Saanen nga Adipen ti Arak

Ti kalkalainganna a panaginum iti arak paimasenna ti pannangan wenno paragsakenna ti maysa a rambak. Ngem kadagiti dadduma, mangituggod dayta kadagiti narikut a problema. Usigenyo ti sumaganad a pakasaritaan ti maysa a lalaki a nakalapsut iti nalabes a panaginum iti arak.

AGINGGA ita, agsanaang ti barukongko no isalaysayko ti nariribuk a kasasaad idi iti pagtaenganmi. Rugian da Tatang ken Nanang ti uminum iti arak. Kalpasanna, ni Tatang kabilenna ni Nanang. Masansan a siak ti pagdisuan dagiti danogna. Uppat laeng ti tawenko idi inkeddengda ti agsina. Malagipko a naipanak idi iti balay ni lelangko tapno makipagnaedak kenkuana.

Iti panagriknak, awan ti mangay-ayat kaniak. Idi agtawenak iti pito, ilibasko ti mapan iti pagiduldulinan iti arak tapno uminum, iti kasta kasla mailiwliwagko ti kinalidayko. Idi agtawenak iti 12, nagsinnungbat da Nanang ken lelangko maigapu kaniak. Nakaro ti pungtot ni Nanang nga uray la binatonak iti karaykay. Imbag laengen ta nakalisiak! Saan laeng a namnaminsan a nagpeggad ti biagko. Nupay kasta, narabaw laeng dagiti piglat iti bagik no idilig kadagiti immukuok a sakit ti nakem iti barukongko.

Idi agtawenak iti 14, mangnginumakon. Idi agtawenak iti 17, nagtalawak iti pagtaenganmi. No uminumak, natured ti riknak isu a nagbalinak nga agresibo, a riribukek dagiti paginuman iti lugarmi. Panaginum laeng ti pagragsakak iti biag. Iti maysa laeng nga aldaw, maibusko ti lima a litro nga arak, sumagmamano a serbesa, ken kasta met kadagiti naingel nga inumen.

Idi nagasawaak, nagbalin a dakkel a parikut ni baketko ti panaginumko. Kimmaro ti gura ken sakit ti nakemko, ket kabilek ti asawak ken dagiti annakmi. Dayta ti nangpataud iti kasasaad a kas iti dinakkelak. Maibus ti birokko gapu iti arak. Awan mueblesmi, isu a maturogkami iti suelo. Awan ti rasonko nga agbiag ket diak pulos inkagumaan a pasayaaten ti kasasaadmi.

Maysa nga aldaw, nakasaritak ti maysa a Saksi ni Jehova. Sinaludsodko no apay a nakaro ti panagsagaba, ket impakita kaniak ti Saksi manipud iti Biblia ti inkari ti Dios a maysa a lubong nga awanan kadagiti parikut. Dayta ti nangkombinsir kaniak a mangrugi a makipagadal iti Biblia kadagiti Saksi. Bayat nga inyaplikarko dagiti pannursuro ti Biblia ken kinissayak ti panaginumko, dakkel ti rimmang-ayan ti pamiliami. Kaskasdi, nabigbigko a no kayatko ti agserbi ken Jehova a Dios iti makaay-ayo a pamay-an, masapul nga isardengko ti panaginumko. Kalpasan ti tallo a bulan a panangikagumaan, naisardengko ti panangin-inumko. Innem a bulan kalpasanna, indedikarko ti biagko iti Dios ket insimbolok daytoy babaen ti panagbautisar.

Gapu ta nakalapsutak manipud iti pannakaadipen iti arak, nabayadakon dagiti utangko. Kamaudiananna, gimmatangak iti balay ken kasta met iti lugan, nga usarenmi no mapankami kadagiti Nakristianuan a gimong ken mangasaba. Idi agangay, addan panagraemko iti bagik.

Sagpaminsan kadagiti panagtataripnong, maawisak nga uminum. Adu ti di makaammo iti nakaro a pannakidangadangko ket uray maminsan laeng a panaginum, mabalin nga agsubliak manen iti sigud a kabibiagko. Adda pay laeng panagtarigagayko nga uminum. Masapul ti napasnek a kararag ken determinasion nga agkedked. No mawawak, uminumak iti adu nga aniaman nga awan laokna nga arak. Sangapulo a tawen itan a diak imminum iti arak.

Maaramid ni Jehova ti saan a kabaelan nga aramiden ti tao. Tinulongannak a mangsagrap iti wayawaya a diak pulos impagarup a masagrapko! Nasakit pay laeng ti nakemko kadagiti napasamak idi ubingak, ken kankanayon a makidangdangadangak iti negatibo a panagpampanunot. Iti sabali a bangir, naaddaanak iti nasayaat a relasion iti Dios, maysa a kongregasion dagiti pudno a gagayyem, ken ti nagsayaat a pamilia a kapammatiak. Naimpusuan a tultulongandak dagiti annakko ken ti asawak a makidangadang iti panaginum. Kastoy ti kuna ti asawak: “Idi, nakarigrigat ti biagko. Ita agyamanak unay ken Jehova ta sagsagrapek ti naragsak a pamilia a kadua ti asawak ken ti dua nga annakko.”—Naipatulod.

[Blurb iti panid 21]

Idi agtawenak iti 14, mangnginumakon

[Blurb iti panid 22]

Maaramid ni Jehova ti saan a kabaelan nga aramiden ti tao

[Kahon/Dagiti Ladawan iti panid 22]

TI BIBLIA KEN ARAK

◼ Saan nga iparit ti Biblia ti panaginum iti arak. Deskribirenna ti “arak a mamagrag-o iti puso ti mortal a tao” kas sagut nga inted ti Dios iti sangatauan. (Salmo 104:14, 15) Ti Biblia dakamatenna ti ubas kas simbolo ti kinasaliwanwan ken kinatalged. (Mikias 4:4) Kinapudnona, ti damo a milagro ni Jesu-Kristo ket inaramidna nga arak ti danum iti maysa a paboda. (Juan 2:7-9) Ket idi nadamag ni apostol Pablo ti ‘masansan a panagsaksakit’ ni Timoteo, inrekomendarna nga uminum “iti bassit nga arak.”—1 Timoteo 5:23.

◼ Ngem iparit ti Biblia ti nalabes a panaginum iti arak:

“Dagiti managbarbartek . . . saandanto a pulos a tawiden ti pagarian ti Dios.”—1 Corinto 6:9-11, “The Jerusalem Bible.”

“Dikay agbarbartek iti arak, nga iti dayta adda kinagaramugam.”—Efeso 5:18.

“Siasino ti addaan iti kinaay-ay? Siasino ti addaan iti panagdukot? Siasino ti addaan kadagiti rinnupir? Siasino ti addaan iti pannakaseknan? Siasino ti addaan sugsugat nga awan gapgapuna? Siasino ti addaan iti kinalidem kadagiti mata? Dagidiay agtalinaed iti atiddog a tiempo iti arak, dagidiay sumrek nga agbirok iti naggampor nga arak. Dika kumita iti arak no lumabaga ti marisna, no sumilapsilap iti kopa, no agayus a silalamuyot. Iti panungpalanna kumagat dayta a kas iti serpiente, ket agparuar iti sabidong a kas iti karasaen. Dagiti bukodmo a mata makakitadanto iti karkarna a bambanag, ket ti bukodmo a puso agsaonto iti balusingsing a bambanag.”—Proverbio 23:29-33.

Kas naipakita iti naipakuyog nga artikulo, dadduma nga addaan iti parikut iti arak nainsiriban nga inkeddengda a dida pulos uminumen iti dayta.—Mateo 5:29.