Ti Panangmatmat ti Biblia

Apay nga Agpaiwanwanka iti Biblia?

“Amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag.”​—2 Timoteo 3:16.

PAGPAIWANWANAM ngay iti biagmo? Aglaplapusanan ita ti magun-odan a balakad iti dandani amin a suheto. Nupay kasta, adu latta ti agpaiwanwan kadagiti nagkauna a sursurat iti Biblia.

Ngem ibilang ti kaaduan a saan unay a napateg ti Biblia nangruna iti daytoy a panawen nga aglaplapusanan ti magun-odan nga impormasion babaen iti computer. Dadduma a mararaem nga edukador ken sientista suportaranda ti kapanunotan a saanen a maitutop ti Biblia. Hustoda ngata? Tangay nagadu ti magun-odan ita a gubuayan ti panangiwanwan, apay a rumbeng nga agpaiwanwantayo iti Biblia?

Libro ti Kinapudno

Idi agin-inana ni Jesu-Kristo iti maysa a bubon, kinasaritana ti maysa a Samaritana. Kinunana kenkuana: “Ti Dios maysa nga Espiritu, ket dagidiay agdaydayaw kenkuana masapul nga agdayawda a buyogen ti espiritu ken kinapudno.” (Juan 4:24) Ipakita dagitoy a sasao nga adda kita ti panagdayaw nga anamongan ti Dios. Tapno makapagdaydayawtayo iti kinapudno, masapul a maitunos dayta iti impalgak ti Dios iti Biblia maipapan iti kinadiosna. Ti Sao ti Dios ket aglaon iti kinapudno.​—Juan 17:17.

Nupay kasta, adu a relihion ti agkunkuna a mamatida iti Biblia, ket tunggal maysa kasla isursurona ti nadumaduma a banag. Nagbanaganna, nagadu ti mariribukan no ania a talaga ti isursuro ti Biblia. Ni Jesus aya ti Dios, wenno ti Anak ti Dios? Adda pay aya biag kalpasan ti ipapatay wenno awan? Agpayso aya nga adda impierno a pagtutuokan ti tattao kalpasan a natayda? Pudno aya a persona ni Satanas? Ania ti kaipapanan ti panagbalin a Kristiano? Talaga aya a napateg iti Dios dagiti ar-aramiden ken pampanunotentayo? Ti aya pudno nga ayat ti nainkalintegan a rason a makidenna sakbay ti kasar? Dakes aya ti uminum iti arak?a Ibagbaga ti nadumaduma a relihion nga isursuroda ti kinapudno maipapan kadagitoy a banag. Ngem dagita a narelihiosuan a doktrina ket masansan a dida agtutunos iti maysa ken maysa. Saan a mabalin a pudnoda amin.​—Mateo 7:21-23.

Kasano ngarud a masarakam ti kinapudno maipapan iti Dios ken ti pamay-an ti panagdayaw a makaay-ayo kenkuana? Kas pagarigan ta naammuam a nasken a maoperaka tapno maagasan ti sakitmo. Ania ngay ti aramidem? No mabalin, agsirarakka a naimbag tapno makasarakka iti kalaingan a siruhano a talaga a nalaing gapu kadagiti mapaneknekan a kualipikasionna, sakanto makiuman ken makisarita kenkuana. Kamaudiananna, no kombinsidokan nga isu ti kalaingan, agtalek ken agpaoperakan kenkuana. Mabalin a sabali ti kapanunotan ti dadduma ngem addan pamkuatam a mamati iti daytoy a siruhano.

Kasta met a no sipapasnek ken naan-anay a sukimatem ti magun-odan nga ebidensia, mapapigsam ti pammatim iti Dios ken iti Biblia. (Proverbio 2:1-4) No agsapsapulka kadagiti sungbat dagiti saludsodmo maipapan iti kita ti panagdayaw a makaay-ayo iti Dios, adda pagpiliam. Mabalinmo a sukimaten ti agsisimparat a pannursuro ken opinion ti tattao, wenno mabalinmo nga usigen ti panangmatmat ti Biblia.

Umiso ken Praktikal

Ti naannad a panangsukimat iti Biblia ti mangipaay kenka iti umdas nga ebidensia nga “amin a Kasuratan impaltiing ti Dios ken makagunggona.”b (2 Timoteo 3:16, 17) Kas pagarigan, napno ti Biblia kadagiti detalyado a padto. Ti historia ti mangpaneknek iti pannakatungpal dagitoy. (Isaias 13:19, 20; Daniel 8:3-8, 20-22; Mikias 5:2) Nupay saan a libro maipapan iti siensia, nasientipikuan ti kinaumiso ti Biblia. Aglaon dayta kadagiti kinapudno maipapan iti nakaparsuaan ken salun-at a naisurat rinibu a tawenen ti napalabas sakbay pay a nakaaramid dagiti sientista kadagiti umasping a konklusion.​—Levitico 11:27, 28, 32, 33; Isaias 40:22.

Kanayonanna, ti Biblia ti tumulong kadatayo a mangaramid kadagiti nainsiriban a desision. Aglaon dagiti panidna iti nagadu a praktikal a balakad maipapan iti biag ti pamilia, pisikal ken emosional a salun-at, negosio, ken dadduma pay nga aramid iti kada aldaw. Kuna ti Proverbio 2:6, 7: “Ni met laeng Jehova mangted iti sirib; manipud ngiwatna adda pannakaammo ken panangilasin. Ket agpaay kadagiti napalungdo mangidulinto iti praktikal a kinasirib.” No agpaiwanwanka iti Biblia, masanaymo ti pannakaawatmo a “mangilasin agpadpada iti umiso ken di umiso.”​—Hebreo 5:14.

Tulongannatayo met ti Sao ti Dios a mangtarus iti panggep ti biag. (Juan 17:3; Aramid 17:26, 27) Ilawlawagna ti kaipapanan dagiti kasasaad ti lubong. (Mateo 24:3, 7, 8, 14; 2 Timoteo 3:1-5) Ipakitana nga isursuro ti Dios kadatayo no kasano nga ikkatennanto ti kinadakes ditoy daga tapno tagiragsakenton ti sangatauan ti perpekto a salun-at ken agnanayon a biag.​—Isaias 33:24; Daniel 2:44; Apocalipsis 21:3, 4.

Minilionen ti nakapaneknek a talaga a mapagtalkan ken mapangnamnamaan ti Biblia a gubuayan ti praktikal a kinasirib. Awisendaka dagiti agipabpablaak iti Agriingkayo! a mangsukimat iti agsasaruno nga artikulo a napauluan “Ti Panangmatmat ti Biblia,” a makita iti tunggal ruar daytoy a magasin. No aramidem dayta, mabalin a makasarakkanto iti kanayonan nga ebidensia a mangisuro a ti Biblia ti kasayaatan a pagpaiwanwanam iti biagmo.

[Footnotes]

PINAMPANUNOTMO KADIN?

◼ Ania a kita ti panagdayaw ti anamongan ti Dios?​—Juan 4:24.

◼ Ania ti rumbeng nga aramidem tapno magunggonaanka iti sirib ti Dios?​—Proverbio 2:1-4.

◼ Kasano a ti Biblia ti gubuayan ti praktikal a panangiwanwan?​—Hebreo 5:14.