Napateg Kadi no Ania ti Patiem?
ITI panagkunam, adda kadi panggep ti biag? No agpayso ti ebolusion, husto ngarud daytoy a nailanad iti pagiwarnak a Scientific American: “Ti agdama a pannakaawattayo iti ebolusion kaipapananna . . . nga awan ti kangrunaan a panggep ti biag.”
Panunotem ti ipasimudaag dagita a sasao. No awan ti kangrunaan a panggep ti biag, awan ngarud ti panggep ti biagmo no di laeng ti panagreggetmo nga agaramid iti sumagmamano a naimbag ken, nalabit, ipatawidmo ti dadduma a kalidad ti kinataom iti sumaganad a kaputotam. Inton matayka, naan-anayen nga awanka. Ti utekmo, agraman ti abilidadna nga agpanunot, agrason, ken agutob iti kaipapanan ti biag ket naiparna laeng a timmaud iti nakaparsuaan.
Saan la a dayta. Adu a mamati iti ebolusion ti mangikalintegan nga awan ti Dios wenno saan a bumallaet iti gannuat ti tattao. Aniaman ti agpayso, ti masakbayantayo ket agpannuray kadagiti lider ti politika, akademia, ken relihion. No usigentayo ti napalabas a pakasaritaanda, agtultuloy latta ti riribuk, panagbibinnusor, ken panagkunniber a mangdaddadael iti kagimongan ti tao. No talaga a pudno ti ebolusion, adda ngarud umdas a rason tapno agbiagtayo a maitunos daytoy replan a mangipasimudaag iti kinaawan namnama: “Mangan ken uminumtayo, ta inton bigat mataytayo.”—1 Corinto 15:32.
Daytoy ti masiguradom. Saan a patien dagiti Saksi ni Jehova dagiti nadakamat iti ngato. Saan met a patien dagiti Saksi ti naibaga a nakaibasaran dagita a sasao—ti ebolusion. Imbes ketdi, patien dagiti Saksi a pudno ti Biblia. (Juan 17:17) Gapuna, patienda ti ibagbagana a nagtaudantayo: “Adda kenka [Dios] ti ubbog ti biag.” (Salmo 36:9) Napateg ti ipasimudaag dagita a sasao.
Talaga nga adda panggep ti biag. Adda naayat a panggep ti Namarsua kadatayo agpaay iti amin a situtulok nga agbiag maitunos iti pagayatanna. (Eclesiastes 12:13) Nairaman iti dayta a panggep ti kari a panagbiag iti lubong nga awanan riribuk, panagbibinnusor, ken panagkunniber—ken uray ipapatay. (Isaias 2:4; 25:6-8) Minilion a Saksi ni Jehova iti intero a lubong ti mangpaneknek a ti panagadal maipapan iti Dios ken ti panagaramid iti pagayatanna ti makaipaay iti makapnek a biag a saan a maipaay ti uray asinoman!—Juan 17:3.
Talaga a napateg no ania ti patiem, ta mabalin nga apektaranna saan laeng a ti agdama a kinaragsakmo no di ket uray ti masakbayam. Makaammoka nga agpili. Patiem latta kadi ti teoria a dina mabalusingsing ti umad-adu nga ebidensia nga adda nangdisenio iti lubong ti nakaparsuaan? Wenno patiemon ti isursuro ti Biblia, a ti daga ken dagiti sibibiag iti rabawna ket inaramid ti nakaskasdaaw a Diseniador a ni Jehova, ti Dios a ‘nangparsua iti amin a banag’?—Apocalipsis 4:11.