Ti Panangmatmat ti Biblia

Agbalin Kadi nga Anghel Dagiti Tattao Inton Matayda?

NATAY ti maysa nga ubing a babai nga agnagan iti Argyro idi agtawen laeng iti pito. Maladingitan unay ti nagannakna a kimmita kenkuana a nakakawes iti puraw iti uneg ti lungonna. Kas pangliwliwa, kastoy ti kinuna ti ministro kadakuada: “Kayat ti Dios ti maaddaan iti maysa manen nga anghel, isu nga innalana ti ubing pay a ni Argyro tapno makikadua kenkuana. Ita, agtaytayaben ti kararuana iti aglawlaw ti trono ti Mannakabalin-amin.”

Sipapasnek a patien ti adu a tattao a dagiti anghel ket kararua dagiti natay a tattao, nupay manmano a relihion ti umanamong iti dayta a kapanunotan. Pinagbalin ti warnakan a nalatak dayta a kapanunotan kadagiti sine ken pabuya iti telebision maipapan kadagiti natay a tattao a ‘naanamongan nga agbalin’ nga anghel kalpasan a tinulongan ken sinalaknibanda dagiti sibibiag a tattao.

Talaga kadi a mainanamayo nga agbalinto nga anghel dagiti patpatgenyo iti biag inton matayda? Ania ti isursuro ti Biblia maipapan iti dayta? Tapno masungbatan, repasuentayo nga umuna ti agpayso nga ibagbaga ti Nasantuan a Kasuratan maipapan iti kasasaad dagiti anghel ken ti aktual a kasasaad dagiti natay.

Dagiti Anghel—Naisalsalumina a Parparsua

Dagiti anghel ket saan a makita ken mannakabalin nga ad-adipen ti Dios nga agnanaed idiay langit. Ti panagbiagda ket saan nga agpannuray kadagiti tattao. Dagiti anghel ket espiritu a pinarsua ti Dios. Kuna ti Biblia: “[Dagiti anghel] idaydayawda koma ti nagan ni Jehova; ta isu nagbilin, ket naparsuada.”—Salmo 148:2, 5.

Ipakita ti Biblia a minilion kadagiti matalek nga anghel, agraman dagiti serafin ken kerubin, ti situtulok nga agserserbi kadagiti naituding nga annongenda sigun kadagiti ranggo ken rebbengenda. (Salmo 103:20, 21; Isaias 6:1-7; Daniel 7:9, 10) Masapul pay kadi a matay dagiti tattao tapno mapaadda ti Dios amin dagita nga anghel? Kinapudnona, talaga nga imposible dayta. Apay?

Ipakita ti Biblia a nabayagen a naparsua dagiti anghel sakbay pay dagiti tattao. Idi pinarsua ni Jehova ti planeta a nagnaedan ti tattao idi agangay, dagiti anghel—a naindaniwan a nadakamat kas dagiti bituen ti agsapa—‘sirarag-o a nagikkisda a sangsangkamaysa ken nangrugida a nagdir-i buyogen ti panangpadayaw.’ (Job 38:4-7) No kasta, nabayagen a sibibiagda sakbay pay a naparsua dagiti tattao ditoy daga.

Kanayonanna, dagiti anghel ken tattao dakkel ti nagdumaan ti kasasaad ken akemda iti panggep ni Jehova.a Ti Dios pinarsuana ti tao “a nababbaba bassit ngem kadagiti anghel.” Pudno ngarud ti nadakamat a dagiti espiritu a parsua nabilbilegda ngem kadagiti tattao ken dakdakkel ti pannakabalin ken kapasidadda nga agpanunot. (Hebreo 2:7) Ti langit ti “umiso a lugar a pagnaedan” dagiti anghel. (Judas 6) No maipapan kadagiti tattao, ti orihinal a panggep ti Dios ket agbiagda nga agnanayon ditoy daga. (Genesis 1:28; 2:17; Salmo 37:29) No la koma nagtulnog iti Dios ti immuna a pagassawaan, pulos a saanda koma a natay. No kasta, sipud pay idi damo, ti tattao ken dagiti anghel tagtagiragsakendan ti nagduma unay a saadda iti panggep ti Dios.

Ania ti Mapasamak iti Tao No Matay?

Adtoy ti dadduma pay a napateg a saludsod a masapul nga usigentayo: Ania ti mapasamak kadagiti tattao no matayda? Agtultuloyda kadi nga agbibiag iti sabalin a kasasaad, nalabit kas kadagiti anghel idiay langit? Daytoy ti simple ken nalawag a sungbat ti Biblia: “Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman.” (Eclesiastes 9:5) Isu a no matay dagiti tattao, saandan a sibibiag. Awanen a pulos ti ammoda, saandan a makarikna, ken awanen ti aniaman a mapasaranda.

Adda kadi namnama agpaay kadagiti natay? Wen! Ipakpakita ti Biblia a ti panagungar ti namnama agpaay ti kaaduan a natayen a tattao. Kaaduan kadagiti natay ket mapagbiagto kas tattao iti paraiso a daga.—Lucas 23:43; Juan 5:28.

Adda sumagmamano a tattao nga addaan iti namnama a mapagungar tapno agbiagda idiay langit. Bassit ti bilangda—144,000 laeng. Nupay kasta, talaga a naan-anay a naiduma dagitoy 144,000 no idilig kadagiti parsua a gagangay a maawagan kas anghel. Kas pagarigan, agturay ti 144,000 kas imortal nga ar-ari ken papadi a kakadua ni Kristo. Addaanda iti autoridad kas uk-ukom. (1 Corinto 6:3; Apocalipsis 20:6) Isuda kadi dagiti maladaga a pimmusayen? Saan. Isuda dagiti pasurot ni Kristo a naan-anay a nasubok ken nasuot!—Lucas 22:28, 29.

Panunotenyo met ti nagdumaan ti natay a tattao ken dagiti sibibiag nga anghel. Ti natay a tattao “saanda a pulos sipapanunot iti aniaman,” idinto ta dagiti anghel naan-anay a sipupuotda, makariknada, ken makaaramidda kadagiti bukodda a desision. Adda wayawayada a mangngeddeng. (Genesis 6:2, 4; Salmo 146:4; 2 Pedro 2:4) Nailadawan dagiti natay kas “inutil,” wenno awanan pannakabalin, idinto ta dagiti anghel ket “nabileg iti pannakabalin.” (Isaias 26:14; Salmo 103:20) Kasta met a nupay matay ti tattao a kaputotan ni Adan gapu iti basol ken kinaimperpekto, perpekto dagiti managbuteng iti Dios nga anghel. Naan-anay a naanamongan ti takderda iti imatang ni Jehova.—Mateo 18:10.

Ti kapanunotan a dagiti anghel ket kararua dagiti natay a tattao ti mabalin a tema dagiti partuat-panunot a programa iti telebision wenno sine. Nupay kasta, saan a naibasar dayta iti Biblia. Dagiti kinapudno nga adda iti Biblia a nailawlawag iti daytoy nga artikulo ti makatulong kadatayo tapno ditay patien ti aniaman a di umiso a pagarup maipapan iti pagtungpalan dagiti natay a patpatgentayo iti biag. Ket ipasigurado kadatayo ti Biblia a dagiti matalek nga anghel—a naparsua kas iti kakikitada ken kas mannakabalin nga ad-adipen ti Dios—natantan-okda ngem kadagiti tattao ken kanayon a sisasaganada a mangaramid iti pagayatan ni Jehova. Makaparagsak ta pagayatan ti Dios nga usarenna dagiti anghel a mangbantay ken tumulong kadagidiay sipapasnek a mangraraem ken ni Jehova ken mangikagkagumaan nga agserbi kenkuana.—Salmo 34:7.

[Footnote]

NAPANUNOTMO KADIN?

◼ Dagiti kadi natay a patpatgem iti biag ket isuda dagiti anghel itan nga agserserbi iti Dios idiay langit?—Eclesiastes 9:5, 10.

◼ Matay kadi dagiti ubbing gapu ta kayat ti Dios ti maaddaan iti ad-adu pay nga anghel?—Job 34:10.

◼ Makapagsubli pay kadi dagiti natay tapno masalaknibanda dagiti sibibiag?—Isaias 26:14.

[Blurb iti panid 29]

“[Dagiti anghel] idaydayawda koma ti nagan ni Jehova; ta isu nagbilin, ket naparsuada.”​—Salmo 148:2, 5