Dagiti Maudi nga Aldaw—Ti Ania?
ITI ay-ayam a basketball, no kuna ti para anunsio a ‘Maudin a dua a minuto,’ kaipapananna nga agpatinggan ti ay-ayam kalpasan ti dua a minuto, sa mayanunsion no ania a grupo ti nangabak. Ngem no ngay adda mangibaga iti, “Agbibiagtayon kadagiti maudi nga aldaw”? Ania ti kayat a sawen dayta?
Ti sasao a ‘dagiti maudi nga aldaw’ ken ‘ti tiempo ti panungpalan’ ket nabayagen a dakdakamaten ti Biblia. (2 Timoteo 3:1; Daniel 12:4) Nasurok a 2,500 a tawenen ti napalabas, naipasirmata ken propeta Daniel dagiti kabilgan a turay iti lubong ken dagiti panagdadangadangda agingga iti “tiempo ti panungpalan.” Naibaga kenkuana nga iti dayta a tiempo a malawlawagan ti kaipapanan dagita a sirmata. (Daniel 8:17, 19; 11:35, 40; 12:9) Insurat pay ni Daniel: “Iti kaaldawan dagidiay nga ar-ari mangipasdekto ti Dios ti langit iti maysa a pagarian a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.”—Daniel 2:44.
Tinukoy ni Jesu-Kristo “ti panungpalan” idi sinungbatanna ti saludsod maipapan “ti pagilasinan ti kaadda[na] ken ti panungpalan ti sistema ti bambanag.” (Mateo 24:3-42) Agparang nga agpada a tuktukoyen da Daniel ken Jesus ti pagnguduan—maysa a dakkel a panagbalbaliw a mangapektar kadagiti tattao nga agbibiag ken nagbiag iti lubongtayo. Insurat ni Daniel ti maipapan iti panungpalan ti amin a gobierno ditoy daga. Dinakamat ni Jesus ti maipapan iti “panungpalan ti sistema ti bambanag.”
Rumbeng kadi a pakaseknam dayta? Siempre. Rumbeng a pakaseknan dayta ti intero a sangatauan agsipud ta nairamantayo amin. Nupay kasta, adu ti mangtagtagilag-an iti dayta a banag. Impadto ti Biblia: “Kadagiti maudi nga aldaw umayto dagiti managuy-uyaw agraman ti panguy-uyawda, nga agtultuloyda maitunos iti bukodda a tartarigagay ket kunkunada: ‘Sadino ti ayan daytoy naikari a kaaddana? Ay ket, nanipud iti aldaw a naturog ken patay dagidi ammami, amin a bambanag nagtultuloy nga isu latta nanipud idi panangrugi ti sangaparsuaan.’” (2 Pedro 3:3, 4) Wen, patien ti dadduma iti kaaldawantayo nga awan pagbalbaliwan ti kasasaadtayo ken agtultuloy a kastoy lattan ti panagbiagtayo.
Adda kadi aniaman a pammaneknek a talaga nga agbibiagtayon iti aw-awagan ti Biblia a dagiti maudi nga aldaw? Ammuentayo.