Panangagas nga Agusar iti Dara—Natalged Kadi ti Masakbayanna?
“Ti panangagas nga agusar iti dara ket agtultuloy a kaasping ti pannagna iti napuskol a kabakiran iti tropiko a sadiay, nadalusanen dagiti masinunuo a dalan. Nupay kasta, nasken latta ti panagannad, ta mabalin nga adda pay laeng dagiti kabbaro ken di makita a peggad a pakaisagmakan dagiti di naannad.”—Ian M. Franklin, propesor ti panangagas nga agusar iti dara.
IDI naipamaysa a naamiris ti dara kalpasan ti epidemia ti AIDS iti intero a lubong idi dekada 1980, kimmaro ti panangikagumaan a mangikkat kadagiti “di makita a peggadna.” Kaskasdi, adda pay laeng dagiti nakaro a lapped. Idi Hunio 2005, inaklon ti World Health Organization: “Iti nadumaduma a pagilian, . . . nagdakkel ti nagdudumaan ti pananggun-od iti natalged a panangyalison.” Apay?
Iti adu a pagilian, awan dagiti organisado a programa agpaay iti intero a nasion tapno masigurado a natalged ti panagkolekta, panageksamen, ken panangibiahe iti dara wenno kadagiti paspasetna. No dadduma, nakapegpeggad pay ti pamay-an ti pannakaidulin dagiti suplay a dara—kadagiti di unay nasayaat ti pannakamantenerna a refrigerator wenno kahon a pagpalamiisan iti taraon! No awan dagiti annuroten maipapan iti kinatalged, mabalin nga agsakit dagiti pasiente gapu iti dara a naala iti tao nga agnanaed iti nagadayo a lugar.
Dara a Di Makayakar iti Sakit—Narigat a Magun-odan
Sigun iti dadduma a pagilian, nadaldalus itan ti suplayda a dara ngem idi. Ngem masapul latta nga agannadda. Kastoy ti nailanad iti umuna a panid ti “Maiwarwaras nga Impormasion” nga inaramid ti tallo nga ahensia a mangtamtaming iti suplay a dara iti Estados Unidos: “PAKDAAR: Gapu ta aggapu iti dara ti tao ti puro a dara ken dagiti paspasetna, mabalin nga adda peggad a makayakar dagitoy kadagiti makaimpeksion a banag a kas iti virus dagiti nakaro a sakit. . . . Adda latta peggad uray no naannad ti panangpili kadagiti agdonar ken adda dagiti laboratorio a mangeksamen iti dayta.”
Nainkalintegan ngarud a kinuna ni Peter Carolan, ti kangatuan ti saadna nga opisial ti International Federation of Red Cross and Red Crescent Societies: “Saan a pulos a maibaga a naan-anay a natalged ti suplay a dara.” Kinunana pay: “Kanayon nga addanto latta baro a sakit wenno virus a saan pay a masuksukimat ita.”
No ngay adda agparang a baro a makaakar a sakit a kas iti AIDS, a saan a kaskarina a mailasin uray nabayagen ken nalaka a mayakar babaen iti dara? Iti panagbitlana iti komperensia dagiti doktor idiay Prague, Czech Republic, idi Abril 2005, ni Dr. Harvey G. Klein iti U.S. National Institutes of Health imbagana a mamagpanunot dayta a banag. Imbagana pay: “Kas idi immuna a nagparang ti AIDS, dagiti agur-urnong kadagiti paset ti dara saandanto a naan-anay a sisasagana a manglapped iti epidemia a mayakar babaen iti panangyalison.”
Dagiti Panagkamali ken Epekto ti Panangyalison
Ania dagiti kangrunaan a peggad a nainaig iti panangyalison kadagiti pasiente kadagiti nabaknang a pagilian? Dagitoy dagiti panagkamali iti panangtaming iti dara ken dagiti epektona iti imiunidad. Maipapan iti panagadal ti Canada idi 2001, impadamag ti warnakan a Globe and Mail a rinibu kadagiti kaso maipapan iti panangyalison iti dara ti nainaig iti kamali a panangyalison. Mabalin a pakatayan koma dayta gapu iti “panangala iti sampol a dara manipud iti di umiso a pasiente, di umiso a panangikabil iti etiketa ken panangkiddaw iti dara para iti sabali a pasiente.” Dagita a kamali ti nakatayan ti di kumurang nga 441 a tattao idiay Estados Unidos iti nagbaetan ti 1995 ken 2001.
Dagidiay nayalisonan iti dara a naggapu iti sabali a tao mapasaranda ti kas iti mapaspasaran dagiti maipasidong iti organ transplant, wenno panangsukat iti adda depektona a paset ti bagida. Mabalin a di mailasin dayta ti sistema ti imiunidad ket ibilangna a sabali a tisyu. No dadduma, talaga a kumapuy ti resistensia ti bagi gapu iti panangyalison iti dara. No kumapuy ti resistensia, nabibiit a maimpeksion ti pasiente kalpasan a naopera ken maapektaran kadagiti virus a saan idi nga aktibo. Di ngarud pakasdaawan a ni Propesor Ian M. Franklin, a naadaw iti pangrugian daytoy nga artikulo, kastoy ti imparegtana kadagiti doktor: “Agpanunotkayo a naimbag sakbay nga iyalisonanyo dagiti pasiente.”
Iyebkas Dagiti Eksperto ti Opinionda
Gapu iti kasta a pannakaammoda, ad-addan a tingtingitingen ti umad-adu a doktor ken dagiti katulonganda no agusarda iti dara wenno saan iti panangagasda. Kastoy ti impadamag ti libro a Dailey’s Notes on Blood: “Kuna ti dadduma a doktor a napeggad nga agas ti dara a naggapu iti sabali a tao ket maiparit ti pannakausarna no ikeddeng ti kinasamayna sigun iti alagaden a maus-usar iti dadduma nga agas.”
Idi arinunos ti 2004, kastoy ti imbaga ni Propesor Bruce Spiess maipapan iti panangyalison iti kangrunaan a paset ti dara kadagiti pasiente a maop-opera ti pusoda: “No adda man, manmano laeng dagiti artikulo [iti medisina] a mangpaneknek a ti panangyalison ket talaga a mangpasayaat iti kasasaad ti pasiente.” Kinapudnona, insuratna nga adu kadagita a panangyalison “ti ad-adda a mangdangran imbes a mangpaimbag iti dandani amin a kasasaad malaksid pay iti nakaro a pannakadangran wenno pannakadunor ti bagi.” Dakdakkel pay “ti posibilidad a makaipaay iti sakit a pulmonia, impeksion, atake iti puso ken istrok.”
Nupay mainanama nga agpapada koma, adu ti masdaaw apaman a maammuanda a dandani saan gayam nga agpapada dagiti maannurot iti panangyalison iti dara. Nabiit pay nga impalagip ni Dr. Gabriel Pedraza kadagiti katrabahuanna idiay Chile a “saan unay a nalawag dagiti maannurot maipapan iti panangyalison,” isu a “narigat ti . . . panangyaplikar kadagiti pagannurotan nga akseptaren ti amin.” Di pakasdaawan a ni Brian McClelland a direktor iti Edinburgh and Scotland Blood Transfusion Service, kiniddawna kadagiti doktor a “laglagipenda a ti panangyalison ket maysa a panangi-transplant isu a kasapulan a tingitingenda a naimbag.” Insingasingna a panunoten a naimbag dagiti doktor ti saludsod a, “No siak wenno no anakko ti mayalisonan, mayatak kadi?”
Kinapudnona, adun nga agtartrabaho iti tay-ak ti medisina ti nangyebkas iti kaasping iti imbaga ti maysa a hematologo (eksperto iti siensia medikal a mangtaming iti dara ken kadagiti paset ti bagi nga agpataud iti dara) iti Agriingkayo!: “Dakami nga espesialista iti panangagas nga agusar iti dara saanmi a kayat ti mayalisonan wenno mangyalison iti dara.” No kasta ti rikna ti sumagmamano a nalaing nga indibidual a doktor, ania ngay koma ngarud ti rikna dagiti pasiente?
Agbalbaliwto Kadi ti Medisina?
Mabalin a kunaem: ‘No nagadu ti peggad ti panangagas nga agusar iti dara, apay ngarud a nagadu latta ti agus-usar iti dara, nangruna no adda metten dagiti alternatibo?’ Ti maysa a makagapu ket adu a doktor ti talaga a madi a mangbalbaliw kadagiti pamay-an ti panangagasda wenno saanda nga ammo dagiti agdama a maus-usar nga alternatibo ti panangyalison. Sigun iti maysa nga artikulo iti pagiwarnak a Transfusion, “dagiti doktor ikeddengda ti mangyalison sigun iti nasursuroda iti napalabas, panagadal ken panangtuladda iti maysa a kultura, ken iti ‘pangngeddengda a naibasar iti panangeksamenda iti pasiente.’”
Ti kinalaing ti doktor apektaranna met ti kaadu ti dara nga agsayasay bayat ti operasion. Insurat ni Dr. Beverley Hunt, iti London, England, nga “agduduma ti kaadu ti agsayasay a dara depende kadagiti siruhano, ket dumakdakkel ti panaginteres a mangsanay kadagiti siruhano maipapan iti nasayaat a pamay-an ti panangpasardeng iti panagpadara.” Kuna ti dadduma a nangina unay dagiti alternatibo ti panangyalison, nupay adu met dagiti damag a saan nga agpayso dayta. Nupay kasta, adu a doktor ti umanamong iti kinuna ti direktor medikal a ni Dr. Michael Rose: “Asinoman a pasiente a saan a mayalisonan iti dara ti talaga a nakaawat iti kasayaatan ti kalidadna a panagopera a mabalin a magun-odan.”a
Ti kasayaatan a kalidad ti panangagas—saan kadi a dayta ti kayatmo? No kasta, adda pagpadaanyo kadagiti tattao a nangyeg kenka iti daytoy a magasin. Pangngaasim ta itultuloymo nga ammuen ti naidumduma a takderda maipapan iti panangyalison iti dara.
[Footnote]
a Kitaem ti kahon a “Dagiti Alternatibo ti Panangyalison iti Dara,” iti panid 8.
[Blurb iti panid 6]
“Agpanunotkayo a naimbag sakbay nga iyalisonanyo dagiti pasiente.”—Propesor Ian M. Franklin
[Blurb iti panid 6]
“No siak wenno no anakko ti mayalisonan, mayatak kadi?”—Brian McClelland
[Kahon/Ladawan iti panid 7]
Ipapatay Gapu iti TRALI
Idi rugrugi ti dekada 1990 ti damo a pannakaipadamag ti transfusion-related acute lung injury (TRALI), wenno nakaro a pannakadangran ti bara maigapu iti panangyalison iti dara. Dayta ti mamagpeggad-biag a reaksion ti sistema ti imiunidad ti bagi kalpasan la unay a nayalisonan iti dara. Naammuan itan a ti TRALI ti pakaigapuan ti ipapatay ti ginasut iti kada tawen. Nupay kasta, atapen dagiti eksperto nga ad-adu pay dagiti matay. Ngamin, adu a mangngagas ti di makailasin kadagiti sintoma. Nupay saan pay a nalawag no ania a talaga ti makagapu iti kasta a reaksion ti bagi, sigun iti magasin a New Scientist, ti dara a pakaigapuan dayta ket “agparang a naggapu a nangnangruna kadagiti tattao a naapektaran iti nagduduma a tipo ti dara iti napalabas, kas. . . kadagiti tattao a namin-adun a nayalisonan iti dara.” Kuna ti maysa a damag a ti TRALI ti maysa kadagiti kangrunaanen a pakaigapuan iti ipapatay maigapu iti panangyalison iti dara idiay Estados Unidos ken Britania. Dayta ti gapuna a “dakdakkel payen a parikut dayta dagiti banko ti dara ngem kadagiti nalatak a sakit a kas iti HIV.”
[Kahon/Diagram iti panid 8, 9]
Ti Pakabuklan ti Dara
Kaaduanna, puro a dara ti ited dagiti agdonar. Ngem adu met ti agdonar iti plasma. Nupay sumagmamano a pagilian ti mangyalison iti puro a dara, masansan a masinasinan ti dara kadagiti kangrunaan a pasetna sakbay a masukimat ken mausar kas agas a mayalison. Usigem ti uppat a kangrunaan a pasetna, dagiti trabahoda, ken ti porsiento ti intero a kaadu ti dara nga irepresentar ti tunggal maysa.
TI PLASMA buklenna ti nagbaetan ti 52 ken 62 a porsiento ti puro a dara. Dayta a nakusnaw duyaw a pluido ti pakailaokan dagiti selula ti dara, protina, ken dadduma a substansia iti bagi sa maiwaras.
Danum met ti mangbukel iti 91.5 a porsiento iti plasma. Dagiti protina, a pagtaudan dagiti babassit a paset ti plasma, ti mangbukel iti 7 a porsiento iti plasma (agraman dagiti albumin, a mangbukel iti agarup 4 a porsiento iti plasma; dagiti globulin, nga agarup 3 a porsiento; ken ti fibrinogen, a kurang a 1 a porsiento). Ti nabatbati a 1.5 a porsiento iti plasma ket buklen ti dadduma a substansia, kas kadagiti sustansia, hormone, gas a mausar iti panaganges, electrolyte, bitamina, ken basura a nitrohena.
DAGITI PURAW A SELULA TI DARA buklenda ti nakurang a 1 a porsiento ti puro a dara. Dagitoy ti mangraut ken mangdadael kadagiti mabalin a makadangran a banag a kas kadagiti bakteria ken virus.
DAGITI PLATELET buklenda ti kurang a 1 a porsiento ti puro a dara. Dagitoy ti agbalay tapno malapdan ti panagsayasay ti dara kadagiti sugat.
DAGITI NALABAGA A SELULA TI DARA buklenda ti nagbaetan ti 38 ken 48 a porsiento ti puro a dara. Dagitoy a selula ti mangbibiag kadagiti selula babaen ti panangipaayda iti oksihena iti dayta ken panangikkatda iti carbon dioxide.
No kasano a ti plasma ti dara ket mabalin a pagtaudan ti nadumaduma a paset, mabalin met a maproseso ti dadduma a kangrunaan a paset ti dara tapno mailasin dagiti babbabassit a pasetna. Kas pagarigan, ti hemoglobin ket maysa a paset ti nalabaga a selula ti dara.
[Diagram]
PLASMA
DANUM 91.5%
DAGITI PROTINA 7%
DAGITI ALBUMIN
DAGITI GLOBULIN
DAGITI FIBRINOGEN
DADDUMA A SUBSTANSIA 1.5%
DAGITI SUSTANSIA
DAGITI HORMONE
DAGITI GAS A MAUSAR ITI PANAGANGES
DAGITI ELECTROLYTE
DAGITI BITAMINA
DAGITI BASURA NGA ADDAAN NITROHENA
[Credit Line]
Panid 9: Dagiti paset ti dara nga adda iti uneg dagiti sirkulo: This project has been funded in whole or in part with federal funds from the National Cancer Institute, National Institutes of Health, under contract N01-CO-12400. The content of this publication does not necessarily reflect the views or policies of the Department of Health and Human Services, nor does mention of trade names, commercial products, or organizations imply endorsement by the U.S. Government
[Kahon/Ladawan iti panid 8, 9]
Dagiti Alternatibo ti Panangyalison iti Dara
Iti napalabas nga innem a tawen, nakaibunongen dagiti Hospital Liaison Committee dagiti Saksi ni Jehova iti intero a lubong iti rinibu a kopia ti video a Transfusion-Alternative Strategies—Simple, Safe, Effective iti agarup 25 a pagsasao kadagiti agtartrabaho iti tay-ak ti medisina.b Mabuya iti dayta a video dagiti doktor a nalatak iti lubong a mangibagbaga kadagiti epektibo a pamay-an ti panangagas nga agdama a maar-aramat kadagiti pasiente a di mausar ti panangyalison iti dara. Mangipangpangagen dagiti tattao. Kas pagarigan, kalpasan a nabuya ti National Blood Service (NBS) idiay United Kingdom ti video idi arinunos ti 2001, sinuratanna ti amin a manedyer iti banko ti dara ken dagiti consultant hematologist iti intero a pagilian sa nangiragpin iti kopia daytoy a video. Naparegtada a nangbuya iti video gapu ta “umad-adu ti makaamiris a ti saan a panangyalison iti dara, no mabalin, ti maysa kadagiti panggep ti naimbag a panangagas.” Binigbig ti surat a “maanamongan ken makomendaran ti kaaduan a mensahe [iti video] ken maysa kadagiti itandudo unay ti NBS.”
[Footnote]
b Makiumanka iti maysa kadagiti Saksi ni Jehova tapno mabuyam ti DVD a Transfusion Alternatives—Documentary Series, nga impablaak dagiti Saksi ni Jehova.
[Kahon/Ladawan iti panid 9]
Panamagsisina Kadagiti Paset ti Dara—Panangusar Kadagiti Babbabassit a Paset ti Dara iti Panangagas
Kabaelanen ti siensia ken teknolohia nga ilasin ken pagsisinaen dagiti paset ti dara babaen iti proseso a maawagan iti fractionation. Kas pagarigan: Ti danum iti baybay, a 96.5 a porsiento ti danum, ket mabalin a sinasinaen, babaen iti proseso a fractionation tapno maala ti dadduma a ramenna, kas iti magnesium, bromine, ken siempre, ti asin. Umasping iti dayta, ti plasma ti dara, a daytoy ti mangbukel iti nasurok a kagudua iti kaadu ti puro a dara, ken nasurok a 90 a porsiento ti danum, ket mabalin a maproseso tapno maisina dagiti babbabassit a pasetna agraman dagiti protina, a kas iti albumin, fibrinogen, ken nadumaduma a globulin.
Kas paset ti panangagas, mabalin nga isingasing ti doktor ti pannakausar ti puro a paset ti plasma. Ti maysa a pagarigan isu ti nabaknang iti protina a cryoprecipitate, a magun-odan babaen iti panangipalamiis iti plasma agingga nga agyelo sa runawen. Daytoy di marunaw a paset ti plasma ti aduan kadagiti elemento a mangpabalay ken kadawyan a maited kadagiti pasiente tapno sumardeng ti panagpadarada. Dadduma a panangagas ti mabalin nga agusar iti produkto nga addaan iti paset ti dara, sangkabassit man wenno maysa a kangrunaan a paset ti dara.c Dadduma a protina ti plasma ti kanayon a mausar kadagiti ineksion a makatulong a mangpasayaat iti imiunidad kalpasan a naapektaran kadagiti makaakar a banag. Dandani amin a babassit a paset ti dara a maus-usar kadagiti agas ti addaan kadagiti protina a masarakan iti plasma ti dara.
Sigun iti Science News, “dagiti sientista nailasindan ti sumagmamano laeng a gasut kadagiti napattapatta a rinibu a protina a kadawyan a masarakan iti dara ti tao.” Bayat a rumangrang-ay ti pannakaawat iti dara iti masanguanan, mabalin a tumaud dagiti baro a produkto nga agtaud kadagitoy a protina.
[Footnote]
c Dagiti babassit a paset ti dara ti animal ket maus-usar met iti dadduma nga agas.
[Ladawan iti panid 6, 7]
Nakaan-annad ti dadduma a doktor ken dagiti katulonganda maipapan iti panangtamingda iti dara