Pakagunggonaan ti Komunidad
BABAEN TI MANNURAT TI AGRIINGKAYO! IDIAY ESPANIA
GINASGASUT a tawenen nga agidondonar dagiti siudad ti Espania iti daga a pagibangonan kadagiti simbaan wenno kapilia. Patien dagiti gobierno a pakagunggonaan dagiti komunidadda ti kaadda ti relihion. Gapu ta ti Katolisismo ti mabigbigbig a relihion ti Estado, nakayugalianen a dandani ti Iglesia Katolika laeng ti pakaidonaran ti daga ti munisipio. Ngem nagbalbaliwen ti tiempo.
Sagudayen ti maysa a linteg idi 1980 a nangpatalged iti wayawaya ti relihion nga “awan ti partikular a relihion a maibilang nga Opisial a relihion ti Estado.” Daytoy ti nangtignay iti dadduma nga opisial ti siudad a mangbigbig iti trabaho dagiti Saksi ni Jehova. Kas tanda daytoy a panangbigbig, nangidonarda iti daga a pakaibangonan dagiti Kingdom Hall.
Inyebkasen ti nadumaduma nga administrasion ti siudad ti kapanunotanda a nainkalintegan ti kasta a donasion gapu ta “makaisuro ti trabaho [dagiti Saksi],” ken kasta met a “magunggonaan ti publiko ken ti kagimongan iti kasta a trabaho.” Imbaga ti dadduma nga opisial iti siudad a “napateg ti kaadda dagiti Saksi ni Jehova iti siudad” ken “saan a pagganansiaan ti trabahoda.”
Adun a Kingdom Hall ti naibangon iti las-ud ti 48 nga oras babaen ti panagusar iti naisangsangayan a pamay-an ti panagbangon nga ipatpatungpal dagiti agibangbangon a grupo dagiti Saksi a boluntario. Kinuna ti mayor iti La Línea, iti makin-abagatan a laud nga Espania: “Magustuak unay ti kinamanagparabur dagiti boluntario, ket makunak a maikarida iti panangsuportarmi. Kasapulantayo ti ad-adu pay a kastoy a kababalin iti nabingaybingay ita a lubongtayo.” Inawaganna ti baro a Kingdom Hall a “maysa a monumento ti panagtitinnulong.”
Napaliiw met dagiti kaarruba daytoy a panagtitinnulong. Bayat ti pannakaibangon ti doble a Kingdom Hall idiay Vitoria, iti makin-amianan nga Espania, kinuna ni Marian, nga agnanaed laeng iti asideg: “No amin a tattao ti mangipakita iti daytoy a kita ti ayat, awan koma dagiti parikut a sagsagabaentayo itatta.” Kinuna ti maysa nga arkitekto iti dayta a lugar kalpasan a nakitana ti pannakaibangon ti Kingdom Hall: “Kayatko ti agbalin a maysa kadagiti Saksi ni Jehova tapno mariknak ti kasta a rag-oyo!”
Iti siudad ti Zaragoza, iti makin-amianan a daya nga Espania, di pinabayadan dagiti opisial ti siudad ti intedda kadagiti Saksi nga 600 a metro kuadrado a daga. Sigun iti lokal a periodiko, ti lugar a pagbangonan ket kaasping ti “balay dagiti arig kuton a Saksi ni Jehova ta ginasut ngamin ti arigna babassit a kuton nga agtitinnulong nga agtrabaho.” Dagiti trabahador ti sibabara a pinasangbay dagiti kaarruba. Kinuna ti maysa kadakuada: “Pinukaw dagiti padi ti pammatik, ngem insubliyo dayta.”
Agyaman dagiti Saksi iti tulong dagiti kaarruba ken dagiti lokal nga autoridad iti pannakaibangon dagiti lugar a pagdaydayawanda. Natibker ti determinasionda a mangusar iti Kingdom Hall-da para iti kasayaatan a trabaho a panangisuro nga agpaay iti komunidad—ti panangikasaba ken panangisuro iti Sao ti Dios.
[Ladawan iti panid 31]
La Línea, Cádiz, Espania