Agnanayon a Kired ti Kinaagtutubo!

DANDANI matayen ti lalaki iti sibay ni Jesus. Kastoy ti impakaasina: “Jesus, laglagipennak inton makagtengka iti pagariam.” Kinuna ni Jesus: “Pudno ibagak kenka ita nga aldaw, Makikaduakanto kaniak idiay Paraiso.” (Lucas 23:42, 43) Agpayso a saan a natay iti sakit wenno kinalakay daydi a di nainaganan a lalaki; isut’ napapatay gapu iti inaramidna a krimen. Nupay kasta, makagun-od dagiti nataengan iti dakkel a pammaregta manipud iti narikut unay a kasasaadna.

Sigurado nga apresiarentayo ti naisangsangayan a panagtalek dayta a lalaki! Uray no matmatay idin ni Jesus iti kayo a pagtutuokan iti sibayna, di nagduadua dayta a lalaki a sigurado nga agturayto ni Jesus kas Ari iti Pagarian ti Dios. Namati met a mabalin nga addanto aldaw nga isu ket lagipen ni Jesus. Agasem​—dayta nakondenar a lalaki mapagungarto manipud ken patay iti nadayag a paraiso, a pagturayan ni Jesus!

Mayasping ti kasasaad ti sangatauan iti dandanin matay a managbasol. Kasano? Aniaman ti edadtayo, baybayadantayo amin ti supapak ti basol isu a kasapulantayo ti pannakaisalakan. (Roma 5:12) Kas iti dayta a kriminal, mabalintay ti mangnamnama ken Kristo Jesus​—uray ti namnama a mabang-arantayton manipud kadagiti nasaem a parikut a rumsua iti kinanataengan! Kinaagpaysuanna, impanamnama ni Jesus iti sangatauan ti agnanayon a biag a perpekto ti bagi ken isip iti maysa a paraiso a daga.​—Juan 3:16, 36.

Baro Amin a Bambanag Para Kadagiti Nataengan ken Agtutubo

Iti sidong ti Pagarian ni Kristo, dagiti agnaed iti daga “pudno a maragsakandanto iti napalalo iti kinaruay ti talna.” (Salmo 37:11) Awanto ti agkuna: “Masakitak.” (Isaias 33:24) Mapukawton ti aniaman a pagkapuyan a mabalin a sagabaentayo, ta “kumalay-atto daydiay pilay a kas iti panagkalay-at ti kalakian nga ugsa, ket ti dila daydiay umel umkisto gapu iti ragsak.” (Isaias 35:6) Dagiti lallakay ken babbaket agsublinton ti kired ti kinaagtutuboda; ti lasagda ‘agbalin a nasalsalibukag ngem iti kinaagtutuboda.’​—Job 33:25.

Nupay kasta, rumbeng aya a namnamaentayo a matungpalto dayta? Bueno, panunotem Daydiay nangikari iti kasta a Paraiso iti daydi dandanin matay a lalaki. Namin-adu idin a dagiti bunggoy inyegda ken Jesus dagiti pilay, pawad, bulsek, ken tuleng. Sigagagar nga inagasanna ti ‘tunggal kita ti sagubanit ken an-annayen.’ (Mateo 9:35, 36; 15:30, 31; Marcos 1:40-42) Sipapanayag nga impakitana ti maaramidan ti Pagarianna. Pinagungar pay ketdi ni Jesus ti sumagmamano a tattao a natay. (Lucas 7:11-17; Juan 11:38-44) Babaen iti panangaramidna iti kasta, nabilbileg ti pammaneknek ti karina nga “amin dagidiay adda kadagiti pakalaglagipan a tanem mangngegdanto ti timekna ket rummuarda.”​—Juan 5:28, 29; Aramid 24:15.

Panunotem laengen a mariingkanto iti Paraiso nga addaan iti baro a bagi, nalawag a panagkita, lapayag a makangngeg iti uni dagiti tumatayab ken naragsak a timek, takiag ken gurong a saanen nga agut-ot, ken naan-anay a nasalun-at nga isip. Awanen dagiti dakes nga aldaw iti kinanataengan. (Eclesiastes 12:1-7; Isaias 35:5, 6) Uray ni patay ‘mapukawton’ agsipud ta ‘maalimonton iti agnanayon.’​—1 Corinto 15:26, 54.

Ipamatmat dagiti agdama a pasamak iti lubong a nasukimat ken naidilig iti padto ti Biblia a sipapartak nga umad-adanitayon iti panungpalan ti kinanataengan kas iti pagaammotayo. (Mateo 24:7, 12, 14; Lucas 21:11; 2 Timoteo 3:1-5) Asidegen ti tiempo inton dagiti lallakay ken babbaket nga addaan pammati iti Dios ken agserserbi kenkuana sagrapendanto manen ti kired ti kinaagtutuboda​—iti agnanayon!

[Kahon/Ladawan iti panid 9]

Usarem ti Utekmo!

No kasano a ti ehersisio ti bagi pabilgenna ti masel, ti kanayon a panangusar iti isip asaenna ti utek. Tapno magutugot ti utek, masapul nga adda dagiti kabbaro nga aramidentayo. Adtoy ti sumagmamano a pamay-an a mangpataud ken mangpabileg kadagiti koneksion iti selula ti utek:

◼ Maaddaan kadagiti baro a pagesman, kas iti arte, eskultura, panangbukel iti sasao, jigsaw ken crossword puzzle; agadalka iti sabali a lenguahe.

◼ Makipulapolka iti nagduduma a tattao; makilangen ken makisaritaka tapno saanka a masikoran ken lumaing ti isipmo.

◼ Parang-ayem ti espiritualidadmo. “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.”​—Filipos 4:6,  7.

◼ Agbasaka kadagiti maitutop a pagbasaan; iranudmo ti nabasam iti maysa a tao.

◼ Lagipem ken isalaysaymo dagiti damag iti radio wenno TV tapno matandaanam dagiti kabasbasam ken malagipmo dagiti nabayagen a naadalmo.

◼ Usarem ti saanmo a nakairuaman nga imam (kannigid wenno kannawan, sigun iti nakairuamam) a mangpisel iti remote control ti TV, mangusar iti telepono, wenno agsipilio.

◼ No mabalin, usarem ti amin a sentidom iti agmalem.

◼ Ammuem ken pasiarem dagiti napipintas a lugar nga asideg wenno adayo iti lugarmo.

[Ladawan iti panid 8, 9]

Inkari ni Jesus nga asidegen a mapukaw ti ut-ot ti kinanataengan ket masukatan iti kired ti kinaagtutubo iti agnanayon