Diro​—Ti Sagut ti Uyokan iti Tao

Babaen iti mannurat ti Agriingkayo! idiay Mexico

IDI nakasarak iti rara nga agar-aruyot iti diro iti kakaykaywan, intaya ti maysa a napaksuyan nga Israelita a soldado ti bastonna iti dayta, sana rinamanan. Dagus a ‘naglawag dagiti matana’ ken pimmigsa manen. (1 Samuel 14:25-30) Iyilustrar daytoy a salaysay ti Biblia ti maysa kadagiti kalidad ti diro a makagunggona iti tao. Nagbiit a mangpapigsa dayta, ta adu ti karbohidratona​—agarup 82 a porsiento. Makapainteres ta sigun iti teoria, madaliasat ti maysa nga uyokan ti intero a lubong babaen iti pigsa nga ipaay ti 30 la a gramo a diro!

Agaramid aya dagiti uyokan iti diro tapno magunggonaan laeng ti tao? Saan, diro ti taraonda. Ti kalkalainganna ti kadakkel a balay dagiti uyokan ket agkasapulan iti 10 agingga iti 15 a kilo a diro tapno malasatanda ti tiempo ti lam-ek. Ngem no nasayaat ti paniempo, ti balay dagiti uyokan ket makapataud iti 25 a kilo a diro, isu a ti sobra ti alaen ken tagiragsaken ti tattao​—agraman dagiti animal a kas kadagiti oso ken raccoon.

Kasano ti panagaramid dagiti uyokan iti diro? Dagiti agsawar nga uyokan ket agurnong iti nektar manipud iti nadumaduma a sabong, a susopenda dayta babaen kadagiti kasla tubo a dilada. Iyawidda dayta iti balayda babaen iti maysa kadagiti tianda. Mayakar ti nektar iti dadduma nga uyokan a “mangngalngal” iti dayta iti agarup kagudua nga oras, sada ilaok kadagiti enzyme manipud kadagiti glandula iti ngiwatda. Kalpasanna, ipisokda dayta kadagiti innem ti sulina a rara a naaramid iti allid sada pal-idan babaen kadagiti payakda tapno agmaga.a No bimmassiten ti danumda agingga iti kurang a 18 a porsiento, makalubanen iti naingpis nga allid dagiti rara. Mabalin nga agnanayon ti kapaut dagiti seliado a diro. Naipadamag a dagiti kasayaatan a pagtaraon a diro ket natakuatan kadagiti tanem dagiti Faraon agarup 3,000 a tawenen ti napalabas.

Dagiti Makaagas a Kalidad ti Diro

Malaksid a nasayaat a kanen, a talaga a gubuayan kadagiti bitamina B, nadumaduma a mineral, ken antioxidant, ti diro ket maysa kadagiti kabayaganen a naammuan nga agas a maus-usar agingga ita.b Kastoy ti kinuna ni Dr. May Berenbaum, maysa nga eksperto kadagiti insekto idiay University of Illinois, E.U.A.: “Sinigsiglon a maus-usar ti diro a pangagas iti nagadu a sakit kas iti sugat, katarata, gaddil, nasinit, nagarumiadan ken nadunor a kudil.”

Kastoy ti inreport ti agipadpadamag nga organisasion a CNN iti panagkomentona iti nabiit pay a makaagas a kinapateg ti diro: “Saanen a nalatak ti diro kas pangagas iti sugat idi napartuat dagiti agas nga antibiotiko idi Gubat Sangalubongan II. Ngem gapu iti baro a panagsirarak, ken ti iyaadu dagiti bakteria a naandur iti antibiotiko, daytoy nabayagen a remedio ket maus-usar manen a pangagas iti sakit ken pannakadunor.” Kas pagarigan, maysa a benneg ti panagsirarak ti nangusig iti panangagas kadagiti nasinit. Napaliiw a nadardaras nga immimbag dagiti pasiente, saanda unay a nakarikna iti ut-ot, ken nagpiglat idi nasapsapuanda iti diro.

Ipakita dagiti panagadal a gapu iti enzyme nga innayon dagiti uyokan iti nektar, ti diro ket addaan iti kalkalainganna a kontra bakteria ken antibiotiko. Daytoy nga enzyme ti mangpataud iti hydrogen peroxide, a mangpapatay kadagiti makadangran a bakteria.c Kanayonanna, no direkta a maisapsapo ti diro iti nadunor, natakuatan a saan unay a lumteg ken napartak nga agpabaro kadagiti nasalun-at a tisyu. Isu a kastoy ti kinuna ti biokemiko a taga-New Zealand a ni Dr. Peter Molan: “Maakseptaren ti diro kas nagsayaat ken nasamay a pangagas dagiti doktor.” Kinapudnona, inanamongan ti Australian Therapeutic Goods Administration ti diro kas agas, isu a mailaklakon ti medikal a diro kas agas ti sugat iti dayta a pagilian.

Mano pay a taraon ti ammom a nakasussustansia ken nakaim-imas ngem makaagas gayam? Di pagduaduaan nga iti napalabas, adda dagiti naipaulog nga espesial a linteg a mangsalaknib kadagiti uyokan ken kadagiti agtartaraken kadakuada! Ti panangdadael kadagiti kayo wenno balay dagiti uyokan ket maysa a krimen a madusa iti dakkel a multa wenno ipapatay pay ketdi. Kinapudnona, ti diro ket napateg a sagut iti tao ken pakaidayawan ti Namarsua.

[Footnotes]

[Kahon/Ladawan iti panid 16]

Panagluto Babaen iti Diro

Nasamsam-it ti diro ngem iti asukar. No ngarud maisandi iti asukar, kagudua agingga iti kakatlo la a diro ti usarem. Yantangay danum ti agarup 18 a porsiento ti diro, kissayam met ti likido ti putahe nga isagsaganam. No awan likidona, mangnayonka iti dua kutsara nga arina iti kada sangatasa a diro. Kadagiti mayurno a taraon, mangnayonka met iti kagudua kutsarita a baking soda iti kada sangatasa a diro ken pakapuyem ti temperatura ti oven-mo iti 15 a degree Celsius.

[Credit Line]

National Honey Board

[Ladawan iti panid 16]

Uyokan nga agsussusop iti nektar

[Ladawan iti panid 17]

Rara

[Ladawan iti panid 17]

Pangen dagiti uyokan

[Ladawan iti panid 17]

Suksukimaten ti maysa nga agtartaraken ti balay dagiti uyokan