Ti Napateg nga Akem Dagiti Amma
“UMAD-ADU nga agtutubo a lallaki ti mayat a makiraman iti aktibo a panangpadakkel kadagiti annakda. Walopulo ket dua a porsiento a lallaki nga agedad iti 21 agingga iti 39 ti mangpili iti eskediul ti trabaho a makaipaay iti ad-adu a tiempo iti pamiliada,” kuna ti periodiko a Toronto Star iti Canada maipapan iti nabiit pay a panagadal iti Harvard University. Sigun iti panagadal a nangsurbey iti 1,008 a lallaki ken babbai nga agedad iti 21 agingga iti nasurok nga 65 idiay E.U., 71 a porsiento kadagiti agtutubo a lallaki ti nagkuna nga “isakripisioda ti dadduma a sueldoda tapno ad-adu ti tiempoda kadagiti pamiliada.”
Apay nga adu nga amma ti mayat a makiraman iti aktibo a panangpadakkel kadagiti annakda? Napaliiw ni David Blankenhorn, maysa kadagiti nangbuangay iti National Fatherhood Initiative, a mangitantandudo iti responsable, naikumit a kinaama, nga idi nasurbey ti 1,600 a lallaki idiay E.U. idi 1994, 50 a porsiento ti nagkuna a saan nga impaay ti ammada ti emosional a kasapulanda bayat ti kinaubingda. Iti kaaldawantayo, di kayat ti adu nga amma a maulit daytoy a kasasaad.
Nagsayaat ti impluensia dagiti amma nga aktibo a nakiraman a nangpadakkel iti annakda. Iti panangtukoyna iti panagsirarak nga impablaak ti Department of Health and Human Services ti E.U., imbaga ti The Toronto Star a no kadua dagiti amma ti annakda a mangan, agpasiar, ken agaramid kadagiti homework-da, “manmano dagiti parikut iti panagug-ugali, nasaysayaat ti pannakilangenda ken nalalaing dagiti ubbing ken agtutubo.”
Ti naibaga iti ngato ipaganetgetna ti urnos ti panangpadakkel iti annak a praktikal iti kaaldawantayo a kas met idi tiempo ti pannakaisuratna nasurok a tallo a ribu a tawenen ti napalabas. Espesipiko a dagiti amma ket binilin ti Namunganay iti pamilia a masapul nga aktibo a makiramanda iti panangpadakkel iti annakda. (Efeso 3:14, 15; 6:4) Nabalakadan dagiti amma nga ipasagepsepda iti puso ti annakda ti panagayat iti Dios ken isuro kadakuada dagiti alagaden ken bilin ti Dios. Imbaga ti Dios kadakuada nga aramidenda daytoy ‘no agtugawda iti balayda ken no magnada iti dalan ken no agiddada ken no bumangonda.’—Deuteronomio 6:7.
Ti panangpadakkel iti annak ket responsabilidad ti ama ken ina. Bagbagaan ti Biblia dagiti annak: “Umimdengka . . . iti disiplina ni amam, ket saanmo a baybay-an ti linteg ni inam.” (Proverbio 1:8) Napateg ti akem ti ama. Ramanen dayta ti panangsuportar ken panangraem iti ina ken pannakiraman iti panangpadakkel iti anak. Sapulenna met ti panangbusbos iti tiempo a mangibasa ken makisarita kadagiti annak. Penken daytoy ti napateg nga emosional a kasapulan dagiti annak.
Awan duadua a ti Biblia ket mapagtalkan unay a gubuayan iti balakad ken nagsayaat a prinsipio para iti naurnos a pamilia. Ti ama nga aktibo a mangipapaay iti naespirituan, emosional, ken material a kasapulan ti pamiliana, tungtungpalenna ti inted-Dios a rebbengenna.