Ti Panangmatmat ti Biblia

Palabsen Aya ti Dios Dagiti Pagkapuyantayo?

‘Saanak a dakes! Inkagumaakon nga isardeng dagiti dakes nga aramidko, ngem nakapuyak unay ngamin!’

IPASIMUDAAG aya dagitoy a sentimiento ti panagriknam wenno ti panagrikna ti maysa nga am-ammom? Adu ti mangipapan a dandani imposible a maparmek dagiti naigameren a moral a pagkapuyan. Dadduma a tattao ket agpampannuray iti arak, sigarilio, wenno droga. Ti kinaagum ti mangdomdominar iti biag ti adu pay a sabsabali. Adda met dagidiay timmulok iti seksual nga imoralidad ket ibagbagada a naan-anay ngaminen nga adiktoda iti sekso.

Kas impasimudaag ti Mateo 26:41, siaasi nga inyebkas ni Jesus ti pannakaawatna kadagiti pagkapuyan ti tattao.a Kinapudnona, silalawag nga ipakita ti rekord ti Biblia nga agpadpada a talaga a naasi da Jehova a Dios ken Jesus kadagiti tattao. (Salmo 103:8, 9) Ngem mainanamatay ngata a palabsen ti Dios ti amin a pakapilawantayo?

Da Moises ken David

Usigem ti pakasaritaan ni Moises. Nagdinamag nga isu idi ti “kaemmaan pay laeng iti amin a tattao nga adda iti rabaw ti daga,” ket inkagumaanna a tinaginayon dayta a nasayaat a kalidad. (Numeros 12:3) Bayat a nagdaliasat dagiti Israelita iti let-ang, masansan a nagaramidda iti di nainkalintegan ken dida rinaem ti Dios ken dagiti pannakabagina. Ngem iti laksid amin dayta, sipapakumbaba a nagpaiwanwan ni Moises iti Dios.​—Numeros 16:12-14, 28-30.

Ngem idi asidegen nga agpatingga ti makabannog a panagdaliasatda, saan a nakapagteppel iti imatang ti intero a nasion ken sinukirna dagiti pammilin ti Dios. Pinakawan ti Dios, ngem pinalabasna kadi dayta a pasamak? Saan. Imbagana ken ni Moises: ‘Gapu ta dika nangiparangarang iti pammati kaniak . . . , saanmonto nga ipan daytoy a kongregasion iti daga a sigurado nga itedko kadakuada.’ Saan a nakastrek ni Moises iti Naikari a Daga. Kalpasan ti 40 a tawen a panangikagumaanna a mangtagiragsak iti dayta nagsayaat a pribilehio, ti nakaro a natauan a panagbasolna ti nakagapu a dina naawat ti gunggona.​—Numeros 20:7-12.

Ni Ari David ti maysa pay a nadiosan a tao nga addaan iti pagkapuyan. Naminsan, timmulok iti rugsona ken nakidenna iti maysa a naasawaanen. Kalpasanna, pinanggepna a kaluban ti basolna babaen ti panangipapatayna iti asawa dayta a babai. (2 Samuel 11:2-27) Idi agangay, nagbabawyanna iti kasta unay dagiti krimen nga inaramidna isu a pinakawan ti Dios. Ngem dinadael ni David ti maysa a pamilia, isu a saan nga inkaluya ni Jehova manipud kadagiti makadidigra a kalamidad a napasamak kalpasanna. Nagsakit iti nakaro ti anak ni David, ket saan a bimmallaet ni Jehova nupay namin-adu nga inkararagan ni David ti anakna. Natay ti ubing, ket kalpasanna, nagsasaruno dagiti trahedia nga immapay iti sangakabbalayan ni David. (2 Samuel 12:13-18; 18:33) Nagkaro ti sinagaba ni David gapu iti itutulokna iti moral a pagkapuyanna.

Ipakita dagitoy a pagarigan a panungsungbaten ti Dios dagiti tattao kadagiti aramidda. Masapul a pabilgen dagidiay mayat nga agserbi kenkuana dagiti nakapuy a paset ti espiritualidadda tapno agbalinda a nasaysayaat a Kristiano. Idi umuna a siglo, adu ti nangaramid iti kasta.

Ti Panangikagumaan a Lumapsut iti Basol

Ni apostol Pablo ket maitutop a maibilang a mapagwadan iti Nakristianuan a panagbiag. Ngem ammom kadi a kanayon idi a nakidangadang kadagiti pagkapuyanna? Silalawag a deskribiren ti Roma 7:18-25 daytoy a pannakidangadang, wenno kas iti kunaen ti bersikulo 23, daytoy a ‘pannakigubat.’ Kanayon a nakidangadang ni Pablo ta ammona a di agsarday ti posibilidad nga agbasol.​—1 Corinto 9:26, 27.

Nairuam idi nga agaramid iti dakes ti dadduma a miembro ti kongregasion Kristiano idiay kadaanan a Corinto. Kuna ti Biblia nga idi ket ‘mannakiabigda, mannakikamalala, lallaki a makikaidda kadagiti lallaki, mannanakaw, naagum, ken managbarbartek.’ Ngem kunana met a ‘naugasandan.’ (1 Corinto 6:9-11) Kasano? Napabilegda a mangisardeng kadagiti dakes nga aramidda babaen ti umiso a pannakaammo, Nakristianuan a pannakitimpuyog, ken espiritu ti Dios. Idi agangay, indeklara ida ti Dios a nalinteg iti nagan ni Kristo. Wen, pinakawan ida ti Dios isu a naaddaanda iti nadalus a konsiensia.​—Aramid 2:38; 3:19.

Saan a tinagilag-an ni Pablo ken dagiti Kristiano idiay Corinto dagiti managbasol a pagannayasanda. Imbes ketdi, nakidangadangda kadagitoy, ket babaen ti tulong ti Dios, nagballigida. Dagidiay a managdaydayaw idi umuna a siglo ket nagbalin a makaay-ayo iti moral agpapan pay kadagiti aglawlawda ken imperpekto a pagannayasanda. Datayo ngay?

Namnamaen ti Dios a Parmekentayo Dagiti Pagkapuyantayo

Ti panangdaer iti pagkapuyan mabalin a di agbanag iti naan-anay a panangiwaksi iti dayta. Nupay rumbeng a ditay tumulok iti pagkapuyantayo, ditay mapukaw dayta. Mangpataud dayta kadagiti naigamer unayen a pagkapuyan. Nupay kasta, ditay koma tumulok kadagiti pagkapuyantayo. (Salmo 119:11) Apay a nakapatpateg daytoy?

Ngamin, saan nga ipalubos ti Dios a kanayon a pagpambartayo ti kinaimperpektotayo tapno agaramidtayo iti dakes. (Judas 4) Kayat ni Jehova nga agbalin a nadalus dagiti tattao ken pasayaatenda ti moral a panagbiagda. Kuna ti Biblia: “Karurodyo ti dakes, kumpetkayo iti naimbag.” (Roma 12:9) Apay a kasta ti kinatibker ti Dios?

Ti maysa a makagapu ket makadangran ti itutulok iti pagkapuyan. “Aniaman nga imulmula ti maysa a tao, daytoyto met ti apitenna,” kuna ti Biblia idiay Galacia 6:7. Dagidiay tumulok iti pannakaadikto, kinaagum, ken kinalulok masansan a nakaro ti apitenda iti panagbiagda. Ngem adda pay napatpateg a makagapu.

Ti panagbasol ket makasair iti Dios. Dayta ti ‘mangisina’ kadatayo ken ni Jehova. (Isaias 59:2) Yantangay dagidiay agar-aramid iti basol ket dida magun-odan ti anamongna, kastoy ti idagadagna kadakuada: “Bugguanyo ti bagbagiyo; dalusanyo ti bagbagiyo; . . . sumardengkayo nga agaramid iti dakes.”​—Isaias 1:16.

Naayat ken naasi ti Namarsua kadatayo. “Saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.” (2 Pedro 3:9) Ti kanayon nga itutulok iti pagkapuyan ti manglapped kadatayo a manggun-od iti anamong ti Dios. Yantangay saan a palabsen ti Dios dagiti pagkapuyantayo, kastatayo met koma.

[Footnote]