Manipud Kadagiti Agbasbasa
Dagiti Mannursuro Maysaak a maestra iti elementaria iti napalabas nga uppat a tawen, ket naragsakanak a nangbasa iti serye a “Dagiti Mannursuro—Kasanotayo Ngata no Awanda?” (Marso 8, 2002) Ti maysa a makapadanag a pagannayasan a nadlawko ket saan nga ammo dagiti ubbing ti nagdumaan ti umiso ken dakes. Maysa met a karit no maawatan a naimbag dagiti ubbing ti adu a kalinteganda sakbay a maammuanda dagiti rebbengenda. Nupay kasta, makagunggona a karera ti panagisuro, nangruna no interesado ken rumangrang-ay dagiti estudiante.
J. K., Estados Unidos
Pagyamanan kadagitoy nga artikulo. Tinulongandak a mangtarus iti nagadu a panagsakripisio dagiti mannursuromi, uray no masansan a saan a kasta ti ar-aramidenmi kadakuada.
S. M., Italia
Walo ti tawenko. Gapu kadagiti artikuloyo, naawatak a dagiti estudiante ket ay-ayaten dagiti mannursuro. Kaay-ayoda ti agisuro kadagiti ubbing uray no narigat dayta. Sinuratak ti maestrak ket nagyamanak kenkuana. Duakami iti adingko a babai nga uppat ti tawenna nga agad-adal no kasano nga isuro dagiti tattao maipapan ken Jehova—uray no narigat no dadduma—ngamin, ay-ayatenmi ida.
T. M., Estados Unidos
Uppat a tawen kalpasan a pinanawak ti trabahok a panagisuro, sinuratannak ti maysa a dati nga estudiantek ket inyebkasna ti panangapresiarna kadagiti panawen a tinulongak isuna. Nangiragpin iti maysa a bookmark nga inaramidna a mismo. Mailadawanyo siguro ti ragsakko idi naawatko dayta a surat!
A. R., Slovenia
Intedko daytoy a magasin iti prinsipal ken dua a maestra iti pages-eskuelaan dagiti annakko. Nagurayak iti dua nga aldaw saak nagsubli tapno maammuak ti kapanunotanda. Nagkiddawda iti 20 a kanayonan a magasin iti Español ken Ingles nga itedda kadagiti nagannak.
M. M., Estados Unidos
Itay napan a tawen, nagtrabahoak kas maestra iti elementaria iti uppat a bulan. Imbaga ti dadduma a mannursuro a nakatrabahuak nga awan man la ti panagyaman dagiti nagannak, isu nga ad-adda a marigatanda iti trabahoda. Talaga a naragsakanak ngarud agsipud ta tagipatgen daytoy a serye ti trabaho dagiti napasnek a mannursuro. Idi nalpas ti kontratak, nakaawatak iti adu a surat ti panagyaman manipud kadagiti estudiantek. Tunggal maysa kadagitoy ket napateg kaniak!
S. I., Japan
Panaglugan iti Balloon Pagyamanan unay iti nagsayaat nga artikuloyo a “Panagtayab a Kagiddan ti Angin.” (Marso 8, 2002) Ti panagpasiar babaen ti balloon ket nabayagen nga arapaapko nupay saan pay a natungpal. Maysa a bendision kaniak ti artikuloyo agsipud ta talaga a nariknak a kas man la nakikaduaak iti dayta a panagpasiar! Aktual a “nariknak” a maitaltal-o ti basket ken agtaytayab. Nagbassit ti daga no addaka iti ngato, ngem napateg ken ni Jehova dayta agraman ti sangatauan.
S. A., Alemania
Pannakakonsiensia Talaga a kasapulak ti artikulo a “Ti Panangmatmat ti Biblia: Pannakakonsiensia—Kanayon Aya a Dakes?” (Marso 8, 2002) Gapu ta nangato unay dagiti namnamaek, marigatanak idi a mangkontrol iti riknak no makilangenak iti kaduak iti amin-tiempo a panagebanghelio. Ngem impatuldo daytoy nga artikulo a makaparurod ken makadangran ti kanayon a panangkonsiensia iti dadduma no dida kanayon nga aramiden ti pagarupentayo a rumbeng nga aramidenda. Maragsakanak ta nabalbaliwak ti panangmatmatko. Pangngaasiyo ta itultuloyyo nga isuro kadakami ti panangmatmat ni Jehova kadagiti bambanag.
K. K., Japan