Panagragut iti Kinapintas

NABALLIGI a balasang ni Mariaa ken kameng ti maysa a nagsayaat a pamilia. Ngem saan a naragsak. Apay? Saan a kontento iti langana. Nupay parparegtaen ti pamiliana, patien ni Maria nga isu ket saan a napintas, isu a malidliday.

Mabigbigbig ken mararaem ti pamilia ni José, ket gapu iti kasasaadna rumbeng a naragsak koma. Ngem pagarupenna a saanto a pulos a makasarak iti asawa. Apay? Pagarupenna a saan a naguapo no di ket nalaad pay ketdi. Patienna nga awan ti manakem a babai a maatrakar kenkuana.

Kayat ti agtawen iti walo a ni Luis ti ageskuela. Mannakilangen ken pagay-ayatna ti makiay-ayam kadagiti kaklasena, ngem masansan nga agsangit gapu ta pagaangawanda ti langana. Ibagbagada a nalukmeg.

Adu ti kastoy a kasasaad. Saan la a ti kinaawan ti panagraem ken panagtalek iti bagi ti parikut da Maria, José, ken Luis. Kinapudnona, awan ti mayat a maipuera gapu iti langana.

Nupay kasta, ti kagimongan nalabes ti panangipangpangrunana iti langa. Kinapudnona, ti balligi kasla masansan nga agpannuray iti langa. Kas pagarigan, kasla nalaklaka a maaddaan ti trabaho dagiti kapintasan wenno kaguapuan a tattao. Kastoy ti kinuna ni Pilar Muriedas, maysa kadagiti direktor iti Latin-American and Caribbean Women’s Health Network, a para kadagiti babbai: “Ti napintas a langa ti maysa kadagiti kangrunaan a kasapulan iti panagballigi.” Ket sigun ken Dr. Laura Martínez, inton agangay talaga a maammuan dagiti babbai a “napateg ti kinapintas tapno maaddaanda iti trabaho.”

Siempre, adu met a lallaki ti agragut a maaddaan iti “kapintasan” a pammagi. Kinapudnona, adu a babbai ken lallaki ti mangbusbos iti adu a tiempo iti panangikagumaanda nga agpapintas, a nganngani dida pay manganen wenno agpaoperada pay ketdi tapno maaddaanda iti kapintasan a rupa wenno pammagi. Adda kadi pagimbagan daytoy a panangikagumaan? Adda kadi pagdaksanna?

[Footnote]

[Ladawan iti panid 3]

Mabalin nga adda epekto ti pisikal a langa kadagiti gundaway a maited iti maysa a tao