Agimtuod Dagiti Agtutubo . . .

Apay a Rumbeng nga Agbasaak?

“Diak maanusan ti agbasa. Kaykayatko laengen ti agbuya iti telebision.”—Margarita, 13, Russia.

“No pagpiliendak no agbasaak iti libro wenno agbasketbol, kaykayatko ti agbasketbol.”—Oscar, 19, Estados Unidos.

NO BINASAM dagitoy a sasao, mabalin a maamirismo a napateg a paglaingan ti panagsursuro nga agbasa. Nupay kasta, nalabit ibilangmo ti panagbasa iti libro wenno uray iti maysa nga artikulo ti magasin a kas iti panagtomar iti agas: Ammom a pagimbagam, ngem kaykayatmo a liklikan.

Pinagsaludsodan ti Agriingkayo! dagiti agtutubo iti 11 a pagilian tapno maammuan no ania ti makunada maipapan kadagiti pakarigatan ken nagunggonada iti panagbasbasada. Adtoy ti nakunada.

Apay a marigatanka nga agbasa?

“Awan panawenko nga agbasa iti dayta.”—Semsihan, 19, Alemania.

“Narigat ti agbasa. Panagkunak, adda sadsadutko.”—Ezekiel, 19, Pilipinas.

“Kagurgurak ti mapilit nga agbasa maipapan kadagiti makauma a banag.”—Christian, 15, England.

“No naingpis ti libro, kasla kayatko a basaen. Ngem no nabengbeng, maamakak.”—Eriko, 18, Japan.

“Nalakaak a masinga iti dadduma pay a banag. Diak maipamaysa ti panunotko.”—Francisco, 13, South Africa.

Maiparparegta kadagiti Kristiano nga agtutubo nga agbasada iti Biblia. (Salmo 1:1-3) Marigatanka aya? No wen, apay?

“Nagdakkel a libro ti Biblia! Panagkunak, diak mairingpas a basaen iti intero a panagbiagko!”—Anna, 13, Russia.

“Narigat a maawatan ken saan unay a makalinglingay ti dadduma a paset ti Biblia.”—Jezreel, 11, India.

“Marigatanak a kanayon nga agbasa iti Biblia gapu ta saan a naurnos ti eskediulko.”—Elsa, 19, England.

“Marigatanak agsipud ta maibus ti tiempok gapu kadagiti trabahok idiay balay ken leksionko idiay eskuelaan.”—Zurisadai, 14, Mexico.

“Narigat a basaen ti Biblia agsipud ta kasla diak malimitaran ti tiempok a mangaramid kadagiti pagesmak.”—Sho, 14, Japan.

Nalawag a narigat ti agbasa. Ngem dakkel met aya ti magunggonam? Kasano a nagunggonaanka iti panagbasam?

“Ti panagbasa ti nangpauneg iti pannakaammok, ket nagbalinak a naturtured no makisarsaritaak kadagiti tattao.”—Monisha, 14, India.

“Bang-arannak ti panagbasa ken pukawenna dagiti pakadukotak.”—Alison, 17, Australia.

“Ti panagbasa ti makatulong tapno makapanak kadagiti lugar a diak pulos madanon.”—Duane, 19, South Africa.

“Ti panagbasa ti makatulong kaniak nga agsukimat, imbes nga agpannurayak iti ibagbaga ti sabsabali.”—Abihu, 16, Mexico.

Ania ti nakatulong kenka a mangtagiragsak iti panagbasam?

“Sipud idi ubingak, pinaregtadak dagiti nagannak kaniak nga agbasa iti napigsa.”—Tanya, 18, India.

“Pinaregtadak dagiti nagannak kaniak nga usarek ti imahinasionko bayat nga agbasbasaak ken iladawanko iti panunotko dagiti pasamak.”—Daniel, 18, England.

“Insingasing ni tatang a rugiak a basaen dagiti libro ti Biblia nga ad-adda a kaay-ayok, kas iti Salmo ken Proverbio. Ita, makaparagsaken kaniak ti agbasa iti Biblia, imbes a makapadagsen.”—Charene, 16, South Africa.

“Idi agtawenakon iti uppat, inggatangandak da tatang ken nanangko iti lamisaan, tugaw, ken estante nga addaan iti amin a libro nga inurnongda agpaay kaniak sipud idi naipasngayak.”—Airi, 14, Japan.

Apay a napateg kenka ti agbasa iti Biblia?

“Patien ti tattao ti adu a banag a saan nga agpayso maipapan iti Biblia. Nasaysayaat nga amang no masukimatmo a mismo dagitoy.” (Aramid 17:11)—Matthew, 15, Estados Unidos.

“Ti Biblia kalikagumanna ti nauneg a panagpanunot. Ngem ti panagbasa ti nakatulong kaniak a silalawag a mangyebkas iti opinionko buyogen ti panagtalek no makisarsaritaak iti sabsabali maipapan kadagiti patpatiek.” (1 Timoteo 4:13)—Jane, 19, England.

“No agbasbasaak iti Biblia, panagriknak ket makisarsarita a mismo ni Jehova kaniak. No dadduma dayta ti mangtukay kaniak.” (Hebreo 4:12)—Obadiah, 15, India.

“Sursuruek a tagiragsaken ti agbasa iti Biblia agsipud ta ibagbagana kaniak ti pampanunoten ni Jehova maipapan kaniak ket ipapaayannak iti naimbag a balakad.” (Isaias 48:17, 18)—Viktoriya, 14, Russia.

Kaanoka nga agbasbasa iti Biblia ken kadagiti literatura a naibasar iti Biblia?

“Adda eskediulko. Kada mariingak iti tunggal agsapa, agbasaak iti maysa a kapitulo iti Biblia.”—Lais, 17, Brazil.

“Agbasaak iti Biblia ken iti dadduma pay a literatura a naibasar iti Biblia bayat nga agbibiaheak iti tren a mapan idiay eskuelaan. Iti napalabas nga uppat a tawen, naitultuloyko daytoy a nakairuamak.”—Taichi, 19, Japan.

“Agbasaak iti sumagmamano a paset ti Biblia tunggal rabii sakbay a maturogak.”—Maria, 15, Russia.

“Agbasaak iti uppat a panid ‘Ti Pagwanawanan’ wenno ‘Agriingkayo!’ iti kada aldaw. Nabaelak nga iringpas ti intero a magasin sakbay a dumteng ti sumaruno.”—Eriko, 18, Japan.

“Agbasbasaak iti Biblia tunggal agsapa sakbay a mapanak ageskuela.”—James, 17, England.

Kas ipakita dagiti naibagada, ti panagbasa ti mangpapigsa iti panagtalekmo iti bagim, ken mangpalawa iti pannakaammom. Ti panagbasa iti Biblia ken kadagiti pagbasaan a naibasar iti Biblia—agraman daytoy a magasin—ti tumulong met kenka nga ‘umadani iti Dios.’ (Santiago 4:8) Isu a nupay marigatanka nga agbasa, dimo isardeng dayta!

PANUNOTEM

◼ Apay a napateg kenka ti agbasa iti Sao ti Dios?

◼ Kasano a ‘magatangmo ti tiempo’ a mangbasa iti Biblia ken iti literatura a naibasar iti Biblia?—Efeso 5:15, 16.

[Kahon iti panid 16]

INAIGMO TI MABASBASAM ITI DADDUMA A BANAG

Inaigmo ti basbasaem iti datin nga ammom maipapan iti bagim ken iti aglawlawmo. Iyimtuodmo iti bagim dagiti sumaganad a saludsod:

◼ Inaigmo iti Datin nga Ammom Dagiti aya kasasaad wenno parikut a nailawlawag ket kaasping dagiti nailawlawag iti dadduma a libro, magasin, wenno estoria a nabasakon? Dagiti aya karakter ket addaan iti kababalin a kaasping iti kababalin ti dadduma a tattao a nabasakon?

◼ Inaigmo iti Bagim Kasano a nainaig daytoy nga impormasion iti kasasaadko, kulturak, ken kadagiti parikutko? Mabalinko kadi nga usaren dagiti material tapno makatulong kaniak a mangrisut kadagiti parikut wenno tapno ad-adda a sumayaat ti biagko?

◼ Inaigmo iti Aglawlawmo Ania ti isursuro daytoy nga impormasion maipapan iti nakaparsuaan, aglawlaw, nadumaduma a kultura, wenno parikut iti kagimongan? Ania ti isursuro kaniak daytoy nga impormasion maipapan iti Namarsua?