3

Ipakatyo ti Autoridadyo

Apay a nasken dayta? Ipakita dagiti panagadal a “dagiti annak a pinadakkel dagiti nagannakda a nadungngo ken mangipakpakat iti autoridad​—a manangsuporta ngem estrikto no kasapulan—​ket nasarsariritda, nalalaingda a makilangen, addaanda iti kompiansa, ken kaaduanna a naragragsakda ngem kadagidiay pinadakkel dagiti nakapampanuynoy wenno nakauy-uyong a nagannak,” kuna ti magasin a Parents.

Ti karit: Manipud kinamaladaga agingga iti kinatin-edyer dagiti annakyo, supringenda ti kalinteganyo a mangipakat iti autoridadyo kadakuada. “Madlaw a dagus dagiti annak no mabuteng dagiti dadakkelda a mangipakat iti autoridad ken no nalakada a tumulok,” insurat ni John Rosemond, autor ti libro a Parent Power! Innayonna: “No maipapan iti isyu a siasino ti masurot, ket saan a mangidaulo ti nagannak, dagitinto annak ti mangidaulo.”

Ti solusion: Diyo pagdanagan nga umadayo ti rikna wenno agsakit ti nakem dagiti annakyo no ipakatyo ti autoridadyo. Ni Jehova, kas Namunganay iti biag ti pamilia, saanna a pinanggep nga agpatas ti kalintegan dagiti nagannak ken dagiti annak no iti pannakatarawidwid ti pamilia. Imbes ketdi, inikkanna dagiti nagannak iti autoridad ken imbilinna kadagiti annak: “Agtulnogkayo kadagiti nagannak kadakayo.”​—Efeso 3:14, 15; 6:1-4.

Ipakatyo ti autoridadyo ngem saankayo nga agbalin a diktador. Kasano? Babaen ti panangsurotyo iti ulidan ni Jehova. Adda pannakabalinna a mangpilit kadagiti natauan nga annakna tapno aramidenda ti pagayatanna. Kaskasdi, gutugotennatayo a mangusar kadagiti nasayaat a galadtayo. “O no koma laeng pudno nga ipangagmo dagiti bilinko! Iti kasta ti talnam agbalin a kas iti maysa a karayan,” kuna ti Saona. (Isaias 48:18) Kayat ni Jehova nga agtulnogtayo kenkuana, saan a gapu ta maam-amaktayo, no di ket gapu ta ay-ayatentayo. (1 Juan 5:3) Rasonable ni Jehova kadagiti kalikagumna kadatayo ken ammona a pagimbagantayo no agbiagtayo sigun kadagiti moral a pagalagadanna.​—Salmo 19:7-11.

Kasanokayo a maaddaan iti kompiansa a mangipakat iti autoridadyo kas nagannak iti natimbeng a pamay-an? Umuna, nasken a kombinsidokayo a dayta ti ibilbilin ti Dios nga aramidenyo. Maikadua, masapul a kombinsidokayo a ti panagbiag sigun kadagiti moral a pagalagadan ti Dios ket isu ti kasayaatan para kadakayo ken kadagiti annakyo.​—Roma 12:2.

Ania ti espesipiko a masapul nga aramidenyo tapno maipakatyo ti autoridadyo?

[Blurb iti panid 5]

“Disiplinaam ti anakmo . . . ket mabalinmonto nga ipagpannakkel.”—Proverbio 29:17, Ti Baro a Naimbag a Damag Biblia