No Kasano ti Mangbangon iti Naragsak a Panagasawa
“Ti maysa a lalaki . . . masapul a makitipon iti asawana ket masapul nga agbalinda a maymaysa a lasag.”—GENESIS 2:24.
TI NAMARSUA kadatayo a ni Jehova a Dios, rinugianna ti panagasawa kas permanente a panagtipon ti lalaki ken babai. Kastoy ti ibaga ti Genesis 2:18, 22-24: “Kinuna ni Jehova a Dios: ‘Saan a nasayaat iti tao nga agtultuloy nga is-isuna. Mangaramidak iti katulongan maipaay kenkuana, kas maysa a komplimentona.’ Ket ni Jehova a Dios binukelna a babai ti paragpag nga innalana iti tao ket inyegna iti tao. Kalpasanna kinuna ti tao: ‘Daytoy iti kamaudiananna ti tulang dagiti tulangko ken lasag ti lasagko. Daytoy ket maawaganto iti Babai, agsipud ta iti lalaki ti nakaalaan daytoy.’ Dayta ti makagapu a ti maysa a lalaki panawannanto ti amana ken ti inana ket masapul a makitipon iti asawana ket masapul nga agbalinda a maymaysa a lasag.”
Kinapudnona, saan a nalaka ti mangbangon iti manayon ken naragsak a panagasawa, ngem sigurado a posible dayta. Adu ti siraragsak nga agassawan iti 50, 60, wenno ad-adu pay a tawen. Kasano a naaramidanda dayta? Ikagkagumaanda nga aramiden a naballigi ti panagasawada. Agtultuloy ken awanan panagimbubukodan a ‘gun-odenda ti anamong’ ti asawada. (1 Corinto 7:33, 34) Kasapulan dayta ti panangikagumaan. No situtulokkayo a mangikagumaan ken mangipaay iti tiempo, makaibangonkayo met iti naragsak ken agpaut a panagasawa.
Siaannad a Surotenyo ti Plano
Saan a pulos a mangrugi nga agbangon ti maysa a mapagtalkan a kontraktor no dina kitaen nga umuna ti plano. Umasping iti dayta, saantayo nga agballigi a mangbangon iti naragsak a panagasawa no ditay siaannad a kitaen ti plano ti Dios agpaay iti dayta. Adda dayta kadagiti pinanid ti Sao ti Dios. “Amin a Kasuratan impaltiing ti Dios ken makagunggona . . . iti panangpalinteg iti bambanag,” insurat ni apostol Pablo.—2 Timoteo 3:16.
No usigen ti agassawa no kasano a nakilangen ni Jesus kadagiti adalanna, adu ti masursuroda maipapan iti panagasawa. Apay? Iti Biblia, ti relasion ni Jesus ken dagidiay makipagturayto kenkuana idiay langit ket nayarig iti relasion ti agassawa. (2 Corinto 11:2) Nagtalinaed a matalek ni Jesus kadagiti kakaduana, uray pay kadagiti karirigatan a tiempo. “Inayatna ida agingga iti panungpalan.” (Juan 13:1) Kas naasi a lider, kanayon nga inkabilangan ni Jesus dagiti limitasion ken pagkapuyan dagiti pasurotna. Saan a pulos a nagkiddaw iti nalablabes ngem iti kabaelanda nga aramiden wenno ipaay.—Juan 16:12.
Uray pay idi pinaay dagiti kasingedan a gagayyemna, nagtalinaed latta a naalumamay ni Jesus. Saanna nga inungtan ida, no di ket inkagumaanna a sinursuruan ida buyogen ti nadiosan a kinapakumbaba ken kinamanangngaasi. (Mateo 11:28-30; Marcos 14:34-38; Juan 13:5-17) No kasta, no usigenyo a naimbag ti naasi a panangtrato ni Jesus kadagiti pasurotna ken ti wagas a panangsubadda iti panagayatna babaen ti panangayatda kenkuana, masursuroyo dagiti praktikal a leksion maipapan iti panangbangon iti naragsak a panagasawa.—1 Pedro 2:21.
Agibangonkayo iti Rabaw ti Natibker a Pamuon
Di maliklikan nga adda dagiti kakasla bagyo a pakasuotan a mangkurukor iti pundasion ti panagasawayo. Daytoy ti mangsubok kadagiti nakaibatayan ti relasionyo nga agassawa. Nupay kasta, ti kalagdaan a pamuon a pagbangonan iti naragsak a panagasawa ket ti kinamatalek iti tulagan a naibasar iti ayat. Impaganetget ni Jesus ti kinapateg ti kinamatalek iti tulagan idi kinunana: “Ti pinagsinnangol ti Dios saan koma a pagsinaen ti tao.” (Mateo 19:6) Ti ebkas a “ti tao” iramanna ti agassawa, a nagkinnari nga agtalinaedda a matalek iti maysa ken maysa.
Mabalin nga ibilang ti dadduma a makapadagsen ti pannakitulag, ta agkasapulan dayta iti adu a tiempo, kinabaknang, ken panangikagumaan. Gagangay itan a kaykayatda ti agnam-ay ngem ti agsakripisio a nairaman iti pannakitulagda iti maysa a tao.
Ania ti mangtaginayon iti tulagan iti pannakiasawa? Kastoy ti insurat ni apostol Pablo: “Dagiti lallaki ayatenda dagiti assawada a kas kadagiti bukodda a bagi.” (Efeso 5:28, 29) No kasta ngarud, ti “panagtipon” kaipapananna a maseknanka iti pagimbagan ti asawam a kas met iti pannakaseknanmo iti pagimbagam. Dagiti agassawa masapul a saan laeng a ti “bagida” ti panunotenda no di ket panunotenda ti “maysa ken maysa.”
Agbalinka a masirib no sibaballigi a risutem dagiti nakaro a parikutmo iti panagasawa. Paragsakennaka ti kasta a nagun-odam a kinasirib. “Naragsak ti tao a nakasarak iti sirib,” kuna ti Proverbio 3:13.
Agusarkayo Kadagiti Saan a Mauram a Materiales
Tapno agpaut ken natalged ti balay, masapul a nalagda ti pannakaaramidna. No kasta, ikagumaanyo nga ibangon ti panagasawayo maibatay iti kalat a manayon dayta. Agusarkayo kadagiti nalagda a materiales a makaandur kadagiti naapuy a pannakasuot ti kinamatalekyo. Ipategyo kas iti balitok dagiti napapateg a kalidad a kas iti nadiosan a kinasirib, kinamanagparabur, pannakaawat, panagbuteng iti Dios, kinadungngo, napasnek a panangapresiar kadagiti linteg ti Dios, ken napudno a pammati.
Ti kinaragsak ken pannakapnek iti panagasawa ket saan a naipasdek kadagiti namaterialan a sanikua wenno nangato a saad. Naipasdek dagitoy iti isip ken puso, ket mapalagda dagitoy a galad babaen kadagiti kinapudno iti Sao ti Dios. Mayaplikar met iti panagasawa ti pammagbaga nga “Aluadan koma ti tunggal maysa no kasano ti panagibangonna.”—1 Corinto 3:10.
No Tumaud Dagiti Parikut
Tapno agpaut ti pasdek, masapul nga adda nasayaat a plano ti pannakamantenerna. No kanayon nga agtinnulong ti agassawa a mangibanag kadagiti kalatda ken no agpinnadayaw ken agrinnaemda, kanayon a nalagda ti panagasawada. Saan a tumaud ti panagimbubukodan, ket mamedmedan ti pungtot.
No saan a marisut ti nakaro a pungtot ken pannakapaay, makeltay ti ayat ken panangipateg iti panagasawa. Binalakadan ni apostol Pablo dagiti lallaki: “Dakayo nga assawa a lallaki, itultuloyyo nga ayaten dagiti assawayo ket dikay agpungtot a sipapait kadakuada.” (Colosas 3:19) Agaplikar met dayta a prinsipio kadagiti assawa a babbai. Naragsak ken mapnek ti agassawa no ikagumaanda a dua ti agbalin a nakonsiderasion, naasi, ken mannakaawat. No liklikanda ti unget ken ti panangsalangad, maliklikanda ti agapa no adda dagiti tumaud a parikut. “Agbalinkayo a manangngaasi iti maysa ken maysa,” imparegta ni Pablo, “nadungngo a mannakipagrikna, a sibubulos a pakawanenyo ti maysa ken maysa.”—Efeso 4:32.
No ngay marurodka gapu iti kinaawan gaway, pannakaupay, wenno pannakatagibassit? Siaalumamay nga ilawlawagmo iti asawam ti makagapu iti pakaseknam. Ngem no babassit la a banag dagita, mabalin a ti kasayaatan ket abbongam laengen iti ayat.—1 Pedro 4:8.
Imbaga ti maysa nga asawa a lalaki, a nakapasaren iti sumagmamano a pannakasuot bayat ti 35 a tawen a panagasawana, a kasano man a pungtotmo iti asawam, “pulos a dikay [koma] sumardeng nga agtungtong.” Nainsiriban nga innayonna, “Dikay agsardeng nga aginnayat.”
Kabaelanyo ti Agibangon iti Naragsak a Panagasawa!
Talaga a saan a nalaka ti mangbangon iti naragsak a panagasawa. Nupay kasta, no determinado ken ikagumaan ti agassawa nga iraman ti Dios iti panagtiponda, naragsak ken natalgedto dayta. No kasta, siputanyo a naimbag ti naespirituan a kasasaad ti pamiliayo; patibkerenyo ti tulagan iti panagasawayo. Laglagipenyo a sigun ken Jesus, saan a ti asawa a lalaki wenno babai ti maidayaw iti naragsak a panagasawa, no di ket maidayaw a nangnangruna ni Jehova a Dios, ti Nangirugi iti panagasawa. “Ti pinagsinnangol ti Dios saan koma a pagsinaen ti tao.”—Mateo 19:6.
KANAYONAN PAY A BASAENYO
Ti libro a Ti Sekreto ti Kinaragsak iti Pamilia, nga impablaak dagiti Saksi ni Jehova, ket mangipaay kadagiti praktikal a singasing para iti panangbangon iti naragsak ken naballigi a panagasawa. Naammuan ti rinibu nga agassawa iti intero a lubong a dagiti praktikal a balakadna a naibasar iti Biblia ti nakatulong kadakuada a nangpasayaat iti relasionda.—Kitaem ti panid 32 daytoy a magasin.
[Kahon iti panid 9]
Ania ti Makatulong Kadakayo iti Panangbangon iti Naragsak a Panagasawa?
◼ Kanayon nga agkaduakayo nga agassawa nga agadal iti Sao ti Dios, ken agkararagkayo iti Dios maipaay iti tulong ken panangiwanwanna iti panangrisut kadagiti parikut.—Proverbio 3:5, 6; Filipos 4:6, 7; 2 Timoteo 3:16, 17.
◼ Ipamaysam laeng iti asawam ti seksual a tarigagaymo.—Proverbio 5:15-21; Hebreo 13:4.
◼ Kanayon a sipupudno, sipapasnek, ken siaayat a pagtungtonganyo dagiti problema ken diyo pagkinnaawatan.—Proverbio 15:22; 20:5; 25:11.
◼ Makisaoka iti asawam iti naasi ken nakonsiderasion a pamay-an; liklikam ti dagus nga agpungtot, agreklamo, ken nakas-ang a panangbabalaw.—Proverbio 15:1; 20:3; 21:9; 31:26, 28; Efeso 4:31, 32.
◼ Sipapakumbaba nga iyaplikarmo ti balakad ti Biblia uray no madlawmo a saan nga ar-aramiden ti asawam ti amin a rumbeng nga aramidenna koma.—Roma 14:12; 1 Pedro 3:1, 2.
◼ Ikagumaanyo a sukayen dagiti naespirituan a kalidad a dinakamat ti Biblia.—Galacia 5:22, 23; Colosas 3:12-14; 1 Pedro 3:3-6.
[Dagiti Ladawan iti panid 7]
Surotenyo ti plano ti Dios maipaay iti panagasawa, a masarakan iti Biblia
[Ladawan iti panid 7]
Aramidenyo a natibker a pamuon ti di agimbubukodan nga ayat ken kinamatalek
[Dagiti Ladawan iti panid 8]
Sukayenyo dagiti naespirituan a kalidad a makaandur kadagiti naapuy a pannakasuot
[Dagiti Ladawan iti panid 8]
Masapul ti panangikagumaan tapno mataginayon ti naragsak a panagasawa