Ti Kayo a Nasapa nga Agriing
ITI arinunos ti Enero wenno kattapog ti Pebrero, dakkel ti pagbalbaliwan ti adu kadagiti natukantukad a bakras ti Israel. No agriingdan iti pannaturogda iti kalam-ekna, agsabongen dagiti kayo nga almendro. Tangay dayta ti maysa kadagiti kayo a kasapaan nga agsabong, gagangayen a ti almendro ti naisangsangayan a makita kadagiti away. Arkosan dagiti puraw ken de rosas a sabongna ti naabbungotan iti niebe nga away, a mangipalagip kadatayo iti sasao ni Solomon idiay Eclesiastes 12:5. Sadiay, impadisna ti uban ti lakay ‘iti kayo nga almendro nga addaan kadagiti sabong.’
Gapu iti nasapa a panagsabong ti almendro, maitutop a “daydiay agriing” ti literal a kaipapanan ti sao a Hebreo para iti almendro. Iti Biblia, nausar ngarud dayta iti adu a makatignay nga ilustrasion. Kas pagarigan, ti mammadto a ni Jeremias, nakitana iti sirmata ti maysa a saringit, wenno sanga ti kayo nga almendro. Ania ti inladawan dayta? Imbaga ni Jehova kenkuana: “Agtalinaedak a siririing maipapan iti saok tapno itungpalko dayta.” (Jeremias 1:11, 12) Siempre, saan a pulos a mabannog wenno maturog ni Jehova. Ngem impaganetget dagiti saona ti tarigagayna a mangiringpas iti trabahona.—Isaias 40:28.
Sinigsiglo sakbay ti kaaldawan ni Jeremias, nausar ti agsabsabong a sarukod nga almendro a mangipakaammo no siasino ti tinudingan ni Jehova a nangato a padi. Nangikabil ti tunggal maysa kadagiti 12 a tribu ti Israel ti sarukod iti sanguanan ni Jehova iti tolda ti gimong. Kabigatanna, saan laeng a nagsabong ti almendro a sarukod ni Aaron no di ket simimilagro a nagbunga pay kadagiti naluom nga almendro! Naidulin daytoy a sarukod nga almendro iti lakasa ti tulag iti sumagmamano a tiempo kas pagilasinan ti nasion tapno saanda koma nga agdayamudom manen a maibusor kadagiti dinutokan ni Jehova a pannakabagina.—Numeros 16:1-3, 10; 17:1-10; Hebreo 9:4.
Tinarigagayan ni Jehova a maarkosan kadagiti ladawan ti napintas a sabong ti almendro ti pito ti sangana a balitok a kandelero a nanglawag iti Kasasantuan iti tabernakulo. Sigun iti deskripsion nga insurat ni Moises, “tallo a kopa a nasukog a kasla sabsabong ti almendro adda idi iti maysa a punipon ti sangsanga, nga addaan kadagiti timbukel ken sabsabong nga agbibinnal-et; ket tallo a kopa a nasukog a kasla sabsabong ti almendro adda idi iti sabali pay a punipon ti sangsanga, nga addaan kadagiti timbukel ken sabsabong nga agbibinnal-et. Kasta idi ti maipaay iti innem a sanga a rumrummuar manipud pagsaadan ti silaw. Ket iti pagsaadan ti silaw adda idi uppat a kopa a nasukog a kasla sabsabong ti almendro, a dagiti timbukelna ken sabsabongna agbibinnal-etda.”—Exodo 37:19, 20.
Nupay manmano a dakamaten ti Biblia ti kayo nga almendro, iturongna ti atensiontayo kadagiti napipintas a puraw a sabongna ken ti nasapa a panagriingna. Kangrunaanna, palagipannatayo daytoy napintas a kayo a dinto aginana ni Jehova agingga a maibanagna ti panggepna.—Isaias 55:11.