Maysa a Nangayed a Monolito

BABAEN ITI MANNURAT TI AGRIINGKAYO! IDIAY CANADA

SINIGSIGLON nga us-usaren dayta dagiti mangngalap ken nabigador kas sierto a bagnosda iti dayta a lugar. Itantan-ok dayta dagiti mannaniw, mannurat, ken artist. Maysa nga ensiklopedia ti nangdeskribir iti dayta a monolito kas “karkarna ken makakayaw.” Iti makindaya a murdong ti Gaspé Peninsula iti Gulpo ti St.  Lawrence, ti Percé Rock ket nakangayngayed iti tengnga ti aggilapgilap nga asul a Taaw Atlantico. Agarup 433 a metro ti kaatiddog dayta a bato, agarup 90 a metro ti kaakabana, ken nasurok a 88 a metro ti kangatona.

Adda idi tiempo a dayta a nagdakkel a bato ket ul-ulien dagiti natured a lumugar tapno agalada kadagiti itlog iti umok dagiti tumatayab. Nupay kasta, tapno mataginayon ken masalakniban dayta a bato agraman dagiti tumatayab nga agkamang iti dayta, ti gobierno ti Quebec idi 1985 indeklarana ti Percé Rock ken ti kabangibang a Bonaventure Island kas pakasalakniban dagiti tumatayab. Ti Bonaventure Island ket maysa a natalged a lugar para iti maikadua a kadakkelan a makin-amianan a pagpapaaduan iti gannet iti lubong.

Adda dagiti mangibaga a ti Percé Rock ket konektado idi iti peninsula ken mabalin nga addaan iti di kumurang nga uppat nga arko. Ngem ita, maymaysan ti arkona—agarup 30 a metro ti kaakabana—iti ungto ti bato a nakasango iti baybay. No panagugot, agparang ti naitambak a darat a namagkonektar iti dayta a bato iti peninsula. Kabayatan ti baet ti agarup uppat nga oras, mabalin nga umasideg dagidiay makaitured agingga iti sakaanan ti maparparsiakan a bato sada agkalipkip kadagiti bato agingga a madanonda ti arko iti uneg ti agarup 15 a minuto.

Adda pakdaar para kadagiti natured a mangaramid iti dayta. Kastoy ti insalaysay ti maysa a turista a nagna iti pagtupakan dagiti tapi ti bato tapno madanonna ti arko: “Iti tunggal sumagmamano a minuto, mangngegmo ti uni dagiti bato a matmatnag iti danum a kas iti uni ti babassit a bomba. Kasla agkakanalbuong ti uni ti dadduma nga agtitinnupak a batbato.”

Kas iti nakita ti adu a sangaili, makapaamanga ti kinangayed ti Percé Rock. Nupay kasta, maysa laeng dayta kadagiti nagadu a nagpipintas a buya iti nakaay-ayat a dagatayo. Anian ti kinaadu ken panagdudumada! Apaman a makitam ida, nalabit matignayka met nga ‘agintek ket ipakitam a sipapaliiwka iti nakaskasdaaw nga ar-aramid ti Dios.’—Job 37:14.

[Picture Credit Line iti panid 23]

© Mike Grandmaison Photography