Manipud Kadagiti Agbasbasa
Uso Kayatko nga iyebkas ti panangapresiarko gapu iti serye nga “Agpapaadipenka Aya iti Uso?” (Setiembre 8, 2003) Kas maysa a tin-edyer, mariknak ti panangpilit ti lubong a gumatangak kadagiti kabaruan nga uso tapno agtalinaed ti “perpekto” a pammagik. Ngem dagitoy nga artikulo ti nakatulong kaniak a mangbalbaliw iti ugalik iti panaggasto ken agkawes iti naem-emma a wagas.
M. B., Estados Unidos
Sangapulo ti tawenko, ket kiniddaw ti maestrami nga agsirarakkami iti topiko maipapan iti uso. Intugotko ti kopia ti artikulo a “Dagiti Pagdaksan ti Kinalibnos Gapu iti Uso.” Nagpaseroks ti maestrami iti kopia para iti amin nga estudiante iti klasemi!
G., Belgium
Kas balasang nga agtawen iti 19, nalakaak a maimpluensiaan iti nadepinar kas ti “perpekto” a babai. Ti pammagik ket saan a kas iti pammagi dagiti modelo, isu a masansan a masuronak. Masansan a kayatko ti agdieta—uray payen dagiti karirigatan a pamay-an. Di nagbayag, kalpasan a nagkararagak tapno mabalakadanak no kasano a maparmekko dagitoy a rikna, naawatko daytoy a magasin ket ibilangko a dayta ti sungbat ti kararagko. Pagyamanan unay.
S., Alemania
Dagiti artikulo ti nakatulong kaniak a nangtarus ti kinabarengbareng ti tarigagay a sumurot iti uso. Agtawenak iti sangapulo ket uppat, ket ditoy Italia, maumsika nga ageskuela no saan a mabigbigbig ti etiketa ti kawesmo—dagus a maibilangka a pimpiman! Insuro kaniak dagiti artikuloyo a ti panagbalin a nabaknang iti naespirituan ti napateg iti imatang ti Dios.
F. G., Italia
Dagiti Orkidia Nagagaranak a nangbasa iti artikulo a “Ti Kinangayed Dagiti Orkidia.” (Setiembre 8, 2003) Inikkannak iti sumagmamano a singasing no kasano ti agaywan iti orkidia iti pagtaengan ken insurona kaniak ti dadduma kadagiti nagan ken nagtaudanda. Impaay ti Agriingkayo! ti impormasion a sapsapulek.
L.E.C., Bangladesh
Nadalus a Ngipen Masapul nga agsuratak kadakayo maipapan iti artikulo a “Sanga a Pagdalus iti Ngipen.” (Setiembre 8, 2003) Nabayagen a pampanunotek no kasano ti panangdalus dagiti tattao iti ngipenda sakbay a napataud ti toothpaste. Isu a naan-anay a naragsakanak iti dayta nga artikulo!
D. G., Estados Unidos
Kanayon idi nga umsiek ti panagngalngal kadagiti sanga. Ngem nagkamaliak. Kasla makagunggona ti kasta a panagngalngal ket mangusarakto metten iti kasta tapno maaywanak dagiti ngipenko.
A. A., Chad
Report Maipapan iti Holocaust Ti artikulo a “Dakkel ti Epekto ti Reportna” nadakamatna dagiti Judio a nagusar iti Bituen ni David kadagiti kampo konsentrasion. (Setiembre 8, 2003) Nupay kasta, sigun iti kapadasak a mismo iti kampo konsentrasion ti Ravensbrück, saan a nagusar dagiti Judio iti Bituen ni David no di ket duyaw a trianggulo.
J. R., South Africa
Sungbat ti “Agriingkayo!”: Sigun kadagiti ebidensia a magun-odan, iti kaaduan a kampo, di nagisuot dagiti Judio iti Bituen ni David. Ngem adda ebidensia nga adda nagisuot iti kasta iti dadduma a kampo.
Panangasing Saanak a Saksi ni Jehova. Nupay kasta, ti serye a “Panangasing—Ania ti Maaramidam iti Dayta?” (Agosto 22, 2003) ket naintiempuan unay. Kimmaro ti panangirurumen dagiti kaeskuelaan ti balasangko idiay eskuelaanda. Kas iti insingasingyo, kinasaritak isu a natulongak. Pagyamanan iti pannakaseknanyo kadagiti tattao.
T. M., Ukraine