Apay nga Ipalpalubos ti Dios ti Panagsagaba?

NO DADDUMA, ti tao nga agsalsaludsod iti “Apay?” agbirbirok iti liwliwa ken kadagiti sungbat, ta no agsaludsod ti maysa a tao gapu iti nakaro a pukaw, kasapulanna unay ti liwliwa. Mangipaay kadi ti Biblia iti kasta a liwliwa? Usigem ti tallo a napateg a kinapudno iti Biblia a mainaig iti daytoy a banag.

Umuna, saan a dakes a saludsoden iti Dios no apay nga ipalpalubosna ti panagsagaba. Madanagan ti dadduma amangan no ti panangyimtuodda iti kasta ipamatmatna a kurang ti pammatida iti Dios wenno awan pay ketdi ti panagraemda kenkuana. Maisupadi iti dayta, no sipapasnek a saludsodem daytoy, kapadam met ti adu a mararaem a tattao nga agsaludsod iti kasta. Ti matalek a mammadto a ni Habakuk inyimtuodna iti Dios: “Apay nga ipakitam kaniak ti kasta a nakaal-alingget a kinaawan hustisia? Apay nga ipalpalubosmo nga agraira ti kinaranggas, kinakillo, krimen, ken kinadangkok iti amin a lugar?” (Habakuk 1:3, Contemporary English Version) Ni Jehova a Dios saanna a tinubngar ni Habakuk. Imbes ketdi, inlanadna ti saludsod dayta a matalek a lalaki tapno mabasatayo amin.—Roma 15:4.

Maikadua, nasken a maawatantayo a maseknan ti Dios iti kasasaadtayo. Isu saan nga adayo ken karkarna; isu ket “managayat iti kinahustisia,” ken kagurana ti kinadangkes ken ti panagsagaba a resulta dayta. (Salmo 37:28; Proverbio 6:16-19) Idi kaaldawan ni Noe, ‘nasaktan ti puso’ ti Dios gapu iti agraraira a kinaranggas iti daga. (Genesis 6:5, 6) Saan a nagbalbaliw ti Dios; maseknan pay laeng maipapan kadagiti mapaspasamak ita.—Malakias 3:6.

Maikatlo, saan a pulos a ti Dios ti pagtaudan ti kinadakes. Nalawag nga ibaga ti Biblia daytoy. Dagiti mangibagbaga nga isu ti makinggapuanan kadagiti bambanag a kas iti panangpapatay ken terorismo padpadaksenda ti Dios. Usigem ti kuna ti Job 34:10: “Adayo koma iti pudno a Dios nga agtignay a sidadangkes, ken iti Mannakabalin-amin nga agtignay a di nainkalintegan!” Kasta met, kastoy ti kuna ti Santiago 1:13: “No adda iti sidong ti pannakasuot, awan koma ti agkuna: ‘Susuotennak ti Dios.’ Ta iti dakes a bambanag saan a mabalin a suoten ti Dios ket isu saanna met a suoten ti asinoman.” Isu a no nagsagabaka iti dakes, namnamaem a saan a ti Dios ti nagtaudan dayta.

Asino ti Agturay iti Lubong?

Iti laksid dagiti kalkalpastayo nga inusig, maisaludsodtayo latta, No ti Dios managayat, nainkalintegan, ken mannakabalin, apay nga adda dakes iti nagtetengngaantayo? Masapul a malawlawagan nga umuna ti saan nga umiso a pannakaawat. Pagarupen ti adu a tattao a ti Mannakabalin-amin a Dios ti agturay iti daytoy a lubong, daydiay mangiturturong iti isuamin a banag. “Awan ti uray maysa nga atomo wenno molekula iti uniberso a dina konkontrolen,” kinuna ti presidente ti maysa a seminario iti teolohia. Kasta kadi a talaga ti isursuro ti Biblia?

Saan. Adu ti masdaaw a makaammo no asino a talaga ti tuktukoyen ti Biblia nga agturay iti lubong. Kas pagarigan, kastoy ti kuna ti 1 Juan 5:19: “Ti intero a lubong adda iti pannakabalin daydiay nadangkes.” Asino daytoy a nadangkes? Impabigbig ni Jesu-Kristo a ni Satanas a Diablo dayta, daydiay inawaganna “ti agturay iti lubong.” (Juan 14:30) Saan kadi a nakalawlawag itan no apay a kasta unay ti kinadakes ken panagsagaba? Narungsot, manangallilaw, ken mananggura ni Satanas. Dagita ti kababalin a pakaigapuan ti adu a panagsagaba a mapaspasaran dagiti tattao. Ngem apay ngamin nga ipalubos ti Dios nga agturay ni Satanas?

Isyu a Timmaud Idiay Eden

Ania kadi ti marikna ti naayat ken mapagtalkan nga ama no isu ket publiko a naakusar nga inulbodanna dagiti annakna, aglablabes ti panangipakatna iti autoridadna, ken papaidamanna ida kadagiti naimbag a bambanag? Rautenna kadi ti nangpabasol kenkuana tapno mapaneknekanna a saan nga agpayso dagidiay a pammardaya? Siempre saan! Kinapudnona, no kasta ti aramidenna, mabalin a pampaneknekanna a pudno ti pammabasol.

Daytoy a pagarigan tulongannatayo a mangilawlawag iti wagas a panangtaming ni Jehova a Dios iti karit maibusor kenkuana idi rugrugi ti pakasaritaan ti tao iti lugar a naawagan iti Eden. Impakaammo ti Dios idi kadagiti immuna a tattao a da Adan ken Eva ti nakaskasdaaw a proyekto para kadagiti annakna ditoy daga. Masapul a punnuenda ti daga, iturayanda, ken pagbalinenda a paraiso ti intero a lubong. (Genesis 1:28) Kasta met, nagadu nga espiritu nga annak ti Dios ti interesado unay iti daytoy a nakaragragsak a proyekto.—Job 38:4, 7; Daniel 7:10.

Gapu ta naparabur a Dios, inikkan ni Jehova da Adan ken Eva iti pagtaengan a napintas a minuyongan agraman ti amin a naimas a prutas. Maysa laeng a kayo ti naiparit—ti “kayo ti pannakaammo iti naimbag ken dakes.” Babaen ti saanda a pannangan iti bunga daytoy a kayo, maipakita da Adan ken Eva ti naan-anay a panagtalekda iti Amada. Bigbigbigenda ti kalinteganna a mangikeddeng no ania ti naimbag ken dakes para kadagiti annakna.—Genesis 2:16, 17.

Ngem nakalkaldaang ta maysa nga espiritu nga anak ti Dios, a ginutugot ti tarigagay a maipaayan iti panagdayaw, ti nangibaga ken Eva a no mangan iti naiparit a bunga, saanto a matay. (Genesis 2:17; 3:1-5) No kasta, daytoy dakes nga anghel a ni Satanas agdadata a kinontrana ken inawaganna nga ulbod ti Dios! Ni Satanas pinabasolna met ti Dios a papaidamanna da Adan ken Eva iti napateg a pannakaammo. Kuna ni Satanas a dagiti tattao, rumbeng nga ikeddengda no ania ti naimbag ken dakes para kadakuada. No kasta, ni Satanas pinabasolna ti Dios a saan a maikari nga Agturay ken Ama ket imparipiripna nga isu, ni Satanas, ti ad-adda a maikari.

Babaen kadagita a kinasikap ken pammardaya, ti anghel pinagbalinna ti bagina a Satanas ken Diablo. Dagitoy a nagan kaipapananda ti “Bumusbusor” ken “Manangpardaya.” Ania ti inaramid da Adan ken Eva? Dimmasigda ken Satanas ket tinallikudanda ti Dios.—Genesis 3:6.

Mabalin koma a ni Jehova dinadaelna a dagus dagiti rebelde. Ngem kas nadakamat iti ilustrasiontayo, saan a marisut dagita nga isyu babaen ti naranggas a panagibales. Laglagipenyo met nga idi ni Satanas kinaritna ti Dios, nagadu nga anghel ti dumdumngeg. Kinapudnona, saan a naibaga ngem nagadu ti immalsa a nakikadua ken Satanas, isu a pinagbalinda ti bagbagida a demonio.—Marcos 1:34; 2 Pedro 2:4; Judas 6.

Apay a Saan a Nakibiang ti Dios?

Babaen ti panangsulisogna kada Adan ken Eva a pilienda ti panagbiag a naisina iti Namarsua kadakuada, kayariganna a binangon ni Satanas ti maysa a pamilia a saan a pudno nga agwaywayas, no di ket iturayanna ida. Ammoda man wenno saan dayta, babaen ti impluensia ti Diablo nga “amada,” daytoy a pamilia pinilida dagiti bukodda a kalat ken pagalagadan ti kababalin. (Juan 8:44) Ngem mangyeg kadi dayta a wagas ti panagbiag iti pudno a wayawaya ken agnanayon a kinaragsak? Ni Jehova pagaammona unay a saan. Kaskasdi, pinalubosanna dagiti rebelde a mangitultuloy iti panagwaywayasda, ta babaen laeng iti kastoy a wagas a marisut a namimpinsan dagiti isyu a napataud idiay Eden.

Iti nasurok nga 6,000 a tawen itan, nakaipasdeken ti sangatauan iti sistema ti bambanag iti intero a lubong, napadasnan ti amin a kita ti turay ken pagalagadan ti kababalin. Maragsakankayo kadi iti nagbanaganna? Pudno kadi a naragsak, natalna, ken nagkaykaysa dagiti tattao? Nabatad a saan ti sungbat! Naparigat ketdi ti sangatauan kadagiti gubat, bisin, natural a didigra, sakit, ken ipapatay. Dagitoy ti nakaigapuan ti “kinabarengbareng,” ‘ut-ot,’ ken ‘panagas-asug,’ kas ibagbaga ti Biblia.—Roma 8:19-22; Eclesiastes 8:9.

Ngem mabalin nga imtuoden ti dadduma, ‘Apay ngamin a saan a lapdan ti Dios dagita a trahedia?’ Kinapudnona, saan a kinahustisia dayta, ken mabalin a lumibeg ti isyu ta agparang a kasla awan pagdaksanna ti iyaalsa maibusor iti Dios. Gapuna, saan a nakibiang ni Jehova tapno laeng malapdan ti amin a krimen ken trahedia a resulta ti panagsukir dagiti tattao.a Awan a pulos ti pakainaigan ni Jehova iti makadangran a kinaulbod nga agballigi ti sistema ni Satanas, a nabirokan dayta ti sekreto ti panangragpat iti kinaragsak! Nupay kasta, maseknan ni Jehova kadagiti mapaspasamak. Kinapudnona, aktibo unay, kas makitatayo itan.

“Ni Amak Agtultuloy nga Agar-aramid”

Ipakita dagita a sasao ni Jesus a ti Dios saan nga agtugtugaw laeng nga awan ti ar-aramidenna, a buybuyaenna lattan a matungpal dagiti pasamak, no di ket okupado unay sipud idi napasamak ti iyaalsa idiay Eden. (Juan 5:17) Kas pagarigan, pinaltiinganna dagiti mannurat ti Biblia tapno ilanadda ti karina a ti umay a ‘bin-i’ dadaelenna ni Satanas ken amin nga agtalinaed a makikadua kenkuana. (Genesis 3:15) Maysa pay, babaen dayta a Bin-i, mangbuangay ti Dios iti maysa a gobierno, maysa a nailangitan a Pagarian, a mangbendision kadagiti natulnog a tattao ken mamagpatingga iti amin a pakaigapuan ti panagsagaba, uray pay ti ipapatay.—Genesis 22:18; Salmo 46:9; 72:16; Isaias 25:8; 33:24; Daniel 7:13, 14.

Tapno matungpal dagita a nagsayaat a kari, imbaon ni Jehova ditoy daga Daydiay agbalin a kangrunaan nga Agturay iti dayta a Pagarian. Awan sabali no di ni Jesu-Kristo, ti Anak ti Dios. (Galacia 3:16) Maitunos iti panggep ti Dios kenkuana, naiturong dagiti pannursuro ni Jesus iti Pagarian ti Dios. (Lucas 4:43) Kinapudnona, nangipaay ni Kristo iti pamalatpatan iti aramidennanto kas Ari dayta a Pagarian. Pinakanna dagiti nagadu a mabisin, pinaimbagna dagiti masakit, pinagungarna dagiti natay, ken impakitana pay ti pannakabalinna a mangparmek iti paniempo babaen ti panangpakalmana iti napigsa a bagyo. (Mateo 14:14-21; Marcos 4:37-39; Juan 11:43, 44) Kastoy ti kuna ti Biblia maipapan ken Jesus: “Uray pay no kasano ti kaadu dagiti kari ti Dios, nagbalinda a Wen babaen kenkuana.”—2 Corinto 1:20.

Dagidiay umimdeng ken Jesus ken rummuar “manipud iti lubong”—ti sistema dagiti bambanag a naisina iti Dios ken iturturayan ni Satanas—maabrasada iti pamilia ni Jehova. (Juan 15:19) Daytoy a pamilia dagiti pudno a Kristiano iti intero a lubong ket tartarawidwidan ti ayat, sipapasnek nga itandudoda ti kappia, ken determinadoda a mangpukaw iti aniaman a pakakitaan ti panangidumduma ken ti panangipababa iti sabali a puli (racism) iti nagtetengngaanda.—Malakias 3:17, 18; Juan 13:34, 35.

Imbes nga itandudoda ti agdama a lubong, dagiti pudno a Kristiano suportaran ken iwaragawagda ti Pagarian ti Dios kas panagtulnog iti bilin ni Jesus a nailanad iti Mateo 24:14. Panunotem: Siasino ti mangikaskasaba iti “naimbag a damag ti pagarian” iti intero a lubong? Kas maysa a naespirituan a pamilia iti intero a lubong, siasino ti nagkedked a makipaset iti panagdadangadang ken panagsusupiat ti nasion ken tribu? Ken siasino ti agpapaidalan iti Sao ti Dios, awaten man dagiti tattao ti pagalagadanna wenno saan? (1 Juan 5:3) Adun ti nakapaliiw a masarakan dagitoy a kababalin kadagiti Saksi ni Jehova. Pangngaasiyo ta usigenyo a mismo dagiti pammaneknek.

Pilienyo ti Turay ti Dios!

Ti sangatauan a naisina iti Dios ken inallilaw ni Satanas nakaipasdeken iti maysa a sistema ti lubong a mangpatpataud iti umad-adu a saem ken kinaawan namnama. Madaddadael pay ketdin ti daga! Iti kasumbangirna, ni Jehova nangipasdek iti nailangitan a gobierno a nangpasayaat iti biag ti nagadu a tattao ken nakaipaayen iti sigurado a namnama para iti tunggal maysa. (1 Timoteo 4:10) Ania ti pilienyo?

Itan ti tiempo nga agpili, ta saan nga ipalubos ti Dios nga agtultuloy ni Satanas ken ti dakes a lubongna iti awan inggana. Saan a pulos a nagbaliw ti panggep ti Dios idi punganay nga agbalin a paraiso daytoy daga. Gapu iti dayta, agtultuloy a tumibker ti Pagarian ken dagiti mangsupsuportar iti dayta, ngem ti lubong nga iturayan ni Satanas mapasaranna ti kumarkaro nga “ut-ot ti panagrigat” agingga a pagpatinggaen dayta Dios. (Mateo 24:3, 7, 8) Gapuna, no sipapasnek nga inyebkasmo ti “Apay?” iti Dios, dumngegka kenkuana babaen ti panagtalekmo iti makaliwliwa ken mangted iti namnama a mensahe ti Biblia. Uray pay ita, dagiti lua ti panagladingitmo nalabit agbalinen a lua ti rag-o.—Mateo 5:4; Apocalipsis 21:3, 4.

[Footnote]

[Dagiti Ladawan iti panid 7]

Mapnekkayo kadi kadagiti nagbanagan ti panangituray ti tao?

[Credit Lines]

Maladaga: © J. B. Russell/Panos Pictures; agsangsangit a babai: © Paul Lowe/Panos Pictures

[Ladawan iti panid 8, 9]

Isublinto ni Jesus ti Paraiso—ken pagungarennanto pay dagiti natay