Natalged a Masanguanan iti Sidong ti Turay ti Dios

MABIITEN nga agpatingga dagiti pakadanagantayo maipapan iti masanguanan ta ti Dios iturayannanton ti planeta a Daga babaen ti panangipasdekna iti Pagarianna. Pampanunoten ni Jesu-Kristo dayta a nagsayaat a namnama idi insurona dagiti pasurotna nga ikararagda: “Umay koma ti pagariam. Maaramid koma ti pagayatam, kas sadi langit, kasta met iti daga.”​—Mateo 6:9, 10.

Ti Pagarian ti Dios saanna a pulos nga usaren dagiti lider ti politika. Imbes ketdi, talipuposenna ti amin a turay ti tao, kas ipasimudaag ti sumaganad a padto ni Daniel maipapan “kadagiti maudi nga aldaw,” ti tiempo a pagbibiagantayo. (2 Timoteo 3:1) “Iti kaaldawan dagidiay nga ar-ari mangipasdekto ti Dios ti langit iti maysa a pagarian a saanto a pulos madadael. . . . Rumekennanto ken pagpatinggaenna amin dagitoy [inaramid-tao] a pagarian, ket dayta agtalinaedto agingga kadagiti tiempo a di nakedngan.” (Daniel 2:44) Nupay saan a pulos a makaliwliwa dayta kadagiti mangsupsuporta iti turay ti tao, mangted dayta iti namnama kadagidiay mangsegsegga iti panagturay ti Dios babaen ti Pagarianna.

Nagsayaat a Masanguanan!

Inton agturay ti Pagarian ti Dios iti intero a daga, dinto mabingaybingay dagiti iturayanna babaen ti politika, puli, relihion, wenno pagbeddengan dagiti pagilian no di ket buklendanto ti sangalubongan a panagkakabsat a pinagkaykaysa ti naespirituan a kinapudno ken ti pudno nga ayat. (Juan 13:34, 35; 17:3, 17) Wen, iti sidong ti turay ti Pagarian, “agtubonto daydiay nalinteg,” ken addanto “kinaruay ti talna agingga nga awanen ti bulan.”​—Salmo 72:7.

Malaksid kadagita, ti Pagarian ti Dios pagbalinennanto a perpekto ti bagi ken isip dagiti napakumbaba a tattao, ket pukawennanto ti amin a sakit, panagsagaba, ken ipapatay. (Apocalipsis 21:3, 4) Inton agangay, ti planetatayo agbalinto a naan-anay a paraiso, isu a matungpalto ti orihinal a panggep ti Dios a naibaga idiay Eden.a​—Genesis 1:28.

Ti Laeng Pudno a Naimbag a Damag

Idi inted ni Jesus ti pagilasinan a buklen ti adu a paspasamak maipapan iti “panungpalan ti sistema ti bambanag,” inramanna ti nakapatpateg a banag. (Mateo 24:3-7) Kinunana: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”​—Mateo 24:14.

Maitunos iti pagayatan ti Dios, idi 2007, dandani pito a milion a Saksi ni Jehova iti 236 a pagilian ti nangiranud iti mensahe ti Pagarian kadagiti kaarrubada ken siraragsak a nangbusbosda iti nasurok a 1.4 a bilion nga oras maipaay iti daytoy a trabaho. Apay a sitatalged a patien dagiti Saksi dagiti kari a linaon ti Biblia? Agsipud ta kas ilawlawag ti sumaganad nga artikulo, kanayon a tungpalen ti Dios ti saona.​—Roma 3:4.

[Footnote]

[Blurb iti panid 7]

Ibaga ti Biblia nga addanto “kinaruay ti talna”