Manipud Kadagiti Agbasbasa

Mairurumen iti Panggedan Natukay unay ti riknak iti serye a “No Mairurumenka iti Panggedan​—Ania ti Maaramidam?” (Mayo 8, 2004) Napasarak ti amin a nailanad iti artikulo. Napadasak ti naidumduma iti ospital a pagtartrabahuak gapu iti relihionko, ket naapektaran ti emosion ken espiritualidadko. Maragsakanak ta naammuak a saan laeng a siak ti nakapasar iti nasaem unay a kapadasan.

J. C., Puerto Rico

Nairurumenak iti sumagmamano a tawen agingga a dandanin naapektaran ti isipko. Aramidek ti amin a kabaelak a mangyaplikar kadagiti singasingyo.

C. H., Estados Unidos

Pagyamanan iti panangtulongyo kadakami a mairurrurumen ken iti panangyadaniyo kadakami nga ad-adda iti naayat a Diostayo, a maseknan iti kasasaadtayo.

L. W., Estados Unidos

Ti kongregasion dagiti Saksi ni Jehova iti lugarmi intukonda daytoy nga isyu kadagiti lugar ti negosio ken pinaregtada dagiti makinkukua nga idulinda daytoy nga artikulo. Adu ti nangyebkas iti apresasionda iti daytoy.

V. S., Estados Unidos

Nagikkatak iti trabahok gapu ta pinagsasawandak. Pangngaasiyo ta itultuloyyo ti mangipablaak kadagiti artikulo a mangipakita no kasano a madaeranmi dagiti parikut.

T. Y., Japan

Idi intukonko daytoy nga isyu iti doktorko, kinunak: “Nalabit maysa nga aldaw, addanto pasienteyo nga agsaksakit ti tianna gapu iti pannakairurumen.” Kinunana: “Pudno a talaga dayta ta adda kasta a pasientek ita!” Inkarina a basaenna dagiti artikulo.

E. S., Alemania

Yantangay awan ti bukodko nga apartment, kapilitan a makipagnaedak ken ni manangko ken ibturak ti nasakit a panagsasaona. Maup-upayak gapu iti dayta. Ngem maitutop unay kaniak daytoy a ruar ti Agriingkayo! Talaga a liniwliwanak ni Jehova.

S. A., Russia

Mangpapatay a Mula Agyamanak iti artikulo nga “Agannadka Kadagiti Mangpapatay a Mula!” (Mayo 8,  2004) Nasurok a 12 a tawenen nga agur-urnong ken agmulmulaak kadagiti mula nga agkaan kadagiti animal. Umiso ti artikulo no maibatay iti siensia ken simple ti pannakailawlawagna.

T. K., Alemania

Sangapulo ket maysa ti tawenko. Kiniddaw ti mannursuromi a mangisuratkami iti maipapan iti Venus flytrap. Iti dayta met la a lawas, apag-isu a simmangpet daytoy nga artikulo!

R. S., Russia

Agmulmulaak kadagiti mula nga agkaan kadagiti animal ket tinagiragsakko a binasa daytoy nga artikulo. Ngem kasla saanak nga umanamong iti paulona. Mabalin a makadangran dagitoy a mula kadagiti dadduma nga insekto, ngem nadalusda met, ken nalamí a mula. Agpegpeggad payen a maungaw ti dadduma.

H. K., Japan

Sungbat ti “Agriingkayo!”: Pagyamanan iti pammalagipyo. Nupay ti paulomi ket agserbi a mangawis iti atension dagiti agbasbasa, ti artikulo isurona kadagiti agbasbasa a raemen ken taripatuenda dagitoy a mula.

Pammati iti Sidong ti Rigat Tinagiragsakko a binasa ti artikulo a “Pammati ti Pamilia iti Sidong ti Rigat.” (Mayo 8, 2004) Sangapulo ti tawenko ken addaanak iti Crohn’s disease. Dandani nabusbosko ti kallabes a panawen ti lam-ek nga agsublisubli iti ospital agingga a natakuatan met laeng ti sakitko. Talaga a natulongannak daytoy nga artikulo nga agbalin a naturtured a mangdaer iti sakitko. Namnamaek ti agbiag idiay Paraiso, a sadiay awanen dagitoy a parikut.

M. H., Estados Unidos