Panangmatmat iti Lubong
◼ Iti napalabas a dekada, napukawen ti agarup 40 a milion a Tsino a mannalon ti dagada gapu iti iyaadu itan dagiti pasdek ken industria iti aw-away.—CHINA DAILY, CHINA.
◼ Iti intero a lubong bayat ti 2005, adda napasamak a 28 a naan-anay a gubat ken 11 pay a babbabassit a rinnupak.—VITAL SIGNS 2006-2007, WORLDWATCH INSTITUTE.
◼ Adda grupo manipud Tokyo Institute of Technology a sibaballigi a nangipatayab iti adda pilotona ken nakalaglag-an nga eroplano a kurang a 55 a kilo ti timbangna ken nakabitan laeng kadagiti bateria a gagangay a maus-usar iti pagtaengan. Dayta nga eroplano ket timmayab iti 391 a metro iti 59 a segundo.—MAINICHI DAILY NEWS, JAPAN.
◼ Kadagiti Olandes nga agtawen iti 12 agingga iti 20 a nagsukisok kadagiti maaw-awagan iti “profile site” ti Internet bayat nga agus-usarda iti webcam, “40 a porsiento kadagiti ubbing a lallaki ken 57 a porsiento kadagiti ubbing a babbai ti naipadamag a nakiddaw nga aglabusda wenno agaramidda iti seksual nga aramid iti sango ti webcam.”—RUTGERS NISSO GROEP, NETHERLANDS.
Makaadikto Kadi Dagiti Video Game?
“Ti reaksion ti utek dagiti aglablabes ti panagay-ayamda iti computer ket umasping kadagidiay adikto iti arak wenno iti marihuana.” Kasta ti imbaga ti sikologo a ni Ralf Thalemann, lider ti grupo nga agsirsirarak maipapan iti pannakaadikto idiay Charité University Hospital, idiay Berlin, Alemania. Maipagarup a ti pannakagutugot manipud iti aglablabes a panagay-ayam kadagiti computer game ket mabalin a pakaigapuan ti nakaro a panagruar ti dopamine iti utek ti umaayam, a mangpataud iti nasayaat a rikna nga inton agangay ket agresulta iti “pannakaadikto.” Sigun iti maysa a surbey, mabalin a mapasamak dayta iti nasurok a 10 a porsiento kadagidiay agay-ay-ayam kadagiti video game.
Masansan a “Madanagan ken Mariribukan” Dagiti Babaknang
“Madanagan ken mariribukan dagiti milionario,” kuna ti periodiko a China Daily iti Beijing. Napagsaludsodan dagiti tattao manipud Makindaya ken Makin-abagatan a China nga addaan iti promedio a kinabaknang a 2.2 a bilion a yuan (agarup ₱13,750,000,000.00). Dagiti managsirarak a nangadal iti ipakpakita dagiti nabaknang a tattao a “kababalin maipapan iti relihion, panagasawa, biag, karera, ken kuarta” natakuatanda a “kaaduan kadagiti milionario ket agpada a pagay-ayat ken kagurgurada ti kuartada.” Kinuna ti adu kadagiti napagsaludsodan a malaksid iti pannakaidayawda iti kagimongan ken pannakariknada nga adda nagapuananda, “ti kangrunaan nga epekto ti kuarta iti biagda isu ti pannakasuron.”
Makapasalun-at ti Kataltalonan Kadagiti Adda Depekto ti Isipda
Nasurok a 100 nga eksperto manipud iti 14 a pagilian ti nabiit pay a nagtataripnong idiay Stavanger, Norway, tapno ammuenda ti maipapan iti Green Care, maysa a kapanunotan a mamagkakadua iti panagtalon, panangisuro, ken panangaywan iti salun-at. Sigun iti NRK a kompania ti panagibrodkas, no dagiti adda depekto ti isipda iti adun a tawen ket agtalonda, dadduma kadakuada ti saanen a masapul a maaywanan iti maysa nga institusion. “Makapasalun-at dayta iti isip ken bagi.” Nasurok nga 600 a nabayagen a pagtalonan idiay Norway ti maus-usar met para iti Green Care, a dita, maipapaayanda iti kanayonan a pamastrekan.
Pakausaran Dagiti Natirad a Tuktok ti Simbaan
“Nakasarak dagiti simbaan idiay New England [idiay Estados Unidos] iti solusion iti bumasbassit a badyetda: ipaabangda dagiti napintas a tuktok ti simbaanda kadagiti kompania ti cell phone nga agkasapulan kadagiti nangato a lugar a pangikabilanda kadagiti antenada,” kinuna ti magasin a Newsweek. Dagiti disso agpaay kadagiti torre a mangyallatiw ken mangawat kadagiti mensahe manipud kadagiti cell phone ket limitaran dagiti bilin ti gobierno para kadagiti kabalbalayan, ken saan a kayat dagiti umili ti maaddaan kadagiti naalas nga antena iti sangakaarrubaanda. Gapuna, dagiti kompania ti cell-phone ti mangilemlemmeng itan kadagiti alikamenda iti uneg dagiti natirad a tuktok dagiti simbaan. Ti presidente ti maysa a pagkonsultaran a kompania agpaay kadagiti simbaan kastoy ti kinunana: “Iti immuna a simbaan a nangikabilanmi kadagiti antenami, tallon nga antena ti inkabilmi iti uneg ti natirad a tuktokna ket ipapaabangda dayta iti $74,000 (agarup ₱3,700,000.00) iti makatawen para iti espasio a saan a pulos a maus-usar idi damo.”