Dagiti Kasayaatan nga Ay-ayam

Ania a kita ti abalbalay ti rumbeng a gatangek para iti anakko? Mano ti gastuek iti dayta? No maysaka nga ina wenno ama, nalabit namin-adun nga inyimtuodmo dagitoy. Ngem maragsakankay a makaammo a dagidiay saan unay a nangina nga abalbalay ti kasayaatan.

“Ad-adda a magunggonaan ti ubbing no personal nga agaramid ken agsukisokda imbes a basta agbuyada laeng, isu a nasaysayaat dagiti simple nga abalbalay a mamagpanunot kadakuada ngem kadagiti napipintas a de bateria a kotse wenno agsao a munieka. Limitaran dagitoy ti maaramidan ti anakmo,” kuna ti libro a Motivated Minds​—Raising Children to Love Learning. Mabalin a ‘makaparagsak iti damo, ti naud-udi a nadakamat nga abalbalay, ngem gagangay a mabiit a mauma ti ubbing agsipud ta dida makapageksperimento, makasukisok, wenno makapataud.”

Sigun iti edad ti anak, dagiti mamagpanunot nga abalbalay ti pakairamanan dagiti simple a banag a kas kadagiti material a sangalen, awanan karga a kahon, papel, material a pagdrowing, ken uray pay ti darat ken danum. “Dagiti babassit nga abalbalay, kas kadagiti sinan animal iti talon,” kuna ti Motivated Minds, “ikkanna [ti ubing] iti gundaway a mangibagay, mangigrupo, mangipadis, ken mangpatanor iti kinasigona nga agsao babaen ti panagestoriana.” Isingasing met ti libro dagiti simple nga instrumento ti musika​—no kayatmo nga anusan ti arimbangaw​—agsipud ta daytoy ti mangipaay iti gundaway kadagiti ubbing a mangsukisok kadagiti uni ken dagiti padronda.

Managpartuat dagiti ubbing, ken magagaranda nga agsursuro ken agay-ayam. Isu nga apay a dikay tulongan ida kadagitoy tallo a benneg babaen iti nainsiriban a panangpili kadagiti abalbalayda.