6

Ammuenyo ti Rikrikna ti Anakyo

Apay a nasken dayta? Para kadagiti ubbing, dagiti nagannakda ti kapatgan iti biagda. Kasapulanda unay ida ket kayatda a maammuan koma dagiti dadakkelda ti rikriknada. No nairuam dagiti nagannak a mangkontra kadagiti annakda kada iyebkasda ti rikriknada, mabalin a naadayonton ti rikrikna dagiti ubbing ken pagduaduaandanto payen ti abilidadda nga agdesision para iti bagbagida.

Ti karit: No dadduma, masobraan dagiti annak ti panangyebkasda iti kapanunotan ken emosionda. Agpayso nga adda dagiti maibaga dagiti annak a pakasuronan dagiti nagannak. Kas pagarigan, mabalin a kunaen ti napaay nga anak, “Kayatkon ti matay.”a Iti kasta a kasasaad, mabalin a ti gagangay a sungbat ti nagannak ket, “Ti la sasawem!” Agamak ngamin dagiti nagannak a no bigbigenda dagiti negatibo a rikrikna wenno kapanunotan ti anakda ket bale konkonsintirenda dagita.

Ti solusion: Iyaplikaryo ti balakad ti Biblia nga agbalinkayo a “nasiglat no iti panagdengngeg, nainayad no iti panagsao, nabannayat no iti panagpungtot.” (Santiago 1:19) Laglagipenyo a binigbig ni Jehova a Dios dagiti negatibo a rikna ti adu a matalek nga adipenna babaen ti panangipalubosna a marekord dagita iti Biblia. (Genesis 27:46; Salmo 73:12, 13) Kas pagarigan, idi nagpasar ni Job kadagiti nakaro a suot, kinunana a kayatnan ti matay.​—Job 14:13.

Nalawag a kasapulan a mailinteg ti dadduma a kapanunotan ken karirikna ni Job. Ngem saan a tinagilag-an ni Jehova ti rikrikna ni Job ken saanna met a linapdan a mangyebkas iti dayta. Imbes ketdi, rinaemna ti rikna ni Job idi siaanus a binay-anna a mangipeksa iti an-anek-ekenna. Kalpasan a nayebkas ni Job ti rikriknana, sa laeng siaasi nga inlinteg ni Jehova. Kastoy ti imbaga ti maysa a Kristiano nga ama: “Yantangay ipalpalubos ni Jehova nga ikararagko kenkuana dagiti linaon ti pusok, nainkalintegan laeng nga imdengak met dagiti annakko no ipeksada dagiti positibo ken negatibo a rikriknada.”

Inton kasla kayatyo nga ibaga iti anakyo ti, “Agtalnaka man” wenno “Ti la mapampanunotmo,” lagipenyo ti nalatak a pagannurotan ni Jesus: “Kas iti kayatyo nga aramiden kadakayo dagiti tattao, isu met laeng ti aramidenyo kadakuada.” (Lucas 6:31) Kas pagarigan, ipapanmon a trinatodaka a sigugubsang iti pagtrabahuan wenno adda nakaupayam, a nalabit gapu iti kamalim met laeng. No iyebkasmo iti nasinged a gayyemmo dagiti nakapaayam, nga ibagam kenkuana a dimo maanusanen ti trabahom, ania ti namnamaem a reaksion ti gayyemmo? Kayatmo aya nga ibagana nga ‘agtalnaka man’ sana iparupa kenka a basol mo met laeng? Wenno kaykayatmo no ti ibagana ket: “Talaga a narigat ti situasionmo”?

Kas kadagiti nataengan, ad-adda nga akseptaren dagiti ubbing ti balakad no mariknada a ti mangbalbalakad ket pudpudno a matarusanna ida agraman ti pakarigatan a sangsanguenda. Kuna ti Sao ti Dios: “Ti puso daydiay masirib tignayenna ti ngiwatna a mangipakita iti pannakatarus, ket kadagiti bibigna manginayon iti panangguyugoy.”​—Proverbio 16:23.

Kasanoyo a masigurado a saan a mayaleng-aleng ti aniaman a balakadyo?

[Footnote]

[Blurb iti panid 8]

“No ti asinoman sumungbat iti maysa a banag sakbay a mangngegna, kinamaag dayta iti biangna.”​—Proverbio 18:13