Nagbalin a Naragsak ti Awanan Idi iti Namnama

KAS INSALAYSAY NI VICENTE GONZÁLEZ

Idi nadamag dagiti kaarruba a namimpat a pinaltogak ti bagik ngem diak natay, rinugiandakon nga awagan iti Superman. Ngem talaga a saanak a superman. Bay-andak a mangilawlawag no apay a pinadasko ti agpakamatay.

NAIPASNGAYAK idi 1951 idiay Guayaquil, Ecuador. Nagaramid dagiti dadakkelko iti pagtaenganda agpaay iti siam nga annakda idiay maawagan iti Kaiskuateran iti igid ti baybay. Awan permiso a nagindeg dagiti napanglaw a pamilia iti dayta. Dagiti balbalay ket naadigian iti kayo gapu ta naibangon dagitoy iti aluguog dagiti parakad ken iti igid ti baybay a malayus no agatab. Nadidingan dagitoy iti bulo ken naatepan iti galba. Awan ti korientemi isu nga uging ti paglutomi, ket dua a kilometro ti pagnaenmi iti kada aldaw tapno agsakdo iti inumenmi.

Ubbing pay ti kakabsatko idi nangrugida nga agtrabaho tapno makatulongda nga agsapul iti gastosen ti pamiliami. Idi agtawenak iti 16, nagtrabahoak kas mensahero iti maysa a paktoria, gapu ta simmardengakon a nageskuela. Rinugianmi nga aggagayyem ti naginum ken nagbiag nga imoral. No makonsiensiaak, agkompesarak. “Barok, naimbag ti panagkompesarmo,” kuna ti padi sakbay a pagawidennak ngem awan ti aniaman a naespirituan a pammagbagana. Isu nga intultuloyko dagiti ar-aramidek. Idi agangay, awanen ti aniamanna ti kanayon a panagbasol ken panagkompesarko, isu a simmardengakon a makimisa. Iti dayta met la a tiempo, nadlawko ti mapaspasamak a kinaawan hustisia iti kagimongak. Agpakpakarigat ti kaaduan a napanglaw nga agsapul iti pagbiagda, idinto ta ti sumagmamano a nabaknang ket agbibiag iti kinaluho. Kasla awan serserbi ti biag. Mariknak nga awan ti nasayaat a masanguanak wenno panggep ti biagko.

Maysa nga aldaw, naranaak nga agbasbasa ti dua a manangko ken dua nga adingko a babbai kadagiti publikasion dagiti Saksi ni Jehova. Rinugiak met ti nagbasa kadagitoy. Nagustuak a nangnangruna ti maysa a libro, Ti Kinapudno a Mangiturong iti Biag nga Awan Inggana. Nainkalintegan ti panangilawlawagna iti adu a topiko ti Biblia. Malagipko a kinunak, ‘Daytoy ti kinapudno!’ Ngem naamirisko iti simmaganad a 15 a tawen a saan a kaskarina ti agbiag a maitunos iti kinapudno.

Idi agtawenak iti 22, nagtrabahoak iti banko. Maysa nga aldaw, adda kaopisinaak a nangisuro kaniak no kasano a sililimed nga “immutang” iti kuarta ti banko sana binayadan idi agangay dayta nga “inutangna.” Rinugiak met a “pautangan” ti bagik, agingga a dakkel unayen ti naalak isu a saankon a mailimed ti inaramidko a krimen. Naladingitanak, ta ammok a pulos a saankon a mabayadan ti kuarta. Isu nga inkeddengko ti agpudno ket kalpasanna, agpakamatayak tapno maipakitak ti kasta unay a panagbabawik.

Kalpasan ti panagsuratko iti banko, gimmatangak iti bassit ti kalibrena a paltog, napanak iti naiputputong a lugar iti igid ti baybay, ket namindua a pinaltogak ti ulok ken namindua met iti barukongko. Saanak a natay, nupay nakaro ti pannakadunorko. Nasarakannak ti maysa a siklista ket dagus nga impannak iti ospital. Idi nakaungarak, nabistaak gapu iti panagtakaw isu a naibaludak. Idi nawayawayaanak, mabain ken malidlidayak, ta naibilangakon a maysa a kriminal. Yantangay nalasatak ti sugat a gapuanan ti uppat a bala, rinugiandakon dagiti kaarrubak nga awagan iti Superman.

Gundaway nga Agbalbaliw

Iti daytoy a tiempo, sinarungkarannak ni Paul Sánchez a maysa a misionero dagiti Saksi ni Jehova. Nadlawko a dagus ti nagpintas nga isemna. Nakaragragsak ken optimistiko a tao ni Paul, isu nga inawatko ti awisna a personal a panagadal iti Biblia. Kinunak, ‘Bareng matulongannak a mangbirok iti kinaragsak ken panggep iti biag.’

Babaen iti tulong ni Paul, naammuak nga adda panggep ti Dios para kadagiti tattao ket addanto aldaw a dagidiay agayat ken agtulnog Kenkuana agbiagdanto iti naindagaan a paraiso. (Salmo 37:29) Naammuak met a saan a nakem ti Dios ti kinaawan hustisia ken kinapanglaw, no di ket maigapu iti iyaalsa ti sangatauan iti Dios. (Deuteronomio 32:4, 5) Kasla silaw iti biagko dagitoy a kinapudno. Ngem narigrigat nga amang ti mangbalbaliw iti personalidadko ngem ti agadal iti Biblia.

Nakastrekak iti maysa a trabaho iti opisina a makasapul iti panangiggemko kadagiti pondo ti kompania. Nasulisogak manen ket rinugiak ti nagtakaw. Idi saankon a mailemmeng ti panagtakawko, immakarak iti sabali a siudad idiay Ecuador iti agarup nakatawen. Pinadasko ti agtalaw iti pagilian, ngem diak nakapanaw, isu a nagawidak.

Nasarakannak manen ni Paul, ket intuloymi ti nagadal. Iti daytoy a tiempo, desididoakon a mangyaplikar kadagiti prinsipio ti Biblia iti biagko ken agserbi ken Jehova. Isut’ gapuna nga impudnok ken Paul ti panagtakawko. Prangka unay ti balakadna kaniak. Imbagana kaniak dagiti bersikulo ti Biblia a kas iti Efeso 4:28, a kunana: “Ti agtatakaw saan koma nga agtakawen, no di ket agtrabaho koma a sipipinget.” Naamirisko a masapul nga ipudnok ti panagtakawko ken awatek dagiti pagbanaganna.

Bayat a pampanunotek ti kasasaadko, rinugiak ti nagtrabaho a bukodko kas maysa a pintor. Maysa nga aldaw, adda lalaki nga immay iti estudiok ta nagustuanna kano ti maysa a lamina. Ngem isut’ maysa a detektib ket adda intugotna a papeles a mangpaneknek iti karbenganna a mangaresto kaniak. Isu a naidarumak manen ken kalpasanna, naibaludak. Binisitanak ni Paul, ket inkarik kenkuana, “Saanmonto a pagbabawian ti panagreggetmo a tumulong kaniak a mangtarus iti Biblia.” Intultuloymi ti nagadal iti Biblia bayat ti kaaddak idiay pagbaludan.

Pinaneknekak ti Kinapasnekko

Idi nawayawayaanak, desididoakon nga agserbi ken Jehova iti amin a pusok, ket pinaneknekak ti kinapasnekko iti simmaganad a dua a tawen. Idi 1988, nabautisaranak kas maysa a Saksi ni Jehova. Gapu ta magagaranak a mangbayad iti sinayangko a tiempo, rinugiak ti amin-tiempo a panagserbi kas maysa a payunir, ket inkagumaak a dinanon dagiti miembro ti gang dagiti agtutubo.

Maysa a gang ti masansan nga agsurat wenno agdrowing iti kumporme iti pader ti Kingdom Hall-mi. Agsipud ta am-ammok dagiti miembro ken ammok ti pagnanaedanda, sinarungkarak ida. Inlawlawagko ti panggep ti Kingdom Hall, ket impakpakaasik a raemenda ti pasdekmi. Sipud idi, awanen dagiti surat ken drowing.

Kalpasanna, idi tartarimaanenmi ti Kingdom Hall ken ik-ikkatenmi ti daan a pinta, maysa nga agtutubo a Saksi nga agnagan iti Fernando ti nakakita iti naisurat a “Ti Tukak” (La Rana, iti Espaniol). “Siak dayta!” kinunana. Idi miembro pay laeng ti maysa a gang, insurat ni Fernando ti birngasna iti Kingdom Hall. Ita, ik-ikkatennan!

Nakadroga ni Fernando idi damo a nakitak. Impan ni nanangna iti dua a pagpaagasan tapno maisardengna ti agdroga, ngem awan latta. Isu a nauman ni nanangna kenkuana, immakar, sa pinanawanna ni Fernando nga agmaymaysa iti balayda. Inlako ni Fernando ti amin a napateg a banag iti balayda, uray pay dagiti rikep ti ridaw, tawa, ken atep ti balay, tapno maitultuloyna ti bisiona. Maysa nga aldaw inasitgak iti kalsada, inikkak iti soft drink, ken intukonko nga iyadalak iti Biblia. Inawatna ket maragsakanak ta impangagna ti kinapudno. Insardengnan ti makibarkada ken agdroga, rinugiannan ti tumabuno kadagiti Nakristianuan a gimong, ket di nagbayag, nabautisaran.

No agkaduakami ken Fernando a mangasaba iti balaybalay, masansan a mabigbigdakami dagiti tattao isu a pukkawandakami iti “Ti Tukak!” wenno “Superman!” sa damagenda no ania ti ar-aramidenmi. Masdaawda a makakita a nakaiggemen iti Biblia a sumarsarungkar kadakuada ti dati a miembro ti gang ken dati a mannanakaw.

Naminsan, kaskasabaak ti maysa a lalaki bayat a makisasao ni Fernando iti kaarruba dayta a lalaki. Intudona ni Fernando, sa kinuna ti lalaki kaniak: “Makitam daydiay a lalaki? Adda idi tiempo a tinutokanna ti ulok iti paltog.” Impanamnamak kenkuana a nagbalbaliwen ni Fernando ket agbibiag itan a maitunos kadagiti prinsipio ti Biblia. Kinapudnona, idi nalpas ni Fernando a nakisarita iti kaarruba, inayabak ket inyam-ammok kenkuana. “Barok,” kuna ti bumalay, “padayawanka iti panangbalbaliwmo iti biagmo.”

Diak mabilangen ti namin-adu a daras a panangibaga dagiti tattao iti kasta met laeng maipapan kadakami ken Fernando. Dagitoy ti nangted iti gundawaymi a mangasaba, isu nga adu ti mayadalanmi iti Biblia. Wen, ipagpannakkelmi ken Fernando a maibilangkami a Saksi ni Jehova.

Maysa a Nagpateg a Pasamak iti Biagko

Idi 2001, idi agtawenakon iti 50, nasdaaw ken naragsakanak a naawis nga agadal iti klase ti Ministerial Training School a naangay idiay Peru. Iti walo a lawas, isuro daytoy nga eskuelaan kadagiti kualipikado a Saksi, dagiti nauneg a naespirituan a pannursuro a makatulong iti ministerioda.

Naragsakanak iti amin a paset ti panagadal, malaksid ti maysa—ti panagpalawag iti publiko, gapu ta nerbiosoak. Adu kadagiti ub-ubing nga estudiante ti naglalaing nga agpalawag ken kasla naturtured ti pakinakemda. Ngem mababainak idi damok ti agpalawag, a parikutkon sipud pay idi ubingak. Nagkutukot dagiti tumengko, nagpigerger dagiti aglingling-et nga imak, ken nagpigerger ti timekko. Ngem tinulongannak ni Jehova babaen iti nasantuan nga espirituna ken dagiti naayat a kakabsat. Naseknan pay ketdi kaniak ti maysa kadagiti instruktor ket kalpasan ti klase, tultulongannak a mangisagana kadagiti palawagko. Kangrunaan ti amin, insuronak nga agtalek ken Jehova. Idi agturpos ti klase, iti damo unay iti biagko, talaga a naragsakanak a nagpalawag iti sango ti tallaong.

Iti kombension dagiti Saksi ni Jehova idiay Guayaquil, nasubok unay ti kinatured ti pakinakemko. Iti sanguanan ti 25,000 a tattao, insalaysayko no kasano a nagbalinak a Saksi. Ngem bayat nga agsasaoak, maluyaanak gapu iti pribilehio a mangparegta iti nagadu a tattao, isu a nangrugin nga agpigerger ti timekko. Kalpasanna, inasitgannak ti maysa a nakikombension ket kinunana, “Kabsat González, idi isalsalaysaymo ti kapadasam, nakalua ti amin a dumdumngeg.” Talaga a kayatko a ti pakasaritaak ket agbalin a pammaregta kadagidiay mangikagkagumaan a mangparmek iti dati a wagas ti panagbiagda.

Agserserbiak itan kas maysa a panglakayen ken regular pioneer. Maragsakanak ta natulongak iti 16 a tattao a maaddaan iti umiso a pannakaammo iti kinapudno ti Biblia. Naragsakanak unay ta dagiti dadakkelko ken uppat kadagiti kakabsatko a babbai indedikarda metten ti biagda ken Jehova. Idi 2001, natay ni Nanang a matalek iti Dios. Agyamanak unay ken Jehova ta impalubosna a maam-ammok isuna, ket awanen ti ammok a nasaysayaat pay a panangipakita iti panangapresiarko no di ti panangawis iti dadduma pay nga umadani met kenkuana.—Santiago 4:8.

[Ladawan iti panid 12]

Ti natulongak a ni Fernando, Ti Tukak, a miembro idi ti maysa a gang

[Ladawan iti panid 12]

Ni Paul Sánchez, ti misionero a nangyadal kaniak iti Biblia

[Ladawan iti panid 13]

Ni Vicente González itatta