Agimtuod Dagiti Agtutubo . . .

Homoseksualidad—Kasano a Maparmekko Dayta?

“Idi agtawenak iti 12, adda kursonadak a balasitang idiay eskuelaan. Mariribukan ken madanaganak di la ket ta maysaak a tomboy.”—Anna.a

“Bayat ti kinatin-edyerko, mariribukanak agsipud ta kursonadak ti dadduma a padak a lallaki. Iti un-unegko, ammok a saan a normal dagidi a riknak.”—Olef.

“No agkitakami iti gayyemko a babai, maminsan wenno mamindua nga agbinnisongkami. Kaskasdi nga agkursonadaak pay laeng kadagiti lallaki, isu a pampanunotek a maysaak siguro a biseksual.”—Sarah.

GAPU kadagiti napanuynoy a kababalin iti kaaldawantayo, padpadasen ti adu nga agtutubo ti makirelasion kadagiti kaseksoda. “Adu a babbalasitang idiay eskuelaan ti agkunkuna a tomboyda, biseksual, wenno ‘kayatda ti makidenna iti man kaseksoda wenno iti saanda a kasekso,’” kuna ti agtawen iti 15 a ni Becky. Ni Christa, nga agtawen iti 18, kasta met la ti nakitana a kasasaad idiay eskuelaanda. “Adda dua a kaklasek a babbai nga aktual a nangawis kaniak a makidenna kadakuada,” kunana. “Ti maysa ket nagsurat tapno damagenna no kayatko a padasen ti makidenna iti padak a babai.”

Yantangay maipaspasindayaw itan ti relasion dagiti agkasekso, mabalin a pampanunotem: ‘Talaga kadi a dakes ti homoseksualidad? Kasano ngay no adda kursonadak a kaseksok? Kaipapanan kadi dayta a maysaak a homoseksual?’

Ania ti Panangmatmat ti Dios iti Homoseksualidad?

Iti kaaldawantayo, adu a tattao—uray ti dadduma a klero—ti mangtagtagilag-an iti isyu maipapan iti homoseksualidad. Nupay kasta, nalawag ti sagudayen ti Biblia. Ibagbagana kadatayo a ni Jehova a Dios inaramidna ti lalaki ken babai ken panggepna a dagiti laeng agassawa a lalaki ken babai ti mangtagiragsak kadagiti seksual a tarigagay. (Genesis 1:27, 28; 2:24) Di ngarud pakasdaawan a kondenaren ti Biblia dagiti homoseksual nga aramid.—Roma 1:26, 27.

Siempre, adu ti mangibaga a lausen ti Biblia. Kas pagarigan, kinuna ti agtawen iti 14 a ni Megan, “Saanen nga agaplikar iti agdama a lubong ti dadduma kadagiti nailanad iti Biblia.” Ngem apay nga alisto unay ti dadduma a mangibaga iti kasta? Masansan ngamin a maikontra ti panangmatmatda iti kunaen ti Biblia. Laklaksidenda ti Sao ti Dios agsipud ta naiduma ti isursurona iti kayatda a patien. Ngem ballikug ti kasta a kapanunotan ken parparegtaennatayo ti Biblia nga iwaksitayo ti kasta nga akikid a panagpampanunot! Kinapudnona, iti Saona, idagdagadag kadatayo ni Jehova a Dios a laglagipentayo a dagiti bilinna ket agpaay a pagimbagantayo. (Isaias 48:17, 18) Nainkalintegan dayta. Siasino ngamin aya ti ad-adda a makaammo iti kinataotayo no di ti Namarsua kadatayo?

Kas maysa nga agtutubo, mabalin a nadumaduma ti mariknam. Kasano ngay no adda kursonadam a kaseksom? Kaipapanan kadi dayta a talaga a maysaka a homoseksual? Saan. Laglagipem nga addaka iti “kinalasbang ti kinaagtutubom,” ti tiempo a mapasaram ti di inggagara a seksual a pannakatukay. (1 Corinto 7:36) Mabalin nga adda kaseksom a nakaipamaysaan ti atensionmo. Ngem saan a gapu ta adda kursonadam a kaseksom ket maysakan a homoseksual. Kinapudnona, ipakita dagiti estadistika a dagita a pagannayasan ket masansan a mapukaw inton agangay. Ngem kaskasdi a pampanunotem, ‘Kasano ngamin aya a timmanor dagitoy a tarigagay?’

Kuna ti dadduma a ti homoseksualidad ket nairamut kadagiti gene-tayo. Kuna ti dadduma a mapatanor dayta. Saan a panggep daytoy nga artikulo nga usigen dagiti debate maipapan iti daytoy a banag. Kinapudnona, saan a pulos a nainkalintegan ti panangikuna a maymaysa ti makagapu iti homoseksualidad. Kas iti dadduma pay a kita ti kababalin, ti homoseksualidad ket agparang a narikrikut nga amang ngem iti dayta.

Aniaman ti makagapu, ti napateg a panunotentayo ket kondenaren ti Biblia dagiti homoseksual nga aramid. Gapuna, ti maysa a tao a mangkonkontrol kadagiti riknana iti kaseksona ket addaan iti kalat a mabalinna a maragpat—mabalinna nga ikeddeng ti di agpaituray kadagita a tarigagay. Kas panangyilustrar: Ti maysa a tao ket mabalin nga “agannayas nga agpungtot.” (Proverbio 29:22) Iti napalpalabas, mabalin nga ipapasna ti pungtotna. Ngem kalpasan a nagadal iti Biblia, naammuanna a nasken a sursuruenna ti agteppel. Kayat kadi a sawen daytoy a saanton a pulos nga agpungtot? Saan. Nupay kasta, gapu ta ammonan ti ibagbaga ti Biblia maipapan iti di mamedmedan a pungtot, dinan kayat ti tumulok kadagiti riknana. Umasping dayta iti maysa a tao a kursonadana ti maysa a kaseksona, ngem ita, naammuannan ti ibagbaga ti Biblia maipapan kadagiti homoseksual nga aramid. Pasaray sumken pay laeng ti dakes a tarigagayna. Ngem babaen ti panangipangagna iti balakad ti Biblia, maliklikan dayta a tao ti agpaituray iti dayta a tarigagayna.

Ipapantayon a mabalin a nairamuten ti tarigagaymo iti kaseksom. Ngem namnamaem a kabaelam a parmeken uray dagiti nauneg ti pannakairamutda a tarigagaymo. (1 Corinto 9:27; Efeso 4:22-24) Ngamin, inton kamaudiananna, sika ti mangikeddeng iti kayatmo a pagbalinan. (Mateo 7:13, 14; Roma 12:1, 2) Ket nupay maisupadi ti panangmatmat ti dadduma, kabaelam a sursuruen a kontrolen dagiti riknam—wenno uray kaskasano liklikam ti agpaadipen kadagita.

Liklikam Dagiti Dakes nga Aramid

Kasano a maliklikam dagiti homoseksual nga aramid?

◼ Umuna Ipalladawmo ti amin a pakaringgoram ken Jehova babaen ti kararag, nga agtalekka nga ‘isu ket maseknan kenka.’ (1 Pedro 5:7; Salmo 55:22) Kabaelan ni Jehova nga ipaay kenka ti talna a “mangringbaw iti isuamin a panunot.” Dayta ti ‘mangsaluad iti pusom ken kadagiti pannakabalin ti isipmo’ ken mangipaay kenka iti “pannakabalin a nalablabes ngem ti gagangay” tapno maliklikam ti tumulok kadagiti dakes a tarigagaymo. (Filipos 4:7; 2 Corinto 4:7) Ni Sarah, a marirriribukan gapu ta mariknana nga isu ket maysa a biseksual (agkursonada iti kasekso ken dina kasekso), kastoy ti kinunana: “No mariribukanak, agkararagak; ket tulongannak ni Jehova. No awan ti tulongna, diak koma nadaeran daytoy a parikutko. Ti kararag ti mangis-ispal iti biagko!”—Salmo 94:18, 19; Efeso 3:20.

◼ Maikadua Kanayon a panunotem ti bambanag a mangpabileg iti espiritualidadmo. (Filipos 4:8) Inaldaw a basaem ti Biblia. Saanmo a tagibassiten ti pannakabalin dayta a mangimpluensia iti panunot ken pusom nga agpaay a pagimbagam. (Hebreo 4:12) Kinuna ti maysa nga agtutubo a lalaki nga agnagan iti Jason: “Dakkel ti naitulong kaniak ti Biblia, agraman dagiti teksto a kas iti 1 Corinto 6:9, 10 ken Efeso 5:3. Basaek dagitoy a teksto no sumken kaniak dagiti dakes a tarigagay.”

◼ Maikatlo Saanka a pulos nga agbuya wenno agbasa iti pornograpia ken dagidiay mangitandudo iti homoseksualidad, ta rubrobanda laeng ti dakes a pampanunot.b (Salmo 119:37; Colosas 3:5, 6) Itantandudo met ti dadduma a pelikula ken programa iti telebision ti panamati a ti homoseksualidad ket maysa laeng a maaw-awagan iti estilo ti panagbiag a naiduma ngem iti gagangay. “Ti tiritir a panagpampanunot ti lubong ti nangapektar iti panunotko isu nga ad-adda idi a mariribukanak maipapan iti seksualidadko,” kinuna ni Anna. “Ita likliklikakon ti aniaman a mangiparparegta iti homoseksualidad.”—Proverbio 13:20.

◼ Maikapat Agbirokka iti mabalinmo a pagipudnuan, ket makisaritaka kenkuana maipapan iti pampanunotem. (Proverbio 23:26; 31:26; 2 Timoteo 1:1, 2; 3:10) Ni Olef, a nagpatulong iti maysa a Kristiano a panglakayen, kastoy ti malagipna: “Epektibo unay ti balakadna. Nasapsapa pay koma a nakisaritaak kenkuana.”

Dika Sumuko!

Siempre, kuna ti dadduma nga awan serserbi ti panangaramid kadagita, a basta surotem ketdi dagiti seksual a pagannayasam ken akseptarem ti kinataom. Ngem kuna ti Biblia nga adda ti nasaysayaat a maaramidam ngem iti dayta! Kas pagarigan, ipakaammona kadatayo a nagbalbaliw dagiti nagkauna a Kristiano a dati a homoseksual. (1 Corinto 6:9-11) Kabaelam met ti agbalbaliw—uray no ita ket pangpanggepem pay la nga aramiden dayta.

No sumken latta dagiti tarigagaymo, dika sumuko wenno dimo pagarupen a saankan a makapagbalbaliw. (Hebreo 12:12, 13) Amintayo ket mangparparmek kadagiti dakes a pagannayasantayo no dadduma. (Roma 3:23; 7:21-23) No dika paiturayan kadagiti dakes a tarigagaymo, mabalin a mapukaw dagita inton agangay. (Colosas 3:5-8) Kangrunaan ti amin, agpatulongka ken Jehova. Ay-ayatennaka ken ammona no ania ti mangparagsak kenka. (Isaias 41:10) Wen, “agtalekka ken Jehova ket aramidem ti naimbag . . . , ket itdennanto kenka dagiti kiddaw ta pusom.”—Salmo 37:3, 4.

Ti ad-adu pay nga artikulo manipud iti serye ti “Agimtuod Dagiti Agtutubo . . .” ket masarakan iti Web site a www.watchtower.org/ype

[Footnotes]

PANUNOTEM

◼ Apay a kondenaren ti Dios ti homoseksualidad?

◼ Ania ti mabalin nga aramidem no ikagkagumaam a pengdan ti panagkursonadam iti kaseksom?

◼ Siasino ti mabalin a pagipudnuam iti riknam no sumken dagiti homoseksual a tarigagaymo?

[Ladawan iti panid 30]

Agpatulongka iti nataengan a Kristiano