Ti Ngay Sapata a Saan Pay La a Pannakidenna?

KADAGITI nabiit pay a tawen, limmatak kadagiti agtutubo dagiti sapata a panagtalinaed a birhen wenno saan pay la a pannakidenna, kas iti “Di pannakiseks no di pay nagkasar.” Dagita a sapata ket maigapu kadagiti nasayaat a kalat ken maitunos dayta kadagiti bilin ti Biblia. (1 Corinto 6:18; Efeso 5:5) Ngem makukuestion ti kinaepektibo dagita. Sigun iti maysa a surbey, agarup 60 a porsiento kadagiti agtutubo ti di nangsurot iti sapatada iti las-ud ti makatawen.

Kanayonanna, nasken a malawagan ti pannakaawat ti dadduma nga agtutubo maipapan iti sasao a “saan pay la a pannakidenna” ken “kinabirhen.” Kastoy ti insurat da Charlene C. Giannetti ken Margaret Sagarese iti libroda a Boy Crazy!: “Sigun kadagiti eksperto, ti iyaadu ti pannakidenna babaen iti ngiwat (oral sex), uray ti pannakidenna babaen iti kerret (anal sex) ket maigapu kadagiti agtutubo a mangipagarup a birhenda latta no la ket ta saanda a makiraman iti gagangay a pannakidenna. Ipagarupda ngamin a saan a makuna a pannakiseks ti aniaman a seksual nga aramid malaksid iti aktual a panagdenna (intercourse).”

Nalawag a nasaknap ti kasta a kapanunotan. Kalpasan a sinaludsodanna ti nasurok sangaribu nga agtutubo, kastoy ti kinuna ti maysa nga autor: “Nalabit a maysa wenno dua laeng iti kada sangagasut ti mangibilang iti oral sex kas pannakidenna.” Innayonna: “Masapul a maseknanka iti daytoy ta amangan no kasta ti kapanunotan ti tin-edyer wenno uray ti ub-ubing pay nga anakmo.”

Bigbigen dagiti mangan-annurot kadagiti pagalagadan ti Biblia a ti pannakidenna babaen iti ngiwat ken kerret ket talaga a seksual nga aramid kas ibatad dagiti naganda. Ti bilin ti Biblia nga “adaywanyo ti pannakiabig” (“adaywanyo ti imoralidad,” Ti Baro a Naimbag a Damag Biblia) iramanna ti amin a kita ti maiparit a seksual a relasion.—1 Tesalonica 4:3.