin a kabaelak tapno ibuksilan kaniak ti barok ti riknana maipapan iti pannakarakrak ti pamiliami, ngem awan ti nagmamaayanna. Ita pay laeng nga inamin ti barok nga isut’ nasaktan iti panagdiborsiomi ken ni lakayko. Daytat’ nagdakkel a nagrang-ayan ti pannakikomunikarna. Masansan itan a makikomunikar. Diak mayebkas no kasano ti panagyamanko iti nagadu a tulong nga ipapaayyo kadagiti agtutubo iti amin a pakariribukanda.

D. H., Estados Unidos

Malaksid iti maysa nga ababa a kinunayo, dinakamat ti artikulo a panawan dagiti amma ti pamiliada gapu iti inaramidda a basol. Nupay kasta, umad-adu dagiti assawa a babbai a mangpampanaw kadagiti assawada. Kalpasan ti pannakiasawak iti 18 a tawen, nakilalaki ni baketko. Kapilitan a pimmanawak iti mismo a balayko. Patiek a nasken a dakamatek daytoy a paset ti problema.

L. G., Estados Unidos

Kas nakunayo, binigbigmi a panawan ti dadduma nga amma ti pamiliada gapu ta nagbasol ti asawada. Adu kadagiti prinsipio a nadakamat iti artikulo ket agaplikar met iti daytoy a kasasaad.​—ED.

Anesthesia Iti artikulo a “Nabibineg ti Dati a Naut-ot” (Nobiembre 22, 2000), kinunayo nga awan ti anesthesia sakbay dagiti tawen iti dekada 1840. Nabayagen a sibaballigi a nagopera ni Seishu Hanaoka ditoy Japan sakbay pay dagiti tawen iti dekada 1840.

S. A., Japan

Iti kaaduan, saan nga inakseptar ti gunglo ti medisina ti panagusar iti anesthesia sakbay dagiti tawen iti dekada 1840. Nupay kasta, sigun iti “Kodansha Encyclopedia of Japan,” nangisagana ni Seishu Hanaoka (1760-1835) iti pangbibineg a substansia a naawagan “mafutsusan” babaen ti panamaglalaokna iti “innem a natural a makaagas a mula.” “Sibaballigi nga inusarna dayta iti panagoperana iti kanser ti suso idi 1805, agarup 40 a tawen sakbay ti kaunaan a pannakaaramat ti ether idiay Massachusetts General Hospital, Boston.” Kalpasanna, inusar ni Seishu ti anesthesia-na iti adu a panagoperana.​—ED.