Agimtuod Dagiti Agtutubo . . .

Pannakigayyem Kadagiti Kaeskuelaan—Kaano a Nasinged Unay?

“Pagsasaritaan dagiti kaeskuelaak ti amin a ragsakda no ngudo ti lawas. Mariknak a napalalot’ pannakaikapisko.”—Michelle.a

“No dadduma, makitak ti maysa a grupo dagiti kaeskuelaak ket mapanunotko, ‘Ayna, talaga a nasayaatda a gagayyem. Kayatko ti makigayyem kadakuada.’”—Joe.

“Diak narigatan a makigayyem idiay eskuelaan. Nalaka dayta. Dayta idi ti problemak.”—Maria.

DAGITI kaklasem ti masansan a kakaduam iti kaaduan a paset dagiti oras ti panageskuelam. Adu a karit, pannakapaay, ken balligi ti sarsarangtem a kas kadakuada. Iti dadduma a wagas, mabalin a mariknam nga ad-adu ti nagpapadaanyo ngem kadagiti nagannak, kakabsatmo, wenno padam a Kristiano. Natural laeng a kayatmo ti makigayyem kadakuada. Dakes aya dayta? Adda aya pagdaksanna? No maipapan iti pannakigayyemmo kadagiti kaeskuelaam, kaano a nasinged unay dayta? Kasanom a maikeddeng no ania dagiti di maitutop?

Kasapulam ti Gagayyem

Tunggal maysa kasapulanna ti gagayyem—tattao a kapasiganna kadagiti naragsak a tiempo ken mapagpannurayanna no narigat ti kasasaad. Adda idi gagayyem ni Jesus, ket tinagiragsakna ti nakilangen kadakuada. (Juan 15:15) Kalpasanna, idi matmatayen ni Jesus iti pagtutuokan a kayo, ti nasinged a gayyem ni Jesus a ni Juan, ‘daydi adalan a dungdungnguenna unay,’ adda iti asidegna. (Juan 19:25-27; 21:20) Kasapulam ti gagayyem a kas kenkuana—tattao a gayyemdaka latta iti rigat man ken nam-ay. Kinuna ti maysa a proverbio ti Biblia: “Ti pudno a kadua agayat iti isuamin a tiempo, ken ti kabsat a mayanak no adda rigat.”—Proverbio 17:17.

Nalabit pagarupem nga adda kasta a kadua idiay eskuelaan, daydiay maysa kadagiti kaklasem a kapasigam. Agpada dagiti paginteresanyo, ken kaay-ayoyo ti agtungtong. Pudno a mabalin a dimo kapammatian; ngem para kenka, saan met ketdi a ‘dakes a kadua.’ (1 Corinto 15:33) Agpayso met ketdi a nasayaat dagiti prinsipio ti dadduma nga agtutubo a naiduma ti patpatienda maipapan iti Biblia. (Roma 2:14, 15) Ngem kaipapanan kadi dayta a rumbeng nga agbalinka a nasinged a gayyemda?

Dagiti Kristiano Saanda a Bumusbusor iti Komunidad

Nabatad a saan a likliklikan dagiti pudno a Kristiano dagiti dida kapammatian. Kinapudnona, tapno matungpalda ti annongenda a ‘mangaramid iti ad-adalan kadagiti tattao iti amin a nasion,’ makisaritada kadagiti lallaki ken babbai iti amin a puli, relihion, ken kultura. (Mateo 28:19) Saanda a busbusoren wenno saan nga adayo ti riknada kadagiti kaarruba, katrabahuan, wenno kaeskuelaanda. Imbes ketdi, ipakpakita dagiti Kristiano ti pannakaseknanda iti sabsabali.

Nangipakita ni apostol Pablo iti nagsayaat nga ulidan iti daytoy a banag. Ammona ti makisarita iti ‘amin a kita ti tattao’ uray no dina ida kapammatian. Siempre, saan a panggep idi ni Pablo ti makilangen kadakuada no di ket kastoy ti imbagana: “Aramidek ti amin a bambanag maipagapu iti naimbag a damag, tapno agbalinak a manangiranud iti dayta iti sabsabali.”—1 Corinto 9:22, 23.

Mabalinmo a tuladen ti ulidan ni Pablo. Agbalinka a nainggayyeman kadagiti kasadaram. Sursuruem ti makisarita a naimbag kadakuada. Dadduma kadagiti kaeskuelaam mabalin a birbirokenda ti namnama a naibasar iti Biblia nga adda kenka. Usigem ti napasamak iti maysa a Kristiano a balasitang nga agnagan iti Janet. Isu ken dagiti kaklasena ti natudingan nga agsurat iti ababa a salaysay maipapan iti tunggal padada nga estudiante, ket kalpasanna, binasa ti tunggal estudiante dagiti salaysay maipapan kadakuada. Kastoy ti mabasa iti maysa kadagiti surat a naawat ni Janet: “Kasla kanayon a nakaragragsakka. Pangngaasim ta ibagam kadakami no apay!”

Kas ipakita daytoy a kapadasan, dadduma kadagiti kaklasem ti mabalin a mayat a dumngeg maipapan kadagiti patpatiem. Sigurado a pagimbagam no agbalinka a nainggayyeman kadakuada. Di pagduaduaan a daytoy ti mangipaay kenka iti gundaway a mangilawlawag kadagiti patpatiem. Palubosam met dagiti kaklasem a mangyebkas iti panangmatmatda ken sipapasnek a dumngegka bayat nga ibagbagada dayta. Ti kapadasan a magun-odam iti pannakisaritam kadagiti kasadaram ti makatulongto unay inton sumrekka iti maysa a panggedan ken maipasangoka kadagiti umasping a kasasaad. Idiay eskuelaan ken iti panggedan, ti naingayyeman a kababalinmo ti makatulong kenka a ‘mangarkos iti sursuro ti Manangisalakantayo, ti Dios, iti amin a banag.’—Tito 2:10.

Dagiti “Di Agkaasmang a Naisangol” a Panaggagayyem

Siempre, adda nagdumaan ti pannakigayyem iti maysa a kaklase ken ti panagbalin a nasinged a gayyemna. Kastoy ti insurat ni Pablo: “Dikay agbalin a di agkaasmang a naisangol kadagiti di manamati.” (2 Corinto 6:14) Tapno agbalinka a nasinged a gayyem ti maysa a tao, masapul nga agpada dagiti prinsipio ken kalatyo. Saan a mabalin dayta iti daydiay naiduma kenka dagiti Nainkasuratan a pammati ken pagalagadanna. Posible a maparegtaka a makiraman kadagiti dakes nga aramid wenno madadael dagiti makagunggona nga ugalim no agbalinka a di agkaasmang a naisangol iti di manamati a kaklasem.

Natakuatan dayta ni Maria babaen iti nasaem a kapadasanna. Gapu ta mannakigayyem unay, nalaka a maaddaan iti gagayyem ngem marigatan a mangiduma iti nasinged a pannakigayyem. “Kaay-ayok no adu ti mangayat kaniak, agpadpada dagiti babbai ken lallaki,” inaminna. “Nagbanaganna, ad-adda a naisagmakak iti kasasaad ditoy lubong a saanakon a makalung-aw.”

Kas ken Maria, nalabit marigatanka a mangamiris no nasinged unayen ti pannakigayyemmo iti dimo kapammatian. Nupay kasta, awanto ti pagbabawyam no mangaramidka kadagiti nalawag a limitasion no siasino ti piliem a nasinged a gagayyemmo. Kasanom a maaramidan dayta?

No Kasano ti Agpili iti Naimbag a Gagayyem

Kas nadakamat itay, sisisinged a nakigayyem ni Jesus idi adda ditoy daga. Inaramid ni Jesus dayta babaen ti panagbiagna a nadayaw ken nagsao maipapan kadagiti naespirituan a banag. No awaten idi dagiti tattao ti pannursurona ken estilo ti panagbiagna, nagbalin a nasinged kadakuada. (Juan 15:14) Kas pagarigan, kalpasan ti pannakisaritada ken Jesus, natignay ti uppat a lallaki ta uray la a “binaybay-anda ti amin a banag ket simmurotda kenkuana.” Dagitoy a lallaki a da Pedro, Andres, Santiago, ken Juan ti nagbalin a nasinged a gagayyem ni Jesus.—Lucas 5:1-11; Mateo 4:18-22.

Pinagminar ti panagsasao ken aramid ni Jesus a napasnek maipapan iti patpatienna ken dina inkompromiso ti takderna. Pinanawan dagidiay madi a mangawat iti kinasiasinona agraman dagiti pannursurona isu a pinalubosan ida ni Jesus.—Juan 6:60-66.

Kas pagarigan, adda idi agtutubo a lalaki a ti kinapasnekna ti nangtukay ken Jesus. Kuna ti Biblia: “Minatmatan ni Jesus ket nariknana ti panagayat kenkuana.” Ngem idi naammuan daytoy a lalaki ti namnamaen ni Jesus kadagiti gagayyemna, “pimmanaw.” Kasla naimbag a tao dayta a lalaki ta ‘inayat’ ni Jesus. Nupay kasta, ad-adu ti kalikaguman ni Jesus kadagiti gagayyemna. (Marcos 10:17-22; Mateo 19:16-22) Sika ngay?

Mabalin nga agkatunosankayo iti maysa a kaeskuelaam. Ngem damagem ti bagim: ‘Situtulok aya a mangaramid iti ibilbilin ni Jesus? Kayatna aya nga ammuen ti maipapan ken Jehova, daydiay insuro ni Jesus a pagdayawantayo?’ (Mateo 4:10) Bayat a makisaritaka kadagiti kaklasem ken agbiagka a maitunos kadagiti pagalagadan ti Biblia, nalawagton dagiti sungbat kadagitoy a saludsod.

Nasayaat no agbalinka a mannakigayyem kadagiti kaklasem, kas iti panagbalin idi ni Jesus a mannakigayyem iti amin a kita ti tattao. Ngem sinigurado ni Jesus nga ay-ayaten dagiti nasinged a gagayyemna ti nailangitan nga Amana a ni Jehova. Mabalinmo met nga aramiden ti kasta. ‘Taginayonem ti nasayaat a kababalinmo’ idiay eskuelaan, ket sitataktika nga iranudmo iti sabsabali ti maipapan iti pammatim. Kangrunaanna, siguraduem a dagiti kasayaatan a kita ti gagayyem ti piliem.—1 Pedro 2:12.

[Footnote]

PANUNOTEM

◼ Ania dagiti peggad iti panangbusbos iti nawaya a tiempom iti dimo kapammatian a kaklasem kalpasan dagiti oras ti panageskuelam? Nainsiriban aya dayta?

◼ Kalpasan a nabasam daytoy nga artikulo, naamirismo kadi a nasingedka unay iti maysa a kaklasem? No kasta, ania ti mabalin nga aramidem?

[Kahon/Dagiti Ladawan iti panid 18]

HOW CAN I MAKE REAL FRIENDS?

Daytoy a video, nga inaramid dagiti Saksi ni Jehova ti mangitampok kadagiti napudno a pannakiuman kadagiti agtutubo a taga-Estados Unidos, Italia, Francia, ken Espania. Magun-odan dayta iti 36 a lenguahe.

[Ladawan iti panid 18]

Mabalin nga aginteres ti dadduma kadagiti kaklasem a mangammo kadagiti patpatiem