Nalasatanda ti Terorismo Idiay Mumbai

BABAEN ITI MANNURAT TI AGRIINGKAYO! IDIAY INDIA

TI DATI a Bombay a pagaammo itan a siudad ti Mumbai ket nagpartak nga immadu ti populasionna manipud iti dati a bilang dagiti agnanaed a nasurok a 18 a milion. Innem agingga iti pito a milion kadagita nga umili ti inaldaw nga aglugan iti tren no mapanda agtrabaho, ageskuela, makitienda, wenno agpasiar. Napartak ken kanayon nga agpasada dagitoy a tren a dumalan kadagiti aglikmut ti siudad. Kadagiti oras ti panagaapura, ti tunggal tren nga addaan iti siam a benneg ket mapumpunno iti 5,000 a pasahero nupay 1,710 ti normal la koma a laonenna. Kasta ti kasasaad idi Hulio 11, 2006, idi a dagiti terorista binombada dagiti tren ti Mumbai. Iti awan pay 15 a minuto, pito a bomba ti bimtak iti nadumaduma a tren a lumaslasat iti Western Railway, a nakatayan ti 200 ken nakadangranan ti 800.

Adu a kameng ti 22 a kongregasion dagiti Saksi ni Jehova idiay Mumbai ken kadagiti deppaarna ti kanayon nga aglugan kadagiti tren ket siluluganda kadagita idi binomba dayta dagiti terorista. Naimbag laengen ta awan ti natay kadakuada, ngem adda sumagmamano a nasugatan. Agaw-awid idin ni Anita manipud trabahona. Napumpunno ti tren isu a sitatakder isuna iti asideg ti ridaw ti benneg a first-class tapno nalaka a makadissaag. Bayat a tumartaray ti tren, pagammuan ta adda napigsa a panagbettak, ket napunno iti nangisit nga asuk ti naglugananna a benneg ti tren. Bayat a nagsadag iti ridaw ken kimmita iti kannawanna, nakitana a nalaslas ti metal a sikigan ti sumaganad a benneg ti tren ken aguy-uyaoyen dayta manipud iti kaha ti tren iti 45 a degree nga anggulo. Uray la agsidduker a nakakita kadagiti bagi ken paspaset ti bagi ti tao a naipurruak iti riles manipud iti giwang. Kalpasan ti kasla nakaun-unday a tiempo—nupay sumagmamano la a segundo no an-anagen—simmardeng met laeng ti tren. Kaduana ti dadduma pay a pasahero a timpuak iti riles sada pinaspasan ti immadayo manipud iti tren. Inawagan ni Anita ni lakayna a John babaen iti cell phone ket naimbag laengen ta nakasaritana; kalpasan ti sumagmamano la a minuto, okupado unayen ti intero a sistema ti telepono iti siudad gapu iti awag dagiti maringgoran a tattao. Medio kalmado ni Anita sakbay a nakasaritana ni lakayna. Kalpasanna, dinan mateppelan ti agsangit. Inestoriana ken ni lakayna ti napasamak ket kiniddawna nga umayna sukonen. Bayat nga ur-urayenna ni lakayna, bimmayakabak ti tudo isu a nadadael ti kaaduan nga ebidensia a makatulong koma kadagiti imbestigador.

Ni Claudius, a maysa pay a Saksi ni Jehova, ket nasapsapa a pimmanaw iti opisinana ngem iti gagangay. Naglugan iti tren nga agbiahe iti alas 5:18 ti malem idiay Churchgate Station, ti pagpatinggaan ti Western Railway, ken napan iti benneg a first-class. Bayat nga agbirbirok iti pagtugawanna para iti maysa nga oras a biahe agingga iti estasion ti Bhayandar, nakitana ni Joseph, a kameng ti maysa a kabangibang a kongregasion dagiti Saksi ni Jehova. Dida napupuotan ti panaglabas ti oras bayat a naginnestoriada. Kalpasanna, gapu ta nabannog iti agmalem a trabahona, nairidep ni Joseph. Idi nagsardeng ti tren iti maudi nga estasion sakbay ti estasion a pagdissaaganna, timmakder ken immasidegen ni Claudius iti ridaw tapno nalakanto la a makaruar iti napumpunno a tren. Bayat nga agtaktakder ni Claudius iti asideg ti pagruaran, nariing ni Joseph ken nagsanggir iti tugawna tapno makapakada kenkuana. Bayat a siiiggem ni Claudius iti metal a barandilias, nagsadag tapno makisarita kenkuana. Mabalin a dayta ti nangsalbar iti biag ni Claudius idi kellaat nga adda bimtak. Dagiti benneg ti tren ket naggunggon iti nakapigpigsa, napno iti asuk, ken simmipnget. Naipalladaw ni Claudius iti suelo iti nagbaetan dagiti naintar a tugaw ken malaksid iti panagwengweng dagiti lapayagna, kasla awanen ti mangngegna. Nabuttawan ti dati a pagtaktakderanna. Dagiti pasahero nga agtaktakder iti abayna ket mabalin a naipalladaw iti riles wenno naidasaydan iti suelo. Nalasatanna ti maikalima kadagiti pito a panagbettak a nanggunggon kadagiti tren iti dayta a nakalkaldaang nga aldaw ti Martes.

Ni Claudius ket naitaray idiay ospital, a daradara ti intero a kawesna. Ngem dara dayta ti dadduma a pasahero a mas nakalkaldaang ti napasamak kadakuada. Saan a nakaro ti pannakadangranna—nabuong laeng ti sarmi-sarming ti lapayagna, nasinit ti maysa nga imana, ken nasiraman ti buokna. Idiay ospital, nagkikitada kada Joseph ken ni baketna nga Angela, a di naan-ano gapu ta situtugaw idi isuna iti simmaganad a benneg ti tren a nailatang kadagiti babbai. Limmitem ti kannawan a mata ni Joseph ken saanen a makangngeg. Agyaman ken ni Jehova dagitoy a tallo a Saksi agsipud ta nakalasatda. Kinuna ni Claudius a ti immuna a napanunotna idi maimunawan ket anian ti kinaubbaw ti pananggun-od iti kuarta ken material a sanikua iti daytoy a sistema no ti biag ket mabalin a kellaat a makeltay! Anian a ragsakna ta pinagbalinna a kapatgan iti biagna ti relasionna iti Diosna a ni Jehova!

Iti apagbiit, sinagaba ti siudad ti Mumbai ti nakaro a layus, riribuk, ken dagiti panagbomba. Nupay kasta, naragsak ken naregta ti nasurok a 1,700 a Saksi sadiay. Kanayon nga iranranudda kadagiti kaarrubada ti nagsayaat a namnamada maipapan iti baro a lubong, a sadiay awanton a pulos ti kinaranggas.—Apocalipsis 21:1-4.

[Blurb iti panid 23]

Nabuttawan ti dati a pagtaktak-deranna

[Ladawan iti panid 23]

Ni Anita

[Ladawan iti panid 23]

Ni Claudius

[Ladawan iti panid 23]

Da Joseph ken Angela

[Picture Credit Line iti panid 22]

Sebastian D’Souza/AFP/Getty Images