Panangmatmat ti Biblia

Pakawanen Kadi ti Dios Dagiti Nadagsen a Basol?

ASI ti maysa kadagiti kangrunaan a galad ti Dios. (Salmo 86:15) Kasano kalawa ti asina? Insurat ti salmista: “No dagiti biddut koma ti siputam, O Jah, O Jehova, siasino ti makapagtakder? Ta adda kenka ti pudno a panangpakawan, tapno iti kasta mapagbutnganka.” (Salmo 130:3, 4) Kuna ti sabali pay a teksto: “Kas iti kaadayo ti leleggakan ti init manipud iti lelennekan ti init, kasta ti kaadayona manipud kadatayo ti nangikabilanna kadagiti salungasingtayo. Kas iti maysa nga ama mangipakita iti asi iti annakna, ni Jehova nangipakita iti asi kadagidiay agbuteng kenkuana. Ta pagaammona unay ti pannakapormatayo, a laglagipenna a tapoktayo.”​—Salmo 103:12-14.

Nalawag, naan-anay ken sipaparabur a mamakawan ni Jehova, nga ikabilanganna dagiti limitasion ken pagkurangantayo​—gapu ta “tapoktayo.” Usigentayo ti sumagmamano a pagarigan iti Biblia a mangipakita no kasano kalawa ti asi ti Dios.

Ni apostol Pedro namitlo nga inlibakna ni Kristo. (Marcos 14:66-72) Idi saan pay a manamati, indadanes ni apostol Pablo dagiti pasurot ni Kristo. Sinuportaran ni Pablo ti pannakaidarum ti dadduma kadagitoy. Inanamonganna pay ketdi ti pannakapapatay ti maysa kadagitoy. (Aramid 8:1, 3; 9:1, 2, 11; 26:10, 11; Galacia 1:13) Sakbay a nagbalinda a Kristiano, dadduma a kameng ti kongregasion Kristiano idiay Corinto ti dati a mammartek, manangkikil, ken agtatakaw. (1 Corinto 6:9-11) Ngem idi agangay, nagun-odda ti anamong ti Dios. Apay a pinakawan ida ti Dios?

Tallo nga Addang Tapno Magun-odan ti Asi ti Dios

“Naipakitaanak ti asi, agsipud ta ignoranteak idi ken nagtignayak a buyogen ti kaawan ti pammati,” insurat ni Pablo. (1 Timoteo 1:13) Ipakita dagiti nalawag a sasaona no ania ti umuna nga addang tapno magun-odtayo ti pammakawan ti Dios​—ti saan a panagtalinaed nga ignorante babaen ti pananggun-od iti umiso a pannakaammo maipapan ken Jehova ken kadagiti pagalagadanna kas naibalabala iti Biblia. (2 Timoteo 3:16, 17) Sigurado a ditay maay-ayo ti Namarsua no ditay am-ammuen a naimbag. “Daytoy kaipapananna ti agnanayon a biag,” inkararag ni Jesus iti Amana, “ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3.

Inton magun-od dagiti nasingpet-panagpuspusoda a tattao dayta a pannakaammo, sipapasnek a pagbabawyanda dagiti naglabas a basbasolda. Dayta ti maikadua nga addang tapno magun-od ti pammakawan ti Dios. Kuna ti Aramid 3:19: “Agbabawikayo, ngarud, ket agbaw-ingkayo tapno mapunas dagiti basolyo.”

Dakamaten met dayta a teksto ti maikatlo nga addang​—ti panagbalbaliw. Ti panagbalbaliw kaipapananna ti pananguksob iti daan a kabibiag ken kababalin sa kalpasanna, panangisuot kadagiti pagalagadan ken panangmatmat ti Dios. (Aramid 26:20) No kasta, babaen ti baro a wagas ti panagbiagna, maipakita ti maysa nga isu ket pudno a dumawdawat iti pammakawan ti Dios.

Adda Limitasion ti Pammakawan ti Dios

Adda dagidiay saan a pakawanen ti Dios. Insurat ni Pablo: “No sipapakinakem nga iyugalitayo ti panagbasol kalpasan nga inawattayon ti umiso a pannakaammo iti kinapudno, awanen ti nabati nga aniaman a sakripisio maipaay iti basbasol, no di ket adda nakabutbuteng a panangin-inanama iti [mangkondenar] pannakaukom.” (Hebreo 10:26, 27) Ti sasao a ‘sipapakinakem nga iyugali ti panagbasol’ ipasimudaagna ti rimmamut a kinadakes, maysa a nagdakes a puso.

Kasta ti puso ni Judas Iscariote. “Nasaysayaat koma kenkuana no dayta a tao saanen a nayanak,” kinuna ni Jesus. (Mateo 26:24, 25) Ken no maipapan kadagiti dadduma a panguluen ti relihion idi kaaldawanna, kinuna ni Jesus: “Naggapukayo iti amayo a Diablo . . . No sawenna ti ulbod, agsao a maitunos iti bukodna a pagannayasan, agsipud ta isu maysa a managulbod ken ti ama ti kinaulbod.” (Juan 8:44) Kas ken Satanas, rimmamut ti kinadakesda. Saanda a pagbabawyan ti naaramidda no di ket pinatangkenda pay dagiti lengngesda.a Pudno, makaaramid met iti nadagsen a basol uray dagiti pudno a Kristiano gapu iti kinaimperpekto ken pagkapuyan. Ngem saan a makuna a rimmamut ti kinadakesda.​—Galacia 6:1.

Naasi Agingga ken Patay

Saan laeng a ti basol ti kitkitaen ni Jehova no di ket uray ti kababalin ti nakabasol. (Isaias 1:16-19) Usigentayo biit ti dua a managdakdakes a nailansa iti sikigan ni Jesus. Agpadada a nakaaramid iti nadagsen a krimen, kas inadmitir ti maysa kadakuada: “Aw-awatenta a naan-anay ti maikari kadata gapu iti bambanag nga inaramidta; ngem daytoy a tao [ni Jesus] awan inaramidna a di umiso.” Ipakita dagiti sasao dayta a managdakdakes nga adda pannakaammona maipapan ken Jesus, ket nalabit nakatulong dayta a pannakaammo a mamagbalbaliw iti kababalinna. Naipamatmat dayta kadagiti simmaruno a sasaona, idi a nagpakaasi ken Jesus: “Laglagipennak inton makagtengka iti pagariam.” Ania ti reaksion ni Kristo iti dayta a napasnek a panagpakaasi? “Pudno ibagak kenka ita nga aldaw,” kinunana, “Makikaduakanto kaniak idiay Paraiso.”​—Lucas 23:41-43.

Panunotenyo daytoy: Uray ti maudi a sasao ni Jesus kas tao ipakitana a kinaasianna ti maysa a tao a nangamin a nakaaramid iti basol a maikari iti ipapatay. Makaliwliwa la ketdi dayta! Masiguradotayo ngarud a ni Jesus ken ti Amana a ni Jehova kaasianda ti amin a mangipakita iti pudno a panagbabawi, aniaman ti nalikudanda.—Roma 4:7.

[Footnote]

NAPANUNOTYO KADIN?

◼ Kasanoyo a deskribiren ti asi ti Dios?​—Salmo 103:12-14; 130:3, 4.

◼ Ania dagiti addang nga aramiden ti maysa tapno magun-odna ti anamong ti Dios?​—Juan 17:3; Aramid 3:19.

◼ Ania ti inkari ni Jesus iti nailansa a managdakdakes?​—Lucas 23:43.

[Ladawan iti panid 10]

Impakita ni Jesus a mabalin a mapakawan ti nadagsen a basol