Asidegen—Ti Lubong nga Awanan iti Droga
Mailadawam aya ti maysa a lubong nga awanan iti droga?
INAWIS ti Secretary-General ti United Nations a ni Kofi Annan ti amin a nasion nga ikagumaanda a patauden ti kasta a lubong. Kinunana: “Masapul nga ipakattayo dagiti baro ken natured a pamuspusan a mangparmek iti daytoy a kinadakes; daytoy didigra a mangap-apektar iti nagadu nga annaktayo.”
Nupay umanamong dagiti agtuturay a kissayanda ti sangalubongan a panangpataud ken panagiwaras kadagiti maiparit a droga, nakarigrigat nga aramiden dayta. Kinuna ni Hennadiy Udovenko iti Ukraine, nga agserserbi a kas presidente iti espesial a sesion iti UN General Assembly, a “babaen ti napattapatta a birok a nasurok nga $400 a bilion iti kada tawen, ti pannakainegosio dagiti narkotiko ti maysa kadagiti kapigsaan a nalimed a negosio, . . . a mabalin a mangdadael wenno mangpakapuy iti panagandar ti sangalubongan nga ekonomia.” Imbagana pay a ti parikut iti droga ket “nagbalinen a sangalubongan ken awan ti nasion a natalged iti daytoy a didigra.”
Narigat nga arapaapen ti lubong nga awanan iti droga. Sigurado nga awan dagiti gobierno ti tattao a makabael a mangpukaw kadagitoy. Nupay kasta, awan ti makalapped iti Mannakabalin-amin a Dios a mangtungpal iti panggepna a mangpataud iti maysa a paraiso a daga a pakapnekan ti amin nga emosional, pisikal, ken naespirituan a kasapulan. (Salmo 145:16; Lucas 23:43; 2 Pedro 3:13) Sigun ken mammadto Isaias, ti sao ti Dios ket ‘saan nga agsubli kenkuana nga awanan kadagiti nagbanagan, no di ket sigurado nga aramidennanto daydiay pagragsakanna, ket sigurado nga agballiginto iti banag a nangibaonanna iti dayta.’—Isaias 55:11.
Ti pananginanama kadagita a kari ket makaipaay iti dadakkel a gunggona uray pay itan. Kas pagarigan, agdrogdroga idi ni Edmundo. Ngem idi pinatina ti kari ti Biblia a nalinteg a baro a lubong, natignay a mangusig iti biagna. Itan, kuna ni Edmundo: “Anian a kinamaagko a nangsayang idi iti tiempok.” Gapu ta tarigagayanna a taginayonen ti anamong ti Dios, natignay a saanen nga agdroga. Wen, ti pannakaammo iti Dios ken kadagiti karina ti mangtignay kadatayo itan a ‘mangikawes ti baro a personalidad a naparsua a maitunos iti pagayatan ti Dios iti pudno a kinalinteg ken kinasungdo.’—Efeso 4:24.
Adu pay a dati nga agdrogdroga ti mangtagtagiragsak metten iti nasinged a relasion iti Namarsua kadakuada. Kadagitoy, adda naisangsangayan a kaipapanan dagiti sasao ti salmista: “Dagiti basol ti kinaagtutubok ken dagiti iyaalsak O dika lagipen. Maitunos iti naayat a kinamanangngaasim sika lagipennak, maipagapu iti kinaimbagmo, O Jehova. Naimbag ken nalinteg ni Jehova. Dayta ti makagapu a dagiti managbasol isurona maipapan iti dalan.” (Salmo 25:7, 8) Anian a makaliwliwa a maammuan dagiti nagannak ti simmukir nga annak a mabalin nga agbalbaliw dagiti annakda! Babaen ti panangikagumaan, mabalin a tulongan ti nagannak dagiti annakda a manglaban iti makadidigra a panagdroga ken “mapetpetanda a sititibker ti pudpudno a biag,” a matungpalto iti baro a lubong ti Dios.—1 Timoteo 6:19.
[Ladawan iti panid 10]
Ti namnama nga agbiag iti baro a lubong ti Dios ti nangtignay iti adu nga agdrogdroga a mangbalbaliw iti panagbiagda