Timek ti “Agnanayon a Siudad”
BABAEN ITI MANNURAT TI AGRIINGKAYO! IDIAY ITALIA
Gapu iti pintas ken uni ti adu a burayok ti Roma, natignay ti Italiano a kompositor a ni Ottorino Respighi a mangputar iti kanta a napauluan iti, “Dagiti Burayok ti Roma.” Pasiarentayo ti maysa kadagiti kapintasan—ti Trevi Fountain.
Magnatayo kadagiti akikid a kalsada nga agturong iti burayok. Iti pagkurbaan, adda makitatayo a makapaamanga. Adda nagdakkel a burayok a 20 a metro ti kaakabana ken 26 a metro ti kangatona. Dayta ti Trevi Fountain, nga isu ti kangrunaan a makita iti dayta a bassit a plasa. Anian a makaatrakar nga estruktura a naipasdek iti kasta kabassit a disso!
Ti Trevi Fountain ket impaaramid ni Papa Clement XII ken dinisenio ti Italiano nga arkitekto a ni Niccolò Salvi. Nangrugi ti pannakaibangon dayta idi 1732 ken naileppas idi 1762. Mapadpadanuman dayta a burayok babaen ti kalasugan nga Aqua Virgo a naaramid idi umuna a siglo K.K.P. Agarup 13 a kilometro ti kaadayo dayta a kalasugan manipud iti siudad.
Naibasar iti baybay ti disenio ti burayok a naibangon iti sango ti palasio. Ni Oceanus (wenno ni Neptune, sigun iti dadduma), a maysa a karakter kadagiti sarsarita, ket simamaingel nga agtaktakder iti kasla kabibi a karuahena, bayat a konkontrolenna ti napegges nga ayus ti danum iti sakaananna. Bayat a pumpumsuak ti danum nga agpababa kadagiti sinan kabalio ken sinan tattao a paset ti karuahe, mangngegmo nga agdissuor dayta kadagiti batbato iti baba, a kasla kadagiti allon nga agtapliak iti aplaya. Ti disso a pakaurnongan ti danum ti mangokupar iti kadakkelan a paset ti plasa, isu a no kitkitaen, ti intero a plasa ket kasla paset ti burayok.
Ti Trevi Fountain ket maysa kadagiti kangrunaan a pagpasiaran iti Roma. Inaldaw nga araken ti ginasut a turista daytoy bassit a plasa sada mangipurruak kadagiti sinsilio iti dayta a burayok. Maminsan kada lawas, mapaatianan ti burayok. Ti kuarta nga impurruak dagiti turista ket agpromedio iti $11,000 (₱533,500.00) iti kada lawas. Maurnong ken maidonar dayta iti maysa a narelihiosuan nga organisasion a tumultulong kadagiti agkasapulan.
No dagiti burayok ket makipagkanta la koma kadagiti amin a taga-siudad a kas iti kapanunotan ni Respighi, makunatayo a ti Trevi Fountain ti mangrimbaw kadakuada amin. Ngamin, nagpaiduma unay dayta kadagiti adu a burayok a magusgustuan dagiti turista iti Roma, ti maaw-awagan iti Agnanayon a Siudad.