7

Agbalinkayo a Pagulidanan

Apay a nasken dayta? Ti aramid ket mangisuro. Impormasion laeng ti masansan nga ipaay dagiti sasao. Kas pagarigan, ibalakad dagiti nagannak iti annakda nga agbalinda a nadayaw ken napudno. Ngem no dagiti nagannak ket agbinnugkawda ken no aramidenda dayta kadagiti annakda sada agulbod kas pambar iti kinaliwayda, isursuroda kadagiti annakda a kasta ti rumbeng a panagtignay dagiti nataengan. Kuna ti autor a ni Dr. Sal Severe a ti “maysa kadagiti kaepektibuan a pamay-an a makasursuro dagiti annak” ket babaen iti panangtuladda kadagiti nagannakda.

Ti karit: Awan ti perpekto a nagannak. Sigun ken apostol Pablo, “amin [ket] nagbasol ken agkurang iti dayag ti Dios.” (Roma 3:23) No maipapan iti panangannad iti sasawentayo, kastoy ti insurat ni adalan a Santiago: “Ti dila, awan asinoman iti sangatauan ti makapaamo iti dayta.” (Santiago 3:8) Maysa pay, gagangayen a suboken dagiti ubbing ti ‘kaatiddog ti kordon’ dagiti dadakkelda. “Ania la ketdin ti laing dagiti annakko a mangibus iti pasensiak,” kuna ni Larry, maysa a natanang ken managteppel nga ama ti dua nga ubbing.

Ti solusion: Ikagumaanyo ti agbalin, saan a perpekto, no di ket naimbag nga ulidan. Usarenyo ti sumagpaminsan a panagbiddutyo a mangipaay iti leksion a pakasursuruanda. Kastoy ti kuna ni Chris, nga addaan iti dua nga annak: “No naibus ti pasensiak wenno nagkamaliak iti desisionko ket nakaro ti epektona kadakuada, aklonek ti biddutko ken agpadispensarak. Gapu iti dayta, naamiris dagiti annakko nga agkamali met dagiti nagannak isu a nasken a pagreggetanmi amin a pasayaaten ti kababalinmi.” Ni Kostas a nadakamat itayen, kunana: “Gapu ta agpadispensarak kada maibus ti pasensiak, nasursuro dagiti babbalasitangko ti agpadispensar no agkamalida.”

Kuna ni Jehova a Dios: “Dikay ruroden ti annakyo, no di ket itultuloyyo a padakkelen ida iti disiplina ken panangiturong-panunot ni Jehova.” (Efeso 6:4) No agkontra ti ibagbaga ken ar-aramiden ti maysa nga autoridad, makaparurod dayta, saan laeng a kadagiti nagannak, no di ket nakarkaro pay kadagiti annak. Gapuna, tunggal agngudo ti aldaw, apay a diyo iyimtuod dagitoy iti bagbagiyo: No kas pangarigan ta saankami a nakapagtutungtong kadagiti annakko iti nagmalem, adda ngata nasursuroda iti tigtignayko? No bilang nakapagsasaritakami man, kasta met laeng ngata ti naisurok kadakuada?

[Blurb iti panid 9]

“Sika a mangisursuro iti asinoman, dika aya isuro ta bagim?”​—Roma 2:21

[Ladawan iti panid 9]

No agpadispensar ti nagannak, masursuro met ti anak nga aramiden dayta