Manipud Kadagiti Agbasbasa
Paniempo Nagsuratak tapno agyaman gapu iti serye nga “Ania ti Mapaspasamaken iti Paniempo?” (Agosto 8, 2003) Idi binasak ti sasao a, “Nupay adu a pakarigatan ti patauden dagita a makadidigra a pasamak, . . . mabalin a makagunggona dagitoy,” nasdaawak. Ngem idi binasak ti simmaganad a sasao a, “Mabalin a tignayenda ti tattao a mangipakita iti ayat ken pannakaseknan kadagiti padada a tattao,” immanamongak. Iti kada aldaw, sarsarangtentayo ti amin a kita ti rigat—saan laeng a dagiti makadidigra a pasamak. Kayatko a laglagipen nga aniaman ti mapasamak, adda met latta pagimbaganna.
S. T., Japan
Panangsaranay Kadagiti Nadidigra Nabasak ti artikulo a “Maysa a Banag a Di Mayanud ti Aniaman a Bagyo.” (Agosto 8, 2003) Ti pamay-an ti panangsaranget dagiti Saksi ni Jehova iti adu nga emerhensia gapu kadagiti natural a didigra ti nangtignay kaniak nga ad-adda a mangipateg iti panagbalinko a paset daytoy nga organisasion. Pagyamanan iti panangipablaakyo kadagiti kakastoy nga artikulo, a makatulong kadakami a mangipakita kadagiti galad a di mayanud ti aniaman a bagyo.
M. P., Italia
Adun a didigra ti napasarak a mismo, agraman dagiti layus ken ginggined. Mangaskasabaak iti binalaybalay idi nagginggined idi 1989. Gapu iti buteng, uray la a nagtaray ti kaduak idi a barito nga agtawen iti 14! Kinibinko ken nagkararagkami a dua tapno agkalma. Di nagbayag, nagsat amin a linia ti koriente iti aglawlawmi. Matartaranta dagiti tattao! Nagdakkel ti rengngat iti suelo ti mismo a balayko. Ngem kamalmanna, nangasabakami manen iti binalaybalay tapno tulonganmi ti dadduma a mangtaming iti dayta a kasasaad. Daytoy nga artikulo ti nangipalagip kadagiti mismo a kapadasak!
B. S., Estados Unidos
Pagyamanan unay iti panangipablaakyo kadagiti makaparegta nga artikulo kas iti “Maysa a Banag a Di Mayanud ti Aniaman a Bagyo.” Nakasangitak idi binasak dayta. Sigurado nga awan ti bagyo a makayanud iti panagayattayo kadagiti padatayo a Kristiano ken ti di agimbubukodan a panagayattayo iti padatayo a tattao.
I. A., Japan
Panagdroga Pagyamanan unay iti serye a “Panagdroga iti Pamilia—Ania ti Maaramidam?” (Abril 8, 2003) Medio nabayag metten nga agpapayadalak iti Biblia kadagiti Saksi ni Jehova, ngem saanak a rumangrang-ay iti naespirituan gapu iti daytoy a parikutko. Idi nabasak ti kahon a “Tulong Kadagiti Agpapaimbag nga Agdrogdroga,” naamirisko a ti inaldaw a panagbasa iti Biblia ken panangyaplikar kadagiti prinsipiona ti makatulong kaniak iti panagreggetko nga agpaimbag. Dakkel met ti naitulong ti pannakaammok a talaga a maseknan ti Dios kaniak.
R.S.A., Brazil
Marigrigatan nga Ubbing Kayatko nga iyebkas ti kasta unay a panangapresiarko gapu iti serye a “Dagiti Ubbing—Nasapa Unay Kadi ti Panagmataenganda?” (Abril 22, 2003) Dayta ti kasapulak unay. Kas agsolsolo nga ina ken amin-tiempo nga ebanghelisador, talaga a nagrigat ti eskediulko. Masansan a pampanunotek, ‘Naimbagak aya nga ina? Aglablabes aya ti in-inanamaek iti balasangko?’ Makaliwliwa a maammuan no ania ti rumbeng a parang-ayek. Kayatko a tagiragsaken ti kinaubing ti anakko ket kayatko met a matagiragsakna dayta. Nupay makaparegta amin nga artikuloyo, makaparegta unay kaniak dagiti artikulo a kas iti daytoy.
M.D.E., Mexico
Ubing a Birbirokenna ti Dios Sangapulo ket maysa ti tawenko. Binasak ti artikulo a “Kayatko a Maammuan ti Ad-adu Pay Maipapan ken Jehova.” (Abril 22, 2003) Naparegtaak a nakaammo nga adda balasitang nga inauna laeng ngem siak iti makatawen nga agregregget nga agadal maipapan ken Jehova. Kayatkon ti rummuar tapno mangasabaak iti sabsabali.
Y. T., Japan