Panangmatmat iti Lubong

◼ Lima a porsiento kadagiti koriente a baybayadan ti kadawyan a sangakabbalayan iti Canada ket maigapu kadagiti de koriente nga alikamen a nakasaksak ngem di maus-usar (standby mode).—NATIONAL POST, CANADA.

◼ Ipamatmat ti resulta ti maysa a surbey a mamati dagiti Ruso a ti kapatgan a parikut a masapul a risuten ti gobierno ket ti “panagkunniber” ken “pananglapped iti panagpangato ti presio dagiti gagatangen.”—PRAVDA, RUSSIA.

◼ Sigun iti maysa a surbey, agarup 26.4 porsiento kadagiti estudiante iti maikalima ken maikanem a grado idiay Taiwan ket “nagpanunot nga agpakamatay.”—THE CHINA POST, TAIWAN.

◼ “Nupay nakatulong ti teknolohia a nangpaababa iti lawas ti panagtrabaho idiay E.U.A. iti 38 porsiento kalpasan ti maysa a siglo, awanen ti panawen a makapagaliwaksay dagiti empleado gapu iti napapaut a panagbiahe, ad-adu a panagadal dagiti adulto ken immadu nga obra iti pagtaengan.”—FORBES, ESTADOS UNIDOS.

◼ Immadu ti naipugso a gas a mangpabpabara iti globo iti 1.6 porsiento iti nagbaetan ti 2003 ken 2004, “ti kangatuan iti nasurok laeng a maysa a dekada.”—REUTERS, OSLO, NORWAY.

Parikut ti China Maipapan iti Danum

Adda nakaro a “pannakarugit ken kinakurang ti nadalus a danum” idiay China. Kaaduan a siudad ti addaan kadagiti planta a pagdalus iti nausaren a danum, ngem adu kadagitoy ti awanan iti umdas a pondo tapno mapaandar dagiti planta. Impadamag ti The Wall Street Journal: “Narugitan ti kaaduan kadagiti karayan, dan-aw, ken kanal iti pagilian gapu kadagiti saan a nadalusan a danum nga inusar ti industria ken dagiti balbalay agraman dagiti danum a napno iti pestisidio, nga agayus manipud kadagiti talon.” Kasta met, “agarup 300 milion a tattao ti di makagun-od iti nadalus a danum nga inumen.” “Nakalkaldaang” ti kasasaad, kuna ti Journal, ket kumarkaro pay ti kasasaad.

“Siasinokayo? Saksi ni Jehova?”

Idi napan a tawen iti aplaya ti Isla ti Elba iti Italia, dagiti turista ket inasitgan dagiti agtutubo a Katoliko nga inawis ti obispo iti distrito ti Massa Marittima-Piombino. Imbaga ti obispo kadagiti agtutubo a no kayatda ti agbalin ken agtalinaed a Kristiano, rumbeng nga iwaragawagda ti pammatida. Nagsiddaawan daytoy dagiti bakasionista. Sigun iti diario nga Il Tempo, ti kadawyan a sungbat a mangngeg dagiti agtutubo ket, “Siasinokayo? Saksi ni Jehova?”

Musika a Nainaig iti Seksual nga Aramid

Dagiti tin-edyer nga agim-imdeng iti musika nga addaan iti “naalas ken seksual a liriko nasapsapada a makidenna ngem dagiti agim-imdeng iti dadduma a kanta,” sigun iti maysa a panagadal nga impadamag ti Associated Press. “Dagiti kanta a mangiladawan kadagiti lallaki kas ‘narugso iti sekso’ ken kadagiti babbai kas puntiria ti seksual a tarigagay, agraman kadagiti kanta a nalawag a mangiladawan iti pannakidenna, ket ad-adda a mangallukoy iti nasapa a seksual nga aramid ngem kadagidiay saan unay a nalawag ti panangtukoyda iti sekso ken mangiparparegta iti napapaut a relasion,” kuna ti report. Imbagana a “dagiti nagannak, mannursuro, ken tin-edyer masapul a tingitingenda a naimbag dagiti mensahe iti liriko ti musika.”

Manangsayang nga Agus-usar

Idi 2004, ti The Australia Institute, maysa nga agsirsirarak nga organisasion, impadamagna a dagiti Australiano imbellengda dagiti saan a nakan a taraon nga aggatad iti 5.3 bilion a doliar (US$4.1 bilion). Daytoy ket nasurok a 13 a daras nga ad-adu ngem ti tulong nga indonar dagiti Australiano iti sabali a pagilian idi 2003. Ti dagup ti gatad a sinayang dagiti Australiano a produkto ken serbisio a di pay nausar wenno manmano a nausar ket nasurok a 10.5 bilion a doliar (US$8.1 bilion) iti tinawen—ad-adu ngem ti gastuen dayta a pagilian kadagiti unibersidad ken kalsada.