Ti Biag a Nagbalin a Posible Gapu Kenkuana

“ADTOY! Maysa nga ari ti agturayto maipaay iti mismo a kinalinteg.” Dagiti makagutugot a kari a kas iti daytoy maipapan iti panagturay ni Jesus iti Pagarian ket nalatak a paset ti Biblia. Kastoy ti maysa pay a kari: “Ispalennanto daydiay napanglaw nga agpatpatulong, kasta met daydiay naparigatan ken siasinoman nga awanan katulongan. Isu maasianto iti daydiay nanumo ken iti daydiay napanglaw, ket dagiti kararua dagidiay napanglaw isalakannanto. . . . Ti darada napategto kadagiti matana.”—Isaias 32:1; Sal. 72:12-14.

Adda kadi asinoman a makaibaga a saan a kasapulan dagiti tattao iti intero a lubong ti kasta a nalinteg a turay? Indagadag ni Jesus kadagiti adalanna a sipapanunotda koma a kanayon iti Pagarian ti Dios. Insurona ida a mangikararag: “Umay koma ti pagariam. Maaramid koma ti pagayatam, kas sadi langit, kasta met iti daga.”—Mateo 6:9, 10.

Pammaneknek nga Asidegen ti Pagarian ti Dios

Kasanotayo nga ammo no kaano nga umay dayta a Pagarian kas sungbat iti dayta a kararag? Interesado unay dagiti nagkauna nga adalan ni Jesus, isu nga inyimtuodda: “Anianto ti pagilasinan ti kaaddam [kas agturturayen nga Ari] ken ti panungpalan ti sistema ti bambanag?” Simmungbat ni Jesus: “Ti nasion tumakderto a bumusor iti nasion . . . , addanto dagiti kinakirang ti taraon ken dagiti ginggined iti nadumaduma a disso. Amin dagitoy a banag ket pangrugian dagiti ut-ot ti panagrigat.” Kasta met nga impakdaarna: “Gapu iti iyaadu ti kinakillo, ti ayat ti ad-adu lumamiisto.”—Mateo 24:3-12.

Sigun iti maysa pay a padto ti Biblia, “kadagiti maudi nga aldaw dumtengto dagiti napeggad a tiempo a narigat a pakilangenan. Ta dagiti tattao managayatdanto iti bagbagida, managayat iti kuarta, napalangguad, natangsit, managtabbaaw, nasukir kadagiti nagannak, saan a managyaman, saan a nasungdo, awanan nainkasigudan a panagayat, saan a sidadaan iti aniaman a tulagan, manangparpardaya, awanan panagteppel, narungsot, awanan panagayat iti kinaimbag, mangliliput, natangken ti uloda, natangsit gapu iti panagpannakkel, managayat iti ragragsak imbes a managayat iti Dios, nga addaanda iti langa ti nadiosan a debosion ngem libakenda ti pannakabalin dayta.”—2 Timoteo 3:1-5.

Mabalin nga umanamongkayo a daytoy a pagilasinan “kadagiti maudi nga aldaw” ket apag-isu a tumukoy iti tiempo a pagbibiagantayo. Aglaplapusanan ti pammaneknek a matungtungpalen daytoy a padto iti Biblia: “Mangipasdekto ti Dios ti langit iti maysa a pagarian a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.”—Daniel 2:44.

Ti turay ti Pagarian babaen ti “Prinsipe ti Kappia” ikkatennanto ti amin a mangdadael iti talna dagidiay makalasat iti panungpalan daytoy a lubong. (Isaias 9:6) Kastoy ti kari ti padto ti Biblia: “Ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.” (1 Juan 2:17) Babaen daytoy a panungpalan ti lubong, dagiti mangar-aramid iti pagayatan ti Dios tagiragsakendanto ti napukaw ti sangatauan idi nagrebelde iti Dios ti immuna a nagannaktayo a da Adan ken Eva.

Ti Biag iti Din Agbayag

Inlawlawag ni Jesus: “Iti pannakaparsua manen, ti Anak ti tao agtugaw iti nadayag a tronona.” (Mateo 19:28) Ania daytoy a “pannakaparsua manen”? Ti sabali pay a patarus inusarna ti ebkas a “ti pannakapabaro ti amin a banag.” (New International Version) Ti sabali a salaysay ti Biblia awaganna dayta iti “um-umay a sistema ti bambanag.” (Lucas 18:30) Iti dayta a tiempo, ipakatto ni Jesus ti inted-Dios nga autoridadna kas Prinsipe ti Kappia babaen ti panangipaayna iti biag nga agnanayon kadagiti amin a mangpaneknek iti pammatida iti daton a pangsubbotna.—Juan 5:21.

Iti baro a sistema ti Dios, tagiragsakento dagiti tattao ti kita ti biag nga impaay ti Dios kada Adan ken Eva idi inkabilna ida iti Paraiso a daga. Malagiptayo a ti Dios imbilinna kadakuada nga aganakda, wen, tapno ‘punnuenda ti daga ken parukmaenda dayta.’ Ti annongenda ket isaknapda ti Paraiso nga Eden iti intero a daga! (Genesis 1:28) Umasping iti dayta, iti pannakaparsua manen, mapnonto ti daga kadagiti nakalasat iti panungpalan ti lubong, kadagiti annakda, ken kadagidiay natay ngem napagungaren. Makipasetdanto iti pannakaaramid ti daga a maysa a paraiso, kas iti orihinal a panggep ti Dios.

Usigenyo ti dadduma kadagiti bendision nga isursuro ti Biblia a tagiragsaken dagiti tattao iti dayta a baro a lubong ti kinalinteg.—2 Pedro 3:13.

Nupay kasla imposible dagiti kari a nailadawan kadagitoy a panid, sigurado a matungpalto dagitoy iti “um-umay a sistema ti bambanag.” Idi nagkararag iti Dios, dineskribir ni Jesus no ania ti makalikaguman kadagiti tattao tapno masagrapda dagitoy a bendision. Kunana: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Sapay koma ta maysakayo kadagidiay sipapakumbaba a mangsapul iti daytoy mangted-biag a pannakaammo.

[Blurb iti panid 7]

“Mapanagananto iti . . . Prinsipe ti Kappia. Ti kinaruay ti naprinsipean a panagturay ken ti kappia awanto ti ngudona.”—Isaias 9:6, 7

[Kahon/Dagiti Ladawan iti panid 8, 9]

Pagtaengan ken Trabaho Agpaay iti Amin

“Pudno unay a mangbangondanto iti balbalay ket agnaedda . . . Saandanto nga agmula ket sabali ti mangan.”—Isaias 65:21, 22.

Aglaplapusanan a Taraon Agpaay iti Amin

“Ti met laeng daga sigurado nga ipaaynanto ti bungana.” “Maaddanto ti naruay a bukbukel iti daga.”—Salmo 67:6; 72:16.

Sangalubongan a Talna Uray Kadagiti Animal

“Ti lobo pudno a makipagtaengto iti apagbiit iti kalakian a kordero, ket iti urbon a kalding makikaiddanto a mismo ti leopardo, . . . ket maysa a bassit nga ubing laeng ti mamangulonto kadakuada.”—Isaias 11:6.

Awanton ti Gubat, Talna iti Agnanayon

“Ti nasion saanto a mangitag-ay iti kampilan maibusor iti nasion, saandanto met a sursuruenen ti pannakigubat.” “Ti kinaruay ti naprinsipean a panagturay ken ti kappia awanto ti ngudona.”—Isaias 2:4; 9:7.

Mapagungar Dagiti Ay-ayaten

“Um-umayen ti oras nga amin dagidiay adda kadagiti pakalaglagipan a tanem mangngegdanto ti timek [ni Jesus] ket rummuarda.”—Juan 5:28, 29.

Awanton ti Sakit Wenno Ipapatay

“Awanto ti agtataeng nga agkuna: ‘Masakitak.’” “Awanton ni patay . . . Ti immuna a bambanag naglabasdan.”—Isaias 33:24; Apocalipsis 21:3, 4.