Sigurado a Masanguanan!
Ipapantayo a dimtengka iti nagsapalan ti kalsada. Kuna ti maysa a karatula, “Agtalekka kadagiti tattao ken kadagiti karida.” Ngem kuna ti sabali, “Agtalekka iti Dios ken iti Pagarianna.” Ania kadagitoy ti surotem?
NAINSIRIBAN ti agtalek iti Dios. “Daydiay umim-imdeng kaniak,” kunana, “agtaengto iti kinatalged ket saanto a masinga manipud alinggaget ti didigra.” (Proverbio 1:33) Umim-imdengtayo iti Namarsua kadatayo no ipangagtayo dagiti pannursurona a linaon ti Biblia, yantangay ammotayo a mapagtalkan dagita. (2 Timoteo 3:16) Adda kadi natalged a rason a pagtalkantayo dagita? Adda! Kas pagarigan, nakitatayo iti maikadua nga artikulo daytoy a serye a ti Biblia laeng ti mangilawlawag no apay a saan a maiturayan dagiti tattao ti bagida. Saan kadi nga umiso ti ibagbaga ti Biblia?
Umiso met dagiti padto ti Biblia. Kas pagarigan, impadto ti Biblia ti nakalkaldaang a kasasaad a mangtanda kadagiti “maudi nga aldaw.” Maim-imatangantayo dayta a mismo. (Mateo 24:3-7; 2 Timoteo 3:1-5) Impadto pay ti Biblia a dadaelen a mismo dagiti tattao ti kasasaad ti planeta. Ti Dios ‘dadaelenna dagidiay mangdaddadael iti daga,’ kuna ti Apocalipsis 11:18.
Idi naisurat dagitoy a sasao agarup 2,000 a tawenen ti napalabas, kasla di mapasamak dagiti kasasaad a pannakarugit ti angin, baybay, ken daga; panagbara ti globo; ken pannakatalipupos ti adu a kita ti biag a gapuanan dagiti tattao. Ngem ita, mapaspasamaken! Wen, di pulos agulbod ti Dios. Detalyado a matungpal ti naisurat a Saona.a (Tito 1:2; Hebreo 6:18) Kinapudnona, inusar ti Dios ti naganna a mangipasigurado iti pannakatungpal ti saona.
Nagan a Mabalinyo a Pagtalkan
No kasano a ti maysa a pirma patalgedanna ti maysa a tseke, patalgedan ti personal a nagan ti Dios a Jehova dagiti amin a karina a nairekord iti Biblia.b “Iti nasantuan a naganna inkabiltayo ti panagtalektayo,” kinuna ti mannurat iti Biblia a masansan a nakapasar iti naayat a panangaywan ti Dios.—Salmo 33:21; 34:4, 6.
Iti Proverbio 18:10, ti nagan ti Dios ket nainaig iti panangaywan nga ipapaayna kas maysa nga ama: “Ti nagan ni Jehova ket napigsa a torre. Iti dayta nga agtaray ti nalinteg ket maipaayan iti salaknib.” Kasta met, kuna ti Roma 10:13: “Tunggal maysa nga umawag iti nagan ni Jehova maisalakanto.” Siempre, ti personal a nagan ti Dios ket saan a maysa nga anting-anting a mangpaksiat iti dakes. Imbes ketdi, ti Dios a mismo ti mangisalakan. Ibaga met ti teksto nga adda dagidiay umawag iti naganna kas pammaneknek a naan-anay nga agtalekda kenkuana ta ammoda a naimbag ti pakasarsaritaanna. Kuna ti Salmo 91:14: “Agsipud ta kaniak [ni Jehova] insaadna ti panagayatna, isu ilisikto met. Salaknibakto agsipud ta naammuanna ti naganko.”
Imtuodem ti bagim, ‘Asino ti pagtaltalkak—ti Dios wenno ti tao?’ Dagiti Saksi ni Jehova pinilida ti Dios ken ti Pagarianna, saan a maibatay iti personal a sentimiento wenno gapu ta mamatpatida lattan iti aniaman a mangngegda, no di ket gapu iti nabileg a pammati a nairamut iti umiso a pannakaammo iti Biblia. (Hebreo 11:1; 1 Juan 4:1) Kas resultana, saanda a pagamkan ti masanguanan no di ket ‘agrag-oda iti namnama’ nga agur-uray kadakuada. Awisendakayo a makiraman iti kasta a naraniag a namnama.—Roma 12:12.
[Footnotes]
a Kitaem ti Nobiembre 2007 nga espesial a ruar daytoy a magasin, a naan-anay a mangsalaysay iti saludsod a “Mapagtalkanyo Kadi ti Biblia?”
b Kitaem ti naipakuyog a kahon a “Nagan ken Pammatalged.”
[Blurb iti panid 9]
No kasano a ti maysa a pirma patalgedanna ti maysa a tseke, ti nagan ti Dios patalgedanna ti amin a kari nga adda iti Biblia
[Kahon iti panid 9]
NAGAN KEN PAMMATALGED
Ti nagan ti Dios a Jehova ket saan laeng a maysa a pakabigbigan.c Apay? Ti kaipapanan dayta a nagan ket “Pagbalinenna.” Kayatna a sawen a gapu iti ayat, pannakabalin, ken siribna, kabaelan ti Dios ti agbalin nga aniaman a kayatna a pagbalinan tapno maibanag ti panggepna ken matungpal ti saona. Kas pagarigan, kabaelanna ti agbalin a Manangisalakan kadagiti nalinteg, Manangdadael kadagiti nadangkes, Managdengngeg iti kararag, wenno naayat nga Ama—aniaman ti pilienna a pagbalinan.
“Siak Daydiay Nadibinuan,” kuna ni Jehova, “Daydiay a manipud punganay ibagbagana ti pagnguduan, . . . Daydiay agkunkuna: ‘Ti pammatigmaanko agtalinaedto, ket isuamin a pakaragsakak aramidekto.’” (Isaias 46:9, 10) Gapu ta ti Dios ket kanayon a napudno iti bagina ken gapu ta nairaman ti naganna, wenno reputasionna, sigurado a matungpal ti naisurat a Saona. “Ti Dios saan a maysa a tao tapno agulbod.”—Numeros 23:19.
[Footnote]
c Ti nagan a Jehova ket naiduma kadagiti titulo a Mannakabalin-amin, Namarsua, Dios, ken Apo. Agparang dayta iti dandani pito a ribu a daras iti orihinal a teksto ti Nasantuan a Biblia. Ti Dios a mismo ti nangawag iti bagina iti dayta a nagan. Kuna ti Exodo 3:15: “Jehova . . . ti naganko nga agnanayon.”—Ti Biblia.