Manipud Kadagiti Agbasbasa
Kumaribuso a Kasasaad Ti serye a “Panangdaer iti Kumaribuso a Kasasaad iti Kaaldawantayo” (Pebrero 8, 2001) imbuksilanna ti pakaigapuan dagiti parikut ti moderno a kagimongantayo. Nagustuak ti saludsod a, “Bambanag kadi ti ipangpangrunam wenno dagiti tattao?” Pangngaasiyo ta itultuloyyo ti agipablaak kadagiti kasta a nasayaat nga artikulo para kadakami!
Y. K., Japan
Dagiti artikulo ti nakatulong kaniak a mangikeddeng kadagiti ipangpangrunak ken mangamiris kadagiti ar-aramidek. Diak idi naamiris nga agbibiagak iti wagas a nangiturong iti nakaro a pannakapaksuy, panagdanag, ken pannakabannog ti panunotko. Ita, balbaliwakon dagiti ugalik ken ipangpangrunakon dagiti kapatgan. Pagyamanan ta tinulongandak a mamagbalin a simple ti biagko!
L.D.C., Guatemala
Ti Sistema ti Imiunidad Intedko ti Pebrero 8, 2001 a ruar nga addaan artikulo a “Dagiti Bantay a Mangsalaknib iti Salun-atmo” iti doktor nga agtartrabaho iti tay-ak ti pangsaluad a panangagas. Nagustuanna ti retrato iti panid 15 a pakakitaan kadagiti puraw a selula ti dara a mangraraut kadagiti bakteria. Pinadakkelna dayta ken inkuadrona, ket us-usarenna itan a mangilawlawag maipapan iti sistema ti imiunidad.
H. K., Japan
Tallopulo a tawenen nga agbasbasaak iti Agriingkayo!, ket apresiarek unay dagiti naintiempuan nga impormasionna. Ti artikulo a “Dagiti Bantay a Mangsalaknib iti Salun-atmo” ti nangnangruna a nagustuak ta tinulongannak a mangtarus a nakaskasdaaw unay ti kinaepektibo ti sistema ti imiunidad nga intukit ni Jehova kadatayo.
L. G., Mexico
Maysaak a doktor, ket naadalko ti maipapan iti imiunidad idi estudianteak pay laeng iti kinadoktor. Narigat a maawatan ti panangilawlawag ti libromi maipapan iti sistema ti imiunidad, ngem naglawag daytoy nga artikulo. Nalaka a maawatan ti panangsumariona iti suheto. Kinuna naminsan ti maysa a pumapalawag a no adalentayo ti sistema ti imiunidad, talaga a ditay maliklikan a panunoten a daytat’ inaramid ti Dios. Padpadaanak dagiti napimpintas pay nga artikulo maipapan iti bagi ti tao.
N. K., Japan
Dagiti Tsunami Sangapulo ket dua ti tawenko, ket basbasaek ti amin a magasinyo. Talaga a nagustuak ti artikulo a “Dagiti Mammapatay a Dalluyon—Sarsarita ken Aktual a Pasamak.” (Pebrero 8, 2001) Masmasdaawak kadagitoy a dalluyon, ket nagustuak ti pamay-an ti panangipakitayo, babaen iti pagarigan, no kasano ti kapigsada.
K. S., Estados Unidos
Naipugso a Radioaktibo Nagustuak ti kinasimple ti pannakailawlawag ti artikulo a “Naipugso a Radioaktibo—Makapadanag.” (Pebrero 22, 2001) Ammok a makadangran unay dagiti elemento a kas iti strontium 90, ngem diak idi ammo nga apektaranda ti tao manipud kinamaladagana. Makatulong unay ti panangtarus kadagiti kasta a komplikado a suheto agsipud ta tulonganna ti tattao a mangamiris a talaga a kasapulan ti tao ti tulong ti Naindaklan a Namarsua iti panagsapul kadagiti solusion. Pagyamanan unay iti panangipakitayo iti agtultuloy a pannakaseknanyo kadagiti agbasbasa babaen ti panamagbalinyo a simple kadagiti narigat a suheto tapno magunggonaan ti amin.
M. Z., Italia
Agimtuod Dagiti Agtutubo Agbasbasaak iti magasin nga Agriingkayo! sipud idi Consolation pay laeng ti naganna. Uray no baketakon, magustuak a basaen dagiti artikulo iti “Agimtuod Dagiti Agtutubo . . .” Babaen ti panangibagayko kadagiti nailanad a sumagmamano a kasasaad iti kasasaad a sarsarangten dagiti natataengan, nagadu ti naammuak nga impormasion ken nagun-odak a nasayaat a pammagbaga. Makaisuro ti serye uray kadagiti babbaket a kas kaniak.
R. S., Estados Unidos