Masahe Para iti Maladaga?
BABAEN ITI MANNURAT TI AGRIINGKAYO! IDIAY ESPANIA
NI Anita, maysa nga agkabannuag nga ina a taga-Nigeria, digusenna ti maladagana sananto an-anaten a masahien. Agpadada a maragsakan iti dayta. “Dayta ti nakairuaman dagiti inna ditoy Nigeria kas panangaywan kadagiti maladagada,” inlawlawag ni Anita. “Ni nanangko gagangay idi a masahiennakami nga annakna. Ti masahe ket maysa a nagsayaat a pangpapigsa ken pangpabang-ar kadagiti masel ti maladaga. Bayat a masmasahiek ti anakko, kankantaak ken kasarsaritak, isu nga aggarakgak ken umisem met. Nakaay-ayat dayta a kapadasan!”
Iti adu a lugar, gagangay ti panangmasahe kadagiti maladaga ken umad-adu ti mangar-aramid iti dayta iti sumagmamano a pagilian iti Laud. Sigun iti Spanish Association for Infant Massage, ti panangmasahe ket naannad, nadungngo, ken makaay-ayo a pamay-an a makatulong iti ama wenno ina iti pisikal ken emosional pannakikomunikarna iti maladagana. Karaman iti dayta ti agsasaruno a naanat ngem kontrolado a panangmasahe kadagiti saka ken gurong ti maladaga agraman iti bukot, barukong, tian, takkiag, ken rupana.
Ania ti pagimbagan ti panangmasahe iti maladaga? Kangrunaan iti amin, mariknana a maay-ayat ken madungdungngo. Ti kappasngay saanna laeng a kasapulan ti taraon no di ket kasapulanna met ti panagayat ti nagannak kenkuana. Yantangay addan riknana sipud pannakaipasngayna, ti naanat a panangmasahe kenkuana ti ama wenno ina ti mangiparikna iti daytoy nga ayat. Mayallatiw iti maladaga ti kaaduan a pisikal ken emosional nga impormasion. Makatulong ngarud ti panangmasahe tapno mapauneg ti panangdungngo ti nagannak iti anakda manipud pay iti pannakaipasngayna.
Malaksid iti maipariknana nga ayat, ti panangmasahe ket suruanna ti maladaga nga agrelaks, isu nga ad-adda a marnekan a maturog ken saan unay a managsangit. Mabalin met a makatulong ti masahe tapno pumigsa dagiti masel ken sumayaat ti andar ti puso, bagis, ken barana. Sigun iti dadduma a tattao, sumayaat met ti sistema ti imiunidad ti maladaga. Ket gapu ta magutugot dagiti sentido ti maladaga kas iti panagrikna, panagkita, ken panagdengngeg, makatulong met ti panangmasahe tapno lumaing nga agikabesa ken agsursuro.
Inadal metten ti dadduma nga ospital ti kinapateg ti panangmasahe kadagiti maladaga. Kas pagarigan, natakuatan iti maysa a panagadal a dagiti kurang ti bulanda a maladaga a namin-adu a namasahe, mabalindanton ti mayawid manipud ospital pito nga aldaw a nasapsapa ngem kadagidiay saan a namasahe. Ad-adda met a dimmagsenda agingga iti 47 a porsiento no idilig kadagidiay saan a namasahe.
Nabatad a saan laeng a dagiti nataengan ti magunggonaan iti makaay-ayo a pannakamasahe! Siempre, para kadagiti maladaga, saan laeng a makapabang-ar kadagiti masel ti pannakamasahe. Dayta ket ayat a maiparikna babaen kadagiti managayat nga ima ken naanat a ramay, agraman ti nakaragragsak a rupa.