‘Kayatko ti Agserbi iti Dios Sakbay a Matayak’
TI PAKASARITAAN NI MAMIE FREE
IDI 1990, rimsua ti gerra sibil idiay Liberia. Bayat a kimmaro ti rinnupak, ni Mamie, maysa nga ubing a babai a Krahn nga agtawen iti 12, ken ti pamiliana ket saan a nakapanaw iti balayda idiay Monrovia, ti kabesera. “Nakangngegkami iti kanalbuong iti kaarrubami,” kinuna ni Mamie. “Adda missile a natnag iti balay ti kaarrubami isu a napuoran met ti balayda.” Agpapan pay iti nakaro a rinnupak, naglibas ni Mamie, ni nanangna, ken ti lalaki nga ading ni nanangna.
“Pagammuan ta napuntaanak,” kinuna ni Mamie.
“Kalpasanna, dinamag ni nanangko, ‘Ania ti napasamak?’ ”
“Napaltoganak sa!” kinunak.
Natumba ni Mamie a nagpapaut-ot sa nagkararag: “Denggennak koma Apo Dios. Matayak sa metten, ngem kayatko ti agserbi kenka sakbay a matayak.” Kalpasanna, naawananen iti puot.
Gapu ta impagarup dagiti kaarruba a natayen ni Mamie, kayatda nga itabon iti asideg nga igid ti baybay. Nupay kasta, impapilit ni nanangna a maitaray idiay ospital ti lugarda. Nakalkaldaang ta saanen a maasikaso ti ospital gapu iti kaadu dagiti agsangpet a nasugatan a lallaki, babbai, ken ubbing. Karabiyanna, natay ti nasugatan met nga uliteg ni Mamie, idinto ta nakalasat ni Mamie nupay paralisadon manipud siket agingga kadagiti dapanna.
Nagtultuloy a nagpadara ti uneg ti bagina ken nagsagaba iti nakaro nga ut-ot. Uppat a bulan kalpasanna, naipasidong iti X-ray tapno makita ti ayan ti bala. Adda dayta iti nagbaetan ti puso ken barana. Delikado unay no maopera ni Mamie, isu nga impan ni nanangna iti tradisional nga erbolario. “Sinugatnak iti labahas,” kinuna ni Mamie, “sana sinusop ti sugat tapno maalana kano ti bala. ‘Adtoyen,’ kinunana, sana innala ti bala manipud iti ngiwatna. Nagawid kalpasan a binayadanmi.”
Ngem nagulbod dayta nga erbolario. Idi naipasidong manen iti X-ray, adda pay laeng ti bala. Isu a napan manen da Mamie ken ni nanangna iti erbolario. Impapatina kadakuada a siam pay a bulan sakbay a makitanto iti X-ray nga awanen a talaga dayta. Nagawidda ken siaanus a nagurayda. Kabayatanna, nadumaduma ti tinomar ni Mamie tapno maep-ep ti marikriknana nga ut-ot. Namin-adu a naipasidong iti X-ray siam a bulan kalpasanna. Adda pay laeng ti bala ngem timmalawen ti erbolario.
Iti daytoy a tiempo, 18 a bulanen nga adda iti bagi ni Mamie ti bala. Adda kabagianna a nangipan kenkuana iti maysa a baglan a babai. Imbes a tumulong, imbagana nga addanto aldaw a matay ni Mamie wenno ni nanangna. Agtawen itan iti 13 ni Mamie. “Nagsangsangitak latta idin,” kinuna ni Mamie. “Nupay kasta, idi dimteng ti naituding a petsa, awan ti natay kadakami.”
Adda ulitegna a nangipan ken Mamie iti padi a nangibaga a nasirmatana a maparalisado ni Mamie ket gapu kano dayta iti mahiko, saan a gapu iti bala. Inkarina a no suroten ni Mamie dagiti inresetana a ritual, makapagna manen kalpasan ti makalawas. Kinuna ni Mamie: “Kada rabii, namin-adu a nagdigusak iti danum a naggapu iti taaw, nagayunarak, ken iti tengnga ti rabii nagtulidtulidak iti daga iti adu nga oras. Ngem awan serserbi amin dagitoy a panagregget, isu nga awan latta ti namalbaliwan ti kasasaadko.”
Ngem idi agangay, ad-adun a pasilidad ti ospital ti mabalinen a mangasikaso, isu a naikkat met laengen ti bala iti bagi ni Mamie. Nasurok a dua a tawen a nagsagaba iti awan sardayna nga ut-ot. “Kalpasan ti operasion,” malagipna, “awanen ti ut-ot ken saanakon a marigatan nga aganges. Nupay nagtalinaedak a medio paralisado, makatakderak babaen iti tulong ti walker.”
Naam-ammo ni Mamie Dagiti Saksi ni Jehova
Sumagmamano a lawas kalpasan ti operasion, adda dua a Saksi ni Jehova a naam-ammo ti nanang ni Mamie. Gapu ta ammona a kaay-ayo ti balasangna ti agbasa iti Biblia, inawisna dagiti Saksi idiay balayda. Dagus a nagpayadal ni Mamie iti Biblia. Ngem kalpasan ti sumagmamano a bulan, nagsubli idiay ospital ket dinan nakita pay dagiti Saksi.
Nupay kasta, mawaw latta ni Mamie iti pannakaammo iti Biblia. Isu nga idi adda padi ti maysa a relihion a mayat a tumulong kenkuana, inakseptarna dayta. Kabayatan ti maysa a klase iti Sunday school, adda padana nga estudiante a nangimtuod iti maestroda, “Agpada aya ni Jesus ken ti Dios?”
“Wen,” kinuna ti mannursuro. “Agpadada. Ngem ni Jesus ket saan a katupag ti Dios.”
‘Saan a katupag?’ pinampanunot ni Mamie. ‘Saan sa a nainkalintegan dayta. Narigat a maawatan.’ Gapu ta saan a mapnek a kinapudno ti Biblia ti ad-adalenna, insardeng ni Mamie idi agangay ti makitimpuyog iti dayta a relihion.
Idi 1996, rimsua manen ti kinaranggas idiay Monrovia. Natayan manen ni Mamie iti dua a kabagian ket kapaminduan a napuoran ti pagtaenganda. Sumagmamano a bulan kalpasanna, naam-ammo ni Mamie ti dua a Saksi bayat ti panagbalaybalayda. Intuloy manen ni Mamie ti nagadal iti Biblia. Nasdaaw iti damo a pannakigimongna. Ngamin, nagtitinnulong ti amin agraman dagiti panglakayen iti kongregasion a nangdalus iti Kingdom Hall. Iti arinunos dayta a tawen, naragsakan a timmabuno iti maysa kadagiti Kombension Distrito a “Dagiti Manangiwaragawag iti Nadiosan a Talna.” Dayta ti kaunaan a dakkel a panagtataripnong dagiti Saksi ni Jehova a natabunuanna.
“Nasdaawak unay,” kinuna ni Mamie. “Agpayso nga agiinnayat dagiti Saksi, uray no agduduma ti tribuda sa nakaur-urnos ti amin.”
Panangtungpalna iti Arapaapna nga Agserbi iti Dios
Idi 1998, gapu ta pimmigsa dagiti aglalaban a puersa, napilitan ni Mamie ken ni nanangna nga agkamang iti kabangibangda nga Côte d’Ivoire. Agnanaedda itan iti Peace Town Refugee Camp agraman ti agarup 6,000 pay a taga-Liberia. Intuloy ni Mamie ti nakipagadal iti Biblia kadagiti Saksi ket nagpartak ti irarang-ayna. Idi agangay, kayatnan nga iranud ti pammatina iti sabsabali. Tapno mabaelanna ti makipaset ti ministerio iti publiko, tultulongan dagiti kapammatianna iti wheelchair-na. Iti kasta, nabaelan ni Mamie ti mangasaba iti adu pay a padana a nagbakuit.
Gapu iti kasasaad ti bagina, marigatan a mapan idiay Kingdom Hall nga 6 a kilometro ti kaadayona manipud iti pagnanaedanna. Nupay kasta, tabtabunuan ni Mamie ti amin a gimong. Idi Mayo 14, 2000, nagdaliasat iti nasurok a 190 a kilometro tapno tumabuno iti aldaw ti espesial nga asamblea ken tapno isimbolona ti dedikasionna iti Dios babaen ti panagbautisarna. (Mateo 28:19, 20) Iti imatang ti adu nga aglulua a tattao, adda dagiti nangbagkat ken Mamie sada impan iti waig a nagbautisaranna. Maragragsakan unay idi rimkuas.
Ita ta agnanaeden iti kampo dagiti nagbakuit idiay Ghana, kalat ni Mamie ti agbalin a regular pioneer, wenno amin-tiempo a managebanghelio. Rinugian metten ni nanangna ti nakipagadal iti Biblia kadagiti Saksi ni Jehova ket iranranudna metten iti sabsabali ti nasursurona. Agpadpadada a mangsegsegga iti tiempo a naikari iti Sao ti Dios inton “kumalay-atto daydiay pilay a kas iti panagkalay-at ti kalakian nga ugsa, ket ti dila daydiay umel umkisto gapu iti ragsak.”—Isaias 35:5-7.
[Ladawan iti panid 22]
Ti bala a naikkat iti bagi ni Mamie
[Ladawan iti panid 23]
Bagbagkatenda ni Mamie tapno agbautisar iti waig
[Ladawan iti panid 23]
Iyad-adalanna iti Biblia ni nanangna nga Emma